ძალიან ბევრი ამბობს, რომ მე ძველი აშენებული ბინა მირჩევნია, უფრო მყარია, ვიდრე ახალი და უფრო ვენდობი”, – ამის შესახებ „ბიზნესპრესნიუსს“ უძრავი ქონების აგენტმა ნელი გოგუაძემ განუცხადა.
ცნობისთვის, სხვადასხვა სტატისტიკა მოწმობს, რომ ტრანზაქციებში უფრო ძველი აშენებული ბინები სჭარბობს. მაგალითისთვის, „თიბისი კაპიტალის“ უძრავი ქონების მიმოხილვის თანახმად, 2025 წლის სექტემბერში დედაქალაქში ახალაშენებულზე ხუთჯერ მეტი ძველი ბინა გაიყიდა.
კერძოდ, 2025 წლის სექტემბერში, თბილისში 611 ახალი ბინა გაიყიდა, მაშინ, როცა ძველი ბინების ტრანზაქციებმა 3258-ს მიაღწია.
„თუ ძველი აშენებულ ბინებზე მოთხოვნა მაღალია, ალბათ ფასების გამო უნდა იყოს ეს. ახალაშენებულ ბინებს დაბალი ფასი არ აქვს. უბანს გააჩნია, მაგრამ თუნდაც ვარკეთილის ბაზარზე, 1200-1300 აშშ დოლარი უნდა იანგარიშო საშუალოდ კარკასზე.
ძალიან ბევრი ამბობს ხოლმე, მე ძველი აშენებული მირჩევნია, უფრო მყარია, ვიდრე ახალი და უფრო ვენდობი. არსებობს ადამიანების ასეთი კატეგორია, რომელიც ამის გამო ანიჭებს ძველ კორპუსს უპირატესობას, რადგან ჰგონია, რომ ის უფრო მდგრადია, წლებს გაუძლო და სიმყარის კუთხით ურჩევნია. ჩემი გადმოსახედიდანაც კი, ახალაშენებული ბინები კარგია, მაგრამ უფრო მეტ ნდობას მაინც ძველ კორპუსებს ვუცხადებ.
ბევრი სხვადასხვა სახის პრობლემა იჩენს ახალაშენებული კორპუსების შემთხვევაში თავს. ერთ-ერთი პრობლემა, გარდა იმისა, რომ იქ წყალი შემოდის, ლიფტი ფუჭდება, არ არის კარგად გაკეთებული და ა.შ. არის ის, რომ აშენებენ და არ აბარებენ. ბევრს ეს დიდ პრობლემად მიაჩნია, როცა წლების განმავლობაში კორპუსი წერია მშენებარედ, ესე იგი რაღაც აშენდა დარღვევით, რაღაც არ შესრულდა. ექსპლუატაციაში რომ არ შედის კორპუსი, ავტომატურად ადამიანი ეჭვობს რაღაცას. ბევრი ბინაა, 8 წელია გასული და ისევ მშენებარე უწერია.
გააჩნია იმასაც თუ სად არის მაღალი მოთხოვნა ძველაშენებულ ბინებზე, თუ ეს ხდება გარეუბნებში, მაგალითად, ვარკეთილში, ამის ერთ-ერთი მიზეზი შეიძლება ისიც იყოს, რომ ხალხი, ვისაც აქვს მკვდარი ფული, ყიდულობს ძველ კორპუსში ბინას, რადგან ის ავარიულია და დროთა განმავლობაში ჩანაცვლდება და მესაკუთრეც ახალს მიიღებს. პრაქტიკულად, ამით ფულს აბანდებს უძრავ ქონებაში ადამიანი. მე თუ მაქვს რაღაც მკვდარი ფული და არ ვიცი სად წავიღო, შეიძლება დაბალ ფასში ვიყიდო ძველი ბინა და შემდეგ ჩანაცვლების პროგრამაში მოვხვდე. ასეთი შემთხვევებიც ბევრია.
თუმცა, მაინც უფრო მაღალი მოთხოვნა რჩება ახალ ბინებზე. 5 მყიდველიდან 4-ს ახალაშენებულზე აქვს მოთხოვნა.მაღალ მოთხოვნას ძირითადად განაპირობებს ის, რომ მარტივად აქირავებენ. თანხის გადამხდელი, დამქირავებელი, უფრო მეტად არის არაქართველი, რომელიც ძალიან იშვიათად შედის ძველ კორპუსში. ისინი ირჩევენ ახალაშენებულ კორპუსს იმიტომ, რომ იქ დაცვის შეგრძნება ბევრად მაღალია. უფრო მეტია კომფორტიც, ამიტომ ბინები ახლაშენებულ კორპუსებში ძალიან სწრაფად ქირავდება. თუ ვინმეს ამ კუთხით ინვესტიციის ჩადება უნდა, რა თქმა უნდა, იყიდის ახალ ბინას,“ – განაცხადა გოგუაძემ.
