„იაშვილის სახელობის ბავშვთა ცენტრალური საავადმყოფოს“ სამედიცინო დირექტორმა, ივანე ჩხაიძემ მედიაცენტრ “მთავარში” გამართულ ბრიფინგზე განაცხადა, რომ როგორც წესი, გრიპის ვაქცინა ქვეყანაში ოქტომბრის დასაწყისში შემოვა, ხოლო აცრა კი ოქტომბრის ბოლო ასაცრელად საუკეთესო პერიოდია.
,,გრიპის შემთხვევების პიკი აღინიშნება დეკემბერ-იანვარის პერიოდში. ვაქცინაციის ერთ-ერთი მთავარი მიზანი უნდა იყოს პიკისთვის მომზადება ჩვენი მოსახლეობის, პირველ რიგში, რისკ ჯგუფების. იდეალური პერიოდი ვაქცინაციის ჩატარების არის ოქტომბრის მეორე ნახევარი და ნოემბრის დასაწყისი. 2023 წელს ნოემბრის პირველი კვირა იყო, როდესაც დაფიქსირდა გრიპის პირველი შემთხვევა. სავარაუდოდ, წლევანდელი წელიც არ იქნება გამონაკლისი და მოლოდინი გვაქვს, რომ ნოემბერში გამოჩნდება გრიპის ვირუსი.
გრიპის ვაქცინა გაკეთებიდან ორი კვირის შემდეგ იწყებს მოქმედებას, ამიტომ, აქედან გამომდინარეა სწორედ აღებული პერიოდი, ოქტომბრის მეორე ნახევარი ნოემბრის დასაწყისი, იდეალური დრო იმისათვის, რომ ვაქცინის გაკეთებიდან ორი კვირის შემდეგ ჩვენი ორგანიზმი იყოს მზად მაქსიმალური დაცვისათვის გრიპის ვირუსის წინააღმდეგ”, – აღნიშნა ივანე ჩხაიძემ.
