დღეს, ოზურგეთის მუნიციპალიტეტის საკრებულოს სხდომაზე საპატრიარქოს 4.4 ჰა ნაკვეთი უსასყიდლო უზუფრუქტის ფორმით გადაეცა. აღნიშნული ნაკვეთი ლიხაური-ჭანიეთის საზღვარზე მდებარეობს და სასოფლო-სამეურნეო დანიშნულების მიწის ნაკვეთია. საკრებულოს დეპუტატებმა მეორე საკითხად განიხილა “ოზურგეთის მუნიციპალიტეტის საკუთრებაში არსებული უძრავი ქონების სარგებლობის უფლებით გადაცემაზე ოზურგეთის მუნიციპალიტეტის გამგებლისთვის თანხმობის მიცემის შესახებ“.
აღნიშნულ სადემონსტრაციო ნაკვეთზე ოზურგეთის მუნიციპალიტეტის გამგეობამ დაიწყო უნიკალური გურული ვაზის ჯიშების გაშენება, რომელიც ა (ა)იპ ფერმერული მეურნეობის განვითარების ცენტრს გადასცა.
“მოგეხსენებათ რამდენიმე წლის წინ საფუძველი ჩავუყარეთ, გურული ენდემური ვაზის ჯიშების გაშენებას, ამისთვის სპეციალური ნაკვეთი გამოიყო, რომელიც მუნიციპალიტეტის საკუთრებაში დარეგისტრირდა. დღეის მდგომარეობით და საქართველოს კანონმდებლობაში შესული ცვლილებების თანახმად, მუნიციპალიტეტს აღარ გააჩნია იმ სამეწარმეო და არასამეწარმეო იურიდიული პირების არსებობის უფლება, რომლებიც მუნიციპალიტეტის უფლებამოსილებას არ განეკუთვნებიან. აქედან გამომდინარე, ჩვენ მოგვმართა წერილით საპატრიარქომ და ითხოვა აღნიშნული მიწის ნაკვეთის გადაცემა იმავე პროფილის შენარჩუნებით, რაც ჩვენ გაგვაჩნდა. ასე რომ, ამ განკარგულების მიღებით, კიდევ უფრო განვითარდება ის დაწყებული საქმე, რასაც უნიკალური გურული ვაზის ჯიშების შენარჩუნება და აღდგენა ჰქვია“, _ აღნიშნა არჩილ ყაზაიშვილმა.
სანამ მეორე საკითხი განიხილებოდა, დარბაზში შემოვიდა შემოქმედელი მიტროპოლიტი იოსები. სხდომის დროს ოზურგეთის მუნიციპალიტეტის გამგებლის მოვალეობის შემსრულებელმა, არჩილ ყაზაიშვილმა თქვა, რომ საპატრიარქოდან შემოვიდა წინადადება, რომ სოფელ ლიხაურში მიწის ნაკვეთის მათთვის გადაგვეცა.
შემოქმედელი მიტროპოლიტის იოსების თქმით, ახალგაზრდებს შეასწავლიან ვაზის ჯიშების დამყნას. ასევე, გაშენდება მეურნეობა და დიდი ყურადღება მიექცევა გურული ვაზის ჯიშების გაშენებას.
გამოტანილი საკითხი საკრებულოს წევრებმა მიიღეს და დაამტკიცეს.
