სუფსა-წყალწმინდის დამაკავშირებელი გზის რეაბილიტაციას, უკვე წლებია, ითხოვს ადგილობრივი მოსახლეობა. ამასთან დაკავშირებით მათ არაერთხელ გამართეს აქცია და მხარისა თუ მუნიციპალიტეტის პირველი პირებისგანაც მიიღეს საკითხის დადებითად გადაწყვეტის პირობა, თუმცა, პრობლემა ამ დრომდე მოუგვარებელია. ადგილობრივებს უკვე რამდენი წელია, დაპირება ესმით, მაგრამ რეალურ ქმედებამდე საქმე არც მისულა.
“ისედაც უიმედო სოფლის მოსახლეობას ისევ ტყუილები, ტყუილები და ცრუ დაპირებები გვესმის, სამწუხაროდ. ამდენი წელია, დაპირების მეტი არაფერი მიგვიღია, ეს არის ხალხის დაცინვა, მაგრამ სასაცილოები თავადვე არიან, რობოტებივით ერთსა და იმავეს რომ იმეორებენ”, _ ამბობს მოსახლეობა.
ჯერ კიდევ 2020 წელს მოსახლეობის მიერ გამართულ აქციაზე მუნიციპალიტეტის ხელმძღვანელობისგან ითქვა, რომ მზად იყვნენ, ინფრასტრუქტურის სამინისტროსგან მილიონი ლარი მიეღოთ და არსებული გზის გარკვეული მონაკვეთზე ასფალტის თხელი ფენა გადაეგოთ მანამ, სანამდე გაწვდება ეს თანხა. თუმცა, მაშინ შეხვედრაზე მობრძანებულმა მხარის მაშინდელმა გუბერნატორმა ზურაბ ნასარაიამ უფრო დიდ მასშტაბებზე გააკეთა აქცენტი და ხალხს დაპირდა, რომ გზების დეპარტამენტის თანხებით მთლიანად გახორციელდება სუფსა-წყალწმინდის ხუთ კილომეტრიანი გზის აღდგენა მას შემდეგ, რაც მოხდება შესაბამისი საპროექტო თანხების მოძიება და ტენდერში გამარჯვებული კომპანიის მიერ სამუშაოების 2020 წელსვე დაწყება.
თუმცა, ფაქტია, რომ ეს პირობა ვერ შესრულდა და გზა ამ მონაკვეთზე კვლავაც მოუწესრიგებელია. სწორედ ამ საკითხზე გაამახვილა ყურადღება ღრმაღელის ადმინისტრაციული ერთეულის წარმომადგენელმა ლანჩხუთის საკრებულოში კახა თედორაძემ და მუნიციპალიტეტის პირველ პირს, ალექსანდრე სარიშვილს კითხვით მიმართა, თუ როდის ეშველებოდა სუფსა-წყალწმინდის დამაკავშირებელ გზის მონაკვეთს.
თედორაძის პასუხად ლანჩხუთის მერმა განმარტა, რომ ამ ეტაპზე პროექტის ხარვეზების გამოსწორება მიმდინარეობს.
“მიმდინარეობს პროექტის ხარვეზების გამოსწორება, გზების დეპარტამენტიც ჩართულია ამ საქმეში. ჩვენ პროექტის ავტორთანაც გვქონდა საუბარი, ადგილზე მოხდა შენიშვნების გავლა. მაქსიმუმ, ორი კვირა დააგვიანდება პროექტის ჩასწორებას. ვფიქრობ, რომ აპრილის ბოლოსთვის შესაძლებელი იქნება ტენდერის გამოცხადება”, _ პირობა გასცა ალექსანდრე სარიშვილმა.
საგულისხმოა ისიც, რომ გზების დეპარტამენტი ითხოვს ეს გზა შიდა მნიშვნელობის სტატუსის გახდეს და ადგილობრივი ხელისუფლების სატკივარი იყოს. თავის მხრივ, ადგილობრივი მთავრობა ცდილობს არსებული 5კმ-იანი მონაკვეთი ისევ ცენტრალური მნიშვნელობის დარჩეს, როგორც სარეზერვო მონაკვეთი და ამ შემთხვევაში მისი აღდგენა უკვე დეპარტამენტის ვალდებულება იქნება.
