„რით სჯობიხართ ნაცებს?“ _ რიტორიკული კითხვა დავით დარჩიას,  სამსახურიდან გათავისუფლებული მოხელისგან

ოზურგეთის მუნიციპალიტეტის მერიაში, რეორგანიზაციის მოტივით, 35 თანამშრომელი გაათავისუფლეს. ეს გადაწყვეტილება, საბოლოოდ 29 აპრილს, ოზურგეთის  საკრებულოს სხდომაზე მიიღეს, რომელიც ხმაურისა და ფიზიკური დაპირისპირების ფონზე წარიმართა.

(აქვე შევნიშნავთ, რომ საზოგადოებაში ვრცელდება მცდარი ინფორმაცია, თითქოს  ეს 35 ადამიანი სამსახურში მიღებული  იყო ყოფილი მერის მიერ და ასევე  იყო მისი მხარდამჭერიც. ასეთები  კი, როგორც აზუსტებენ, გათავისუფლებულებს შორის, რამდენიმეა.  უმეტესობა ამ ადამიანებისა კი  ყოფილ მერს დახვდა მერიაში და ადრეც მუშაობდნენ აქ. ავტ.)

მერიის თანამშრომელი, ნარი მუჯირი, რომელიც ინფრასტრუქტურის სამსახურის სპეციალისტად მუშაობდა, როგორც თავად ამბობს, ყველაზე გამორჩეულად არის დევნის ობიექტი, უკვე მესამედ გაათავისუფლეს სამსახურიდან და ეს  პოლიტიკური ნიშნით ხდება.   მან არაერთხელ აღნიშნა, რომ არჩევნებზე  მხარი კონსტანტინე შარაშენიძეს დაუჭირა და ამის გამო გადაეკიდა მას დავით დარჩია.

საკრებულოს სხდომაზე, მან გათავისუფლებულებს შორის, ყველაზე ვრცლად ისაუბრა და პირდაპირ საკრებულოს თავმჯდომარეს, დავით დარჩიას მიმართა:

_მესამედ მივდივარ ამ სამსახურიდან. რა ვერ გავაკეთე? რაიმე მიზეზი არსებობს ჩემი სამსახურებრივი გადაცდომის, დაგვიანების, აუდიტის მიერ, რაიმე დარღვევის მინიშნებისა?  დათო, შენ ვერასდროს დაიცავი შენი  აქტივისტები. ახლა თქვენ რით სჯობიხართ ნაცებს?  დიპლომი არ მაქვს? კარგი სპეციალისტი არ ვარ? 2014 წელსაც გამიშვით, 2017 წელსაც. დაგავიწყდათ, 2012 წელს ერთად რომ ვათენებდით და ვაღამებდით? რატომ მათავისუფლებთ? მითხარით, რითი მჯობიხართ?   თქვენი ადგილი დავიკავე ? იმიტომ, რომ შენ იყო კარგად?  თვალში ნაცარს რატომ გვაყრით? საჯარო მოხელეს კანონი იცავსო, რატომ ვერ მიცავს კანონი? როცა გამიშვით, 2014 წელს, სიმსივნით დავადებული დედა მყავდა სახლში.  იკითხეთ ამბავი? რატომ გამიშვით?  თქვენ ხომ  კარგად ხართ მოწყობილი?  ბატონო დათო, იმაზე უარესი რა  პოლიტიკური დანაშაული მაქვს, რაც შენმა შვილმა სოციალურ ქსელში დაწერა?    

(აქვე განვმარტავთ, რომ ოზურგეთის საკრებულოს თავმჯდომარის შვილმა, იოსებ დარჩიამ სოციალურ ქსელში სტატუსი გამოაქვეყნა და  საქართველოს მთავრობას გადადგომისკენ მოუწოდა. ის წერდა, რომ ახალი არჩევნები უნდა დაინიშნოს, რომელიც ევროკავშირმა უნდა ჩაატაროს, თორემ რუსული ხომალდის ბედი გარდაუვალია. ლინკი აქვე. ავტ)

_დაბალი დონეა (?) – დონე დაუწუნა  დარჩიამ მუჯირს საკრებულოს სხდომაზე.

