ოზურგეთის მუნიციპალიტეტის , სოფელ ნაგომარში, 2021 წელს მომხდარი ხანძრის შედეგად, ადმინისტრაციული შენობა დაიწვა, სადაც განთავსებული იყო ასევე საბავშვო ბაღი და ამბულატორია. მას შემდეგ ადგილობრივები, როგორც სკოლამდელი ასაკის მშობლები გვწერენ და გვიკავშირდებიან, მოუთმენლად ელოდებიან ახალგარემონტებული შენობაში საბავშვო ბაღის კვლავ გახსნას.
_რომ გვეგონა, საშველი გახდა, ახლა ისევ გადაიდო ჩვენი ბაღის გახსნა. ჯერ რემონტი იყო, რეაბილიტაციის პროცესი, როგორც იქნა, დასრულდა. ახლა იძახიან, ინვენტარი შეგვაქვსო. რით ვერ შეიტანეს? _ გვწერენ ნაგომარში მცხოვრები პატარების მშობლები.
ისინი აზუსტებენ, რომ მესამე წელია, დაპირების იმედად არიან. ეგონათ, რომ ახალი წლიდან, დაპირების თანახმად, ბაღი გაიხსნებოდა და მაინც ჭიანურდება პროცესი.
ასევე ამბობენ, რომ აღნიშნული შენობის მხოლოდ პირველი სართულის რეაბილიტაცია დასრულდა. სრულიად შემოუღობავია ეზო, რაც გაზაფხულიდან განსაკუთრებით აუცილებელია, რადგან ბავშვებს ეზოში გასვლა, თამაში და სუფთა ჰაერზე სეირნობა სჭირდებათ.
ა(ა)იპ ოზურგეთის სკოლამდელი აღზრდის ცენტრის უფროსი მაკა ჭყონია, „გურია ნიუსთან“ აცხადებს, რომ მაქსიმუმ 20 თებერვლამდე მოხდება ნაგომრის საბავშვო ბაღის გახსნა.
_ჩვენ ყველაზე მეტად გვინდა, საბავშვო ბაღმა ფუნქციონირება დაიწყოს. დასრულდა რემონტი. ახლა შეგვაქვს ინვენტარი. მალე დასრულდება შეტანაც და 15 თებერვლისთვის, მაქსიმუმ 20 თებერვლის ჩათვლით, გაიხსნება, _ გვითხრა მან.
ჩვენ ასევე ვესაუბრეთ ოზურგეთის მუნიციპალიტეტის მერის წარმომადგენელს სოფელ ნაგომარში, მიხეილ ცქიტიშვილს.
_ორ ეტაპიანი ტენდერის თანახმად, ჯერ პირველი დასრულდა, რაც ნაგომრის ადმინისტრაციული შენობის პირველი სართულის რეაბილიტაციას გულისხმობს. აქ საბავშვო ბაღის ფუნქციონირება მალე დაიწყება. ახლა შეაქვთ ინვენტარი. ალბათ, 20 თებერვლისთვის გაიხსნება, _ გვითხრა მიხეილ ცქიტიშვილმა.
მან ასევე დააზუსტა, რომ ტენდერის მეორე ნაწილის სამუშაოები მალე გახორციელდება და გარემონტდება შენობის მეორე სართული. ასევე მოხდდება ეზოს შემოღობვა.
„გურია ნიუსი“ თვალს მიადევნებს აღნიშნულ პროცესს.
ავტორი
