კითხვა _ თუ როდის დაიწყება ლანჩხუთის მუნიციპალიტეტის სოფელ აკეთის ცენტრალური გზის მშენებლობა, რომელიც ერთმანეთთან ლანჩხუთის, ჩოხატაურისა და ოზურგეთის მუნიციპალიტეტებს აკავშირებს, უკვე წლებია, აქტუალურია. აღნიშნულის თაობაზე ბევრჯერ ითქვა და ადგილობრივებმა ხელისუფლების წარმომადგენლებისგან ბევრჯერაც მიიღეს დაპირება პრობლემის მოგვარების თაობაზე, მაგრამ წლებია, პრობლემა მაინც მოუგვარებელი რჩება.
საქმე 12-კილომეტრიან გზის მონაკვეთს ეხება, რომელიც სოფელ შუხუთიდან აკეთის ცენტრალური გზას მოიცავს სოფელ ნაგომრამდე. მოსახლეობის თქმით, იმის გამო, რომ გზის აღნიშნულ მონაკვეთზე ტრანსპორტით გადაადგილება დიდ სირთულეს წარმოადგენს, ხშირ შემთხვევაში, სოფელ აცანიდან შემოვლითი გზით უწევთ სარგებლობა, რომ მუნიციპალიტეტის ცენტრამდე ჩავიდნენ.
მოსახლეობისვე ინფორმაციით, ჰქონდათ იმედი, რომ სოფლის მთავარი გზის მოწესრიგება 2020 წელს დაიწყებოდა, თუმცა, სამწუხაროდ, მათი ეს მოლოდინი არ გამართლდა.
როგორც ადგილობრივები ამბობენ, სოფლის ცენტრალურ გზაზე მსუბუქი ავტომანქანებისთვის გადაადგილება განსაკუთრებით მას შემდეგ გახდა შეუძლებელი, რაც ავტობანის მშენებლობისას ინერტული მასის გასატანად, ჩინური კომპანიის კუთვნილმა ავტომანქანებმა დაიწყეს ამ გზაზე მოძრაობა.
აღსანიშნავია ისიც, რომ სამი მუნიციპალიტეტის დამაკავშირებელი გზა, სოფელ ზემო აკეთიდან ყველაზე უმოკლესი იქნება ამ მიმართულებით. ასევე, უმოკლესი მანძილია ლანჩხუთიდან კურორტ ბახმარომდე. ამ გზის მშენებლობას მრავალი წელია ელოდება სოფელ აკეთის თემში შემავალი ოთხი სოფლის მოსახლეობა.
“ეს უმოკლესი გზაა, რომელიც ლანჩხუთს მეზობელ ჩოხატაურსა და კურორტ ბახმაროსთან აკავშირებს, ამიტომ განსაკუთრებული დატვირთვა ზაფხულობით აქვს. 2020 წელს გვქონდა მოლოდინი, რომ ხელისუფლების მხრიდან ჩვენთვის მოცემული პირობა შესრულდებოდა და გზის რეაბილიტაცია დაიწყებოდა, მაგრამ არაფერი არ გაკეთებულა. მუნიციპალიტეტის პირველი პირებისგან მხოლოდ ის გვესმის, რომ გზის მშენებლობა დღის წესრიგშია, რაღაც სავარაუდო ვადებსაც ასახელებენ, მაგრამ კონკრეტული ჯერ კიდევ არაფერია.
ისედაც დაცლილია მოსახლეობისგან აკეთი, გზის არარსებობა კი უფრო ამძაფრებს მდგომარეობას და დღითიდღე იცლება აქაურობა. ამ თოვლსა და ტალახში კი არა, მზიან ამინდშიც კი მსუბუქი მანქანებისთვის აქ გავლა შეუძლებელი ხდება. მცირედი წვიმის დროსაც კი ტალახითა და ლაფით იფარება აქაურობა, რის გამოც მსუბუქი ავტომანქანები მხოლოდ შემოვლით, აცანის გზით გადაადგილდებიან. ეს პრობლემა, გზის ამ მონაკვეთზე, ჩინური კომპანიის კუთვნილი, მძიმეწონიანი ავტომანქანების მოძრაობამ უფრო გაამძაფრა. თუ ასე გაგრძელდა, მალე ალბათ, ტრანსპორტი საერთოდ ვეღარ შეძლებს აქ გავლას.
