გარემოს დაცვისა და სოფლის მეურნეობის მინისტრის, ლევან დავითაშვილის განცხადებით, სეზონური დასაქმების ტენდენცია, მეზობელ ქვეყნებში, შეიძლება, საქართველოში შეთავაზებული სამუშაო ადგილებით ჩანაცვლდეს.
„სოფლის მეურნეობაში ადამიანების დასაქმების ახალი შესაძლებლობები ჩნდება. დღევანდელი ტენდენციები გვაძლევს იმის საშუალებას, რომ სოფლის მეურნეობაში, სამუშაო ძალაზე მოთხოვნა მნიშვნელოვნადაა გაზრდილი. დავინახეთ, რომ დარგი ახალი სამუშაო ადგილების გენერირებას იწყება. ახლა განსაკუთრებით აქტუალურია კახეთის რეგიონი, სადაც არის სეზონური დასაქმების საშუალებები. ვხედავთ, რომ ინტენსიურად და წარმატებით ბინავდება სხვადასხვა კულტურა. პირველ რიგში, ეს ატმის კულტურას ეხება, სადაც, საქართველოს სხვადასხვა კუთხიდან, დაახლოებით, 2 ათასამდე ადამიანია დასაქმებული. აჭარაში მცხოვრები მოსახლეობის ძალიან დიდი სურვილი იყო, სეზონურად, დასაქმებულიყვნენ თურქეთის რესპუბლიკაში. აჭარის ადგილობრივ მთავრობასთან და კახეთში, მუნიციპალიტეტებთან ერთად, სამუშაო ძალის კახეთში მობილიზება მოვახერხეთ, თუმცა, ესაა მხოლოდ ერთი ნაწილი. ჩვენ გვესმის, რომ შიდა დასაქმების ახალი პერსპექტივები ჩნდება სხვადასხვა კუთხეში და ჩვენ გვექნება მოსავლის აღებისა და დაბინავების ძალიან ინტენსიური პროცესი კახეთში, რომელიც უკავშირდება რთველს. ამის შემდეგ, გვექნება სამუშაო ძალის საჭიროება შიდა ქართლში“ – განაცხადა ლევან დავითაშვილმა.
