გასულ წლებში აზიური მავნებლის, ფაროსანას საწინააღმდეგო ღონისძიებებმა გურიაში, მიუხედავად არაერთი ნეგატიური ფაქტის გახმაურებისა და მოსახლეობის უკმაყოფილებისა, მაინც გამოიღო კარგი შედეგი. ახლა მავნებელი ნაკლებად არის გარემოში.
შესაბამისად, სეს-ის რეგიონული სამმართველო, როგორც ამ ზაფხულში ვიუწყებოდით, ფერომონების დადგმით და მიღებული შედეგის მიხედვით იღებდა გადაწყვეტილებას, რომელ სოფლებში მომხდარიყო შეწამვლითი ღონისძიებები.
შეწამვლის დროს, ყველაზე მნიშვნელოვანი იყო მეფუტკრე ფერმერებისთვის ინფორმაციის დროული მიწოდება. მეფუტკრეების აზრის გათვალისწინებით, სეს-ის წარმომადგენლებთან მოხდა შეთანხმება და გადაწყდა, დღის ნაცვლად, გვიან, საღამოს საათებში მომხდარიყო შეწავლითი სამუშაოები.
ზაფხულის პერიოდში, საღამოს რვა საათის შემდეგ, ფუტკარი უკვე სკაშია, ხოლო ფაროსანა მაღალი ტემპერატურის გამო (ის შემოდგომის შუა რიცხვებიდან, აცივების შემდეგ შედის შენობა-ნაგებობებში) კვლავ გარეთაა, შეწამვლას აქვს აზრი. თუმცა, როცა სეს-ის რეგიონული სამმართველო ოქტომბრის შუა რიცხვებში ახდენს შეწამვლას ( როცა საღამოს საკმაოდ ცივა და ფაროსანა უკვე შენობებშია შეყუჟული), მოსახლეობა მიიჩნევს, რომ არანაირი პერსპექტივა არ აქვს ასეთ წამლობას, რადგან სახლში დამალულ მავნებელს ეს არ კლავს.
_ზაფხულში შეწამვლას კიდევ აქვს რაღაც აზრი. მაშინ, როცა საღამოს 8 საათისთვის, ფუტკარი უკვე სკაშია და იმედი გვაქვს, არ დაიხოცება. ფაროსანა კი გარეთაა, მაღალი ტემპერატურის გამო და დიდი ალბათობით, მოხდება მისი გაუვნებელყოფა, მაგრამ ახდა რას აშხუილებენ ამ შუა ოქტომბერში?! საღამოს ფუტკარიც დამალულია და უკვე დაწყებული სიცივის და დღის კლების პირობებში, ფაროსანც აღარ არის გარეთ. რაც არის, შენობა-ნაგებობებშია შესული. ხომ უნდა იცოდეს ადამიანმა, რომ აშხუილებს, მოდის „სირენით“ და ღმუიან, მეტეორივით ჩაქროლებაა საქმე? თუ აგვიხსნიან, რა შეწამლეს? ერთ ფაროსანას თუ მოკლავს შუა ოქტომბერში, ღამის საათებში შეწამვლა? გააგებინეთ მაგათ, რომ ფაროსანა ახლა გვიან საღამოს გარეთ აღარ არის. დღისით, სითბოში რაც გამოვა გარეთ, ფერომონების საშუალებით შესწავლილ ლოკაციებზე შეწამლონ დღისითვე, რადგან ახლა ფუტკარიც არ არის აქტიური. ჰკითხეთ მაგათ, როდის დაასრულებენ ფაროსანას საწინააღმდეგო წამლობა-სიაფანდობას? ეტყობა, ჩამოტანილი წამალი მორჩათ და გასაღებაა საჭირო, _ ამბობენ ჩვენთან საუბარში სოფლების: ჭანიეთის, გურიანთის, ლიხაურის, ასევე ქალაქის მცხოვრებლები.