სოფლის ცენტრალური გზა ახლა ყველა აკეთელის ოცნებაა, დაპირებებს ვეღარ ავუდივართ შედეგი კი არ ჩანს.
მთავარი ისაა, რომ სოფელს ყველაზე მეტად ცენტრალური გზის პრობლემა აწუხებს, რომ არაფერი ვთქვათ შიდა გზებზე. ბოლოს და ბოლოს, რა ქვეყანა დაიქცევა, ეს გზაც რომ გაკეთდეს?! პატრონი არა ჰყავს ამ ჩვენს სოფელს, თორემ ყველა სოფელში კეთდება გზა და აქ რით ვერ გაკეთდა?! მართლაც, რამდენი წელია, გვპირდებიან გზის გაკეთებას და საქმე არ ჩანს!” _ ამბობენ ადგილობრივები და სოფლისა და მუნიციპალიტეტის ხელმძღვანელობისგან მეტ ყურადღებას ითხოვენ
აკეთის ცენტრალური გზის მოწესრიგების თაობაზე საკითხი, ლანჩხუთის საკრებულოს ბოლო სხდომაზე ოპოზიციამაც გააჟღერა: “მაინტერესებს, როდის გაკეთდება აკეთში, სოფელ შუხუთიდან ე. წ. აკაკის ხიდამდე გზა. ხალხი უკვე სახლში მისვლას ვეღარ ახერხებს, თქვენ კი ცხრა წელია ტყუილ დაპირებებს აძლევთ. მილიონობით ლარის ინერტული მასალაა წამოღებული სოფლიდან, სანაცვლოდ კი მიუგდეთ სრულიად გაუბედურებული გზა. პირდებით ხალხს, რომ გზას გაგიკეთებთო, მაგრამ დღესაც არაფერი ჩანს. ამ დიდთოვლობაზე, პრაქტიკულად, შეუძლებელი იყო აკეთის გზაზე გადაადგილება. გამეცით პასუხი _ 2022 წელს გაკეთდება თუ არა ეს გზა?” _ კითხვით მიმართა ენმ-ის წარმომადგენელმა კახა ასკურავამ სოფლის მაჟორიტარს ემზარ თევდორაძეს.
როგორც მმართველი ძალის პასუხიდან გაირკვა, აკეთის გზის მშენებლობასთან დაკავშირებით ტენდერი გამოცხადებული ჯერ არაა, მიმდინარეობს მოსამზადებელი სამუშაოები. პროექტის ღირებულება 10 მილიონი ლარი იქნება და ის 2022-23 წლებში გახორციელდება.
“ამ გზის მშენებლობისთვის ჯამში 10 მილიონ ლარამდე უნდა დაიხარჯოს. ამ წელს დაიდება პროექტის სახით. ფაქტია, რომ 10 მილიონი ღირებულების სამუშაოები ხუთ თვეში ვერ შესრულდება”, _ თქვა ემზარ თევდორაძემ.
მერის პირველი მოადგილის, ბიძინა იმნაიშვილის განმარტებით, სამშენებლო სამუშაოები მიმდინარე წლის მაისში უნდა დაიწყოს და მას საავტომობილო გზების დეპარტამენტი განახორციელებს.
“აკეთის ცენტრალური გზის მშენებლობა, როგორც სოფელ ნაგომრის, ისე ვან-ზომლეთის მიმართულებით, 2022-2023 წლებში გახორციელდება. პროექტი გარდამავალი იქნება, თანხა დიდია და ერთ წელში ვერ მოხდება მისი ათვისება. თან ამ ყველაფერს წინ მოსამზადებელი სამუშაოები უძღვის. ეს იქნება სახელმწიფო მნიშვნელობის გზა და მის მშენებლობას გზების დეპარტამენტი განახორციელებს”, _ განმარტა იმნაიშვილმა.
“აღდგომა და ხვალეო” _ აკეთის მოსახლეობა ხელისუფლების მხრიდან მიღებული კიდევ ერთი დაპირების შესრულების მოლოდინშია.
[sexy_author_bio]
