ოზურგეთის მუნიციპალიტეტის მერიის ფეისბუქგვერდზე ოზურგეთის მუნიციპალიტეტის მერის ავთანდილ თალაკვაძის მიმართვა განთავსდა.
მერის განცხადებით, ამიერიდან სამუშაო სხდომები და საკითხები, რომელსაც განიხილავენ, ინტერნეტ მედიითაც გადაიცემა და მოქალაქეებს ექნებათ საშუალება, თვალი ადევნონ, თუ რა საკითხები გამოდის მერიის სხდომებზე, რა დავალებები გაიცემა და რა იგეგმება ოზურგეთში.
ავთანდილ თალაკვაძემ, ოზურგეთის მუნიციპალიტეტის მერიის სხდომაზე 16 პროექტი წარადგინა, რომელიც წყალმომარაგების ახალ სისტემებს, საცხოვრისი პირობების გაუმჯობესებას, გზების კაპიტალურ რეაბილიტაციას და სოციალური ინფრასტრუქტურის მშენებლობას ეხება.
ავთანდილ თალაკვაძე: „დასრულდება ზემო ნატანების წყალმომარაგების ქსელის მშენებლობა – სტაბილური წყალმომარაგებით ისარგებლებს 700 ოჯახი. ასევე, წვერმაღალას და ზემო ურეკის წყალმომარაგების ქსელის მშენებლობა, სადაც სტაბილური წყალმომარაგებით 400 ოჯახი ისარგებლებს. იწყება ცხემლისხიდის, დვაბზუს და მშვიდობაურის წყალმომარაგების ქსელის მშენებლობა – წყალმომარაგებით ისარგებლებს 1200 ოჯახი. ასევე იწყება ქალაქ ოზურგეთის წყალმომარაგების ქსელის მასშტაბური სარეაბილიტაციო სამუშაოები და გამრიცხველიანება. პროექტირების პერიოდი არის 8 თვე, მშენებლობის პერიოდი 18 თვე, დასრულების სავარაუდო თარიღი 2024 წლის მაისი. პროექტის სავარაუდო ღირებულება 7 500 00 ლარი. პროექტის დასრულების შემდეგ ქალაქ ოზურგეთის მოსახლეობა სრულად იქნება უზრუნველყოფილი 24 საათიანი წყალმომარაგებით. სოფელ ლიხაურში დავასრულებთ ე.წ. ოქროს მუხუროს უბანში წყლის სისტემის მშენებლობას – ჯამში დაიხარჯება 274 174 ლარი; ძიმითში ასევე დავასრულებთ ე.წ. ნასაკირალის უბანში წყლის სისტემის მშენებლობას, რისთვისაც დაიხარჯება 52 146 ლარი,”- ამის შესახებ ოზურგეთის მერმა, ავთანდილ თალაკვაძემ განაცხადა.
ვიდეოს გავრცელებიდან რამდენი წუთში სამოქალაქო აქტივისტის, სოფელ ლიხაურში მცხოვრები ირმა გორდელაძის პასუხი გავრცელდა ფეისბუქგვერდზე.
“ბიუჯეტდამტკიცებული პროექტი გაუქმებულია? ეს სოფლები არაა ხომ პრესტიჟული? ორი სოფლის ლიხაურისა და მაკვანეთის დამაკავშირებელი
ვითომ გზას ხედავთ ფოტოებზე. ეს სურათია რამდენიმე კმ-ზე.
5 კილომეტრის მანძილზე (ლიხაური- მაკვანეთი) ასეთი გზის ნაპირას მცხოვრები მოსახლეობა უკვე მეორედ გადააგდეს.
წლების წინ…არხები გაიჭრა, გზა უნდა დაგებულიყო და სხვა ადგილზე დააგეს.
შარშან, როგორც იქნა, პროექტი შედგა, საკრებულომ მიიღო, ბიუჯეტიდან თანხაც გამოიყო 1.5 მლ. ლარი.
მანამდე “ოქროს მუხუროს” ახალი წყალგაყვანილობის სისტემის პროექტის განხორციელება დაიწყო. ძველი ამორტიზირებულია და გზის დაგებას აზრი ეკარგებოდა.
წყალგაყვანილობის პროექტი შეჩერდა 6 თვეა და დაასრულებენ.
მაგრამ გზა არ იგება. კვლავ მოატყუეს ორი სოფლის მცხოვრებნი.
ეს არის მოსახლეობის ადგება!
რატომ არაა ეს ორი სოფელი პრიორიტეტული?
წინასაარჩევნოდ, ოქტომბრის ბოლოს ორივე მერმა: ჩოხატაურის და ოზურგეთის, კანდიდატები იყვნენ მაშინ, მშვენივრად იქეიფეს “ოქროს მუხუროში” მოსახლეობასთან…
მაშინაც უნდა დაგენახათ გზა და ხალხმა ხმა რომ მოგცათ…დაგავიწყდათ? მე არ მავიწყდება! ეს საკითხი ასე არ დასრულდება“, _ კითხულობს ირმა გორდელაძე.
“გურია ნიუსი“ ამ საკითხთან დაკავშირებით დაუკავშირდა ოზურგეთის მუნიციპალიტეტის მერიის პრესსამსახურს და ველოდებით მისგან ინფორმაციას. მანამდე კი სოციალურ ქსელში ოზურგეთის მუნიციპალიტეტის საკრებულოს წევრმა ბექა თოიძემ შემდეგი სახის ინფორმაცია გაავრცელა:
“მაკვანეთი-ლიხაურის დამაკავშირებელ გზასთან დაკავშირებით ვრცელდება გადაუმოწმებელი ინფორმაცია. გაუგებარი და საწყენია, როცა გადაუმოწმებლად ამას ავრცელებენ და მითუმეტეს, სოფლის მოსახლეობას პანიკის და პროტესტისკენ მოუწოდებენ უსაფუძვლოდ. ეს მავნებლობაა.
პროექტი არ გაუქმებულა და ჩვენ მას დაგეგმილი გრაფიკით განვახორციელებთ. ჯერ გაკეთდება წყლის სისტემა და შემდგომ განხორციელდება გზის პროექტი“,_ წერს ბექა თოიძე.
“გურია ნიუსი“ დაუკავშირდა ბექა თოიძეს და ჰკითხა, დაიწყება თუ არა გზის მშენებლობის სამუშაოების 2022 წელს.
ბექა თოიძე: როგორც დასრულდება წყლის პროექტის გახორციელება, დაიწყება გზის პროექტი. გზის სამუშაოები დაიწყება 2022 წელს. უფრო ვრცლად მოგვიანებით გავაკეთებთ განცხადებას“, _ აღნიშნა ჩვენთან საუბრის დროს ბექა თოიძემ.
ოზურგეთის მუნიციპალიტეტის მერიის პრესსამსახურში კი ამ საკითხთან დაკავშირებით ასეთი კომენტარი გააკეთეს:
„ლიხაური-მაკვანეთის დამაკავშირებელი გზის რეაბილიტაციის პროექტი არ გაუქმებულა. ჯერ მოწესრიგდება წყლის სისტემა და შემდეგ განხორციელდება გზის პროექტი, რასაც ოზურგეთის მერია დაგეგმილი გრაფიკით განახორციელებს. გავრცელებული ინფორმაცია არის დეზინფორმაცია და არ შეესაბამება სიმართლეს.“