მათ სურთ, სეს-ში გაითვალისწინონ ხალხის აზრი, რომ ამ პერიოდში, ღამის სათებში ფაროსანა გარეთ არ არის. ეს შეწამვლა არაფერს შველის, გარდა იმისა, რომ პირიქით, წყვეტს ჭიამაიებს თუ ისეთ მწერებს, რომლებიც, მათი თქმით „უაზრო შეწამვლაზე უფრო შველიან ბუნებას, მავნებლების წინააღმდეგ“.
ამბობენ იმასაც, რომ შეწამვლის შესახებ არ ხდება მოსახლეობის მასობრივი გაფრთხილება.
_ რუპორით ყვირილი და თან თერმული ნისლის გაშვება რომ ერთდროულად ხდება, რანაირი გაფრთხილებაა?_ გვეკითხებიან ისინი.
ოზურგეთის მუნიციპალიტეტის ეკონომიკის სამსახურის, სოფლის მეურნეობის განყოფილების თანამშრომელი აგრონომი აკაკი ღლონტი „გურია ნიუსთან“ კომენტარს აკეთებს და მოსახლეობის აზრს ძირითადად ეთანხმება:
_ახლა, ოქტომბერში, ღამის საათებში შეწამვლას არანაირი აზრი არ აქვს. მოსახლეობა ამჯერად სწორად აღნიშნავს, მავნებელი, რომელიც უკვე არც ისე ბევრია, რაც არის, შენობა-ნაგებობეშია შემალული. შინაარსი რა აქვს ასეთ შეწამვლას, თორემ შეწამვლის წინააღმდეგი კი არ ვარ. ვიმეორებ, აზრი არ აქვს. ყველაფერი გამოცდილებაა და ნორმალური აზრი უნდა გაითვალისწინონ, _ გვითხრა მან.
სეს-ის გურიის რეგიონული სამსახურის უფროსი, მანანა ერქომაიშვილი არ ეთანხმება არც ხალხის და არც სხვა სპეციალისტთა თანმხვედრ აზრს:
_საჭირო რომ არ იყოს, სახელმწიფო ამდენ ხარჯს არ გაიღებს (თუმცა, არაერთი ფაქტი გვაქვს, უაზროდ გაბერილი ხარჯების გაღებისა, თუნდაც „ფაროსანას პროგრამის“ირგვლივ, რაც გასულ წლებში არც ისე საფუძვლოდ იყო გახმაურებული. ავტ.). არსებობს შტაბი, შეგიძლიათ უფროსს, ლაშა შალამბერიძეს მიმართოთ. ტემპერატურა, საშუალოდ, როცა 15 გრადუსს ქვემოთ დაეცემა, მაშინ აღარ იქნება შეწამვლა საჭირო. ზაფხულში ტყეში იყო მავნებელი. ხალხი იძახდა, არ არისო. იმდენი არაა, რაც წინა წლებში იყო, რა თქმა უნდა, მაგრამ იცით, რამხელა პოპულაცია აქვს ფაროსანას? _ გვითხრა ერქომაიშვილმა და არ დაუზუსტებია, შეწამლავდნენ თუ არა კიდევ ოქტომბერში, რის კატეგორიული წინააღმდეგიცაა მოსახლეობა.
_არ დავინახოთ ღამით მეტეორივით ჩამოქროლილები, რომ ააყროლეს ყველაფერი. გაიგონ მაგათ, რომ ახლა, ოქტომბრის შუა რიცხვებია, ცივა, საღამოს ფაროსანა გარეთ არ არის, ესენი რომ „აფუტებენ“ , იმ დროს. ამიტომ, გეგმა თუ აქვთ, რაღაც სხვანაირად ჩამოწერონ და ჩვენ ნუ გვახრჩობენ სალიარკის სუნით, _ კატეგორიულად საუბრობენ, განსაკუთრებით სოფლების მცხოვრებლები.
„გურია ნიუსი“ თვალს მიადევნებს ფაროსანას საწინააღმდეგო ღონისძიებების გატარების დასასრულს მიახლოებულ პროცესს.
