2017 წლის 20-26 აგვისტოს ხანძრის შედეგად ბორჯომში, წინასწარი მონაცემებით, 752 ჰექტარი ტყეა დამწვარი, საიდანაც 525 ჰექტარი 2008 წლის ნახანძრალი ტერიტორიაა.
როგორც ცნობილია, ბორჯომში, სადაც 2008 წელს, რუსეთ-საქართველოს ომის დროს, ტყის დიდი ნაწილი დაიწვა, განაშენიანების პროცესი მიმდინარეობდა.
“გურია ნიუსს” იმის შესახებ, თუ როდის უნდა დასრულებულიყო 2008 წლის ომის დროს გადამწვარი ტყის აღდგენითი სამუშაოები და რა ნაბიჯების გადადგმა იგეგმება 2017 წელს მომხდარი ხანძრის შემდეგ, ეროვნული სატყეო სააგენტოს უფროსის მოადგილე, ნათია იორდანიშვილი ესაუბრა.
“2008 წლის აგვისტოში, რუსეთ-საქართველოს შეიარაღებული კონფლიქტის დროს, ბორჯომის ხეობაში მოხდა ხანძარი _ ცეცხლმა 1000 ჰექტრამდე ტყის ფართობი მოიცვა. აქედან სრულად განადგურდა 250 ჰექტარი.
2009 წელს შეიქმნა არა ერთი სამთავრობო თუ არასამთავრობო სექტორის წარმომადგენლებით დაკომპლექტებული კომისია, განხორციელდა რიგი შესწავლები. ასევე, ფინეთის მთავრობამ იმავე წელს გამოთქვა ფინანსური დახმარების სურვილი და ბორჯომის ხეობაში ნახანძრალი ტყის აღდგენის პროექტი მომზადდა. თუმცა, სამწუხაროდ, ქმედითი ღონისძიებების დაწყება შესაძლებელი გახდა 2013 წლიდან.
ამ პროექტს მანამდე ძალიან ბევრი ბარიერი შეხვდა, მათ შორის, სამთავრობო უწყებების მხრიდანაც. სტრუქტურული ცვლილებები განიცადა ეროვნულმა სატყეო სააგენტომაც. 2010-2012 წლებში ჩვენ გადაგვიყვანეს ენერგეტიკის სამინისტროს დაქვემდებარებაში. როდესაც დავბრუნდით გარემოს დაცვის სამინისტროს შემადგენლობაში, განახლდა მოლაპარაკებები გარემოს დაცვის პროგრამასთან და დავიწყეთ აღდგენის სამუშაოები”, _ ამბობს იორდანიშვილი.
მისივე თქმით, 250 000 ნერგი იყო დარგული, რომელთა უმეტესობა წელს ხანძრის შედეგად განადგურდა:
“2015 წლიდან, ტერიტორიაზე აღდგენის ღონისძიებებს ეროვნული სატყეო სააგენტო თავისი ბიუჯეტის სახსრებით ახორციელებდა, ყველაზე დიდ რესურსს კი, ჩვენ ვხარჯავთ ამ გაშენებული ნარგავების მოვლაში. დაახლოებით 108 ჰექტარი იყო გაშენებული, 250 000 ნერგი დარგული. წელს გაზაფხულზე შემოგვიერთდა საზოგადოებრივი კამპანია “აღადგინე” და ყველა მსურველს შეეძლო წვლილი შეეტანა ტყის აღდგენის პროცესში”, _ ამბობს ის.
ეროვნული სატყეო სააგენტოს უფროსის მოადგილის თქმით, კამპანია _ “აღადგინეს” ფარგლებში ნერგების დარგვა ქაოტურად არ ხდებოდა:
“ნერგების დარგვა ქაოტურად არ ხდება. ჩვენ კომპანია “ბიასთან” და კომპანია “სტარტაპ თრიფექსთან” გვქონდა გაფორმებული მემორანდუმი _ ისინი უკეთებდნენ ამ ღონისძიებებს ორგანიზებას. თუმცა, ნერგების დარგვა ხორციელდებოდა ჩვენს მიერ შემუშავებული პროექტით ანუ იმ სახეობის და სტანდარტის ნერგის დარგვა უნდა მომხდარიყო იმ ადგილზე, სადაც ეროვნული სატყეო სააგენტოს მეტყევეები იტყოდნენ. აქ არის ძალიან რთული სამუშაო პირობებია. რიგ ადგილებში მხოლოდ სიმბოლურად მოხდა ხეების დარგვა, დანარჩენი სამუშაოები კი კვალიფიციური მუშა ხელის მიერ გახორციელდა”, _ ამბობს იორდანიშვილი.
იორდანაშვილის თქმით, წელს მომხდარი ხანძრის შემდეგ პირველი ნაბიჯი ტერიტორიის სიღრმისეული შესწავლა იქნება:
“სამომავლოდ პირველი ნაბიჯები, მიმდინარე წლის 20-26 აგვისტოს ხანძრის შემდეგ, არის ტერიტორიის სიღრმისეული შესწავლა. ეს აუცილებლად უნდა გააკეთოს სხვადასხვაა დარგის ექსპერტებით დაკომპლექტებულმა ჯგუფმა, რომელშიც შევლენ გარემოს დაცვის სპეციალისტები, არასამთავრობო სექტორის წარმომადგენლები. გვყავს მოწვეული რამდენიმე საერთაშორისო ექსპერტიც, რომ დააკვირდნენ პროცესებს.
დიდი იმედი გვაქვს, რომ მიმდინარე წლის ოქტომბრის შუა რიცხვებში ჩვენ ამ ტერიტორიის შესახებ გვექნება დასკვნა მიყენებული ზიანის შესახებ და ასევე ქმედითი ღონისძიებების სამოქმედო გეგმა. რიგი ღონისძიებების გახორციელებას ამ შემოდგომაზევე შევძლებთ. განსაკუთრებით ნიადაგის აღდგენის ნაწილში, ხოლო ტყის აღდგენას სავარაუდოდ მომავალი წლიდან დავიწყებთ”, _ ამბობს იორდანიშვილი.
“გურია ნიუსი” ბორჯომში კავკასიის გარემოსდაცვითი არასამთავრობო ორგანიზაცია CENN-ის მედიატურის ფარგლებში იმყოფებოდა. გთავაზობთ კადრებს ნახანძრალი ტერიტორიიდან.