ნარი მუჯირმა  საკრებულოს წევრებსაც მიმართა:

_რა გინდათ?  დაგიჩოქოთ? დაგიჩოქებთ,  არ მრცხვენია, რა გინდათ? _ ეკითხებოდა ის საკრებულოს  მთელ გუნდს, თუმცა „ქართული ოცნების“  დეპუტატები არანაირ პასუხს არ აძლევდნენ.

მიუხედავად, გათავისუფლებული თანამშრომლების განმარტებებისა , „ქართული ოცნების“ შემადგენლობამ ურყევად, ყოყმანის გარეშე უყარა  კენჭი მათ გათავისუფლებას.

ნარი მუ ჯირი „გურია ნიუსთან“ საუბრობს საკუთარ თავზე, ითხოვს  პროცესების სამართლიან  გაშუქებას და თანადგომას.  საუბრობს, (და ეს საკრებულოს სხდომაზე ღიად განაცხადა),  რომ ის განსაკუთრებით დაჩაგრეს იმ მეგობრებმა, რომლებთანაც ერთად 2012 წელს ღამეებს  ათენებდა  „ქართული ოცნების“ ოფისში.

_ამითვალწუნეს იმის გამო, რომ კონსტანტინე შარაშენიძეს დავუჭირე მხარი. მე ეს არც დამიმალავს. მე არც კომისიის წევრი ვყოფილვარ და არც რაიმე სტატუსი მქონია არჩევნებზე. ხოლო ისეთი ადამიანები დატოვეს სამსახურში, ვინც პირდაპირ მუშაობდა შარაშენიძის შტაბში. მე პიროვნებებს არაფერს ვერჩი.  ამით იმის თქმა მინდა, რომ ვინც „ჩამწყობი“ მოძებნა, არ გაათავისუფლეს. ამიტომ ეს რეორგანიზაცია კი  არ არის, ეს წმენდაა. დამჩაგრეს, თან სასტიკად. უკვე მესამედ მაგდებენ სამსახურიდან. ვიბრძოლებ ბოლომდე, მივმართავ სასამართლოს, მეც და გათავისუფელბული  თანამშრომლებიც, რომლებსაც დაუმსახურებლად, არადამიანურად გამოაცალეს პირიდან ლუკმა. ჩვენ 700 ლარიც არა და დავით დარჩიას, ბიძინა ივანიშვილის კურსელობის გამო, 5 ათას ლარამდე ხელფასი ჰქონდეს? სანამდე უნდა გაგრძელდეს ეს?   და ეს ხდება 21-ე საუკუნეში. ამას ვიფიქრებდით, „ქართული ოცნება“ ასე მოგვექცეოდა 2022 წელს? როგორც საკრებულოს სხდომაზე ვუთხარი, რას აკეთებს ან რას აკეთებდა სამსახურში ჩემზე ან სხვაზე მეტს, დავით დარჩია, ამხელა ხელფასი რომ დაუნიშნა საკუთარ თავს?   გარდა იმისა, რომ სამსახურში მხოლოდ კიბეებზე ადის და ჩამოდის, რათა თანამშრომლებს არ დაავიწყდეთ, რომ ის ბიძინა ივანიშვილის თანაკურსელია! რა აკეთებს? ხომ ვკითხე, მიპასუხა რაიმე? დონე დამიწუნა დარჩიამ.  რით სჯობნიან ესენი ნაცებს? ხომ ყველა ხედავს, პორტირებული ნაცებითაა ავსებული ეს საკრებულო?  _ ემოციებს ვერ მალავს ნარი მუჯირი და კდევ ერთხელ გვთხოვა, დავეხმაროთ სამართლიან ბრძოლაში.

ნარი მუჯირმა ასევე თქვა, რომ სამსახურიდან გაათავისუფლეს მისი მეუღლეც, რომელსაც მიზერული ხელფასი ჰქონდა და  ახლა ბედის ანაბარა, დარჩნენ, ისე რომ თვიური შემოსავალი ერთი ლარიც არ აქვთ.

ამავე თემაზე:

“ყველა ზღვარი გადაკვეთილია! წითელი ხაზები აღარ არსებობს!”