3 აგვისტოს, ჩოხატაურში სოფელ შუა ამაღლებაში, შუა ამაღლებლობის დღესასწაული აღინიშნა.
როგორც მერის წარმომადგენელმა ბელა შათირიშვილმა “გურია ნიუსს” განუცხადა, დღესასწაულს საფუძველი წელს ჩაეყარა და ყოველ წელს აღინიშნება.
ღონისძიების ფარგლებში არაერთი შეჯიბრი ჩატარდა.
ჭიდაობაში ჩატარებული შეჯიბრის გამარჯვებული 9 წლის საბა სიხარულიძე გახდა.
“ჭიდაობაზე არ დავდივარ. თბილისიდან ვართ სტუმრად ჩამოსული, წარმოშობით აქედან ვართ”,_ გვითხრა საბამ.
სახალისო სახის შეჯიბრები ჩატარდა საზამთროს ჭამასა და ლუდის დალევაში.
ლუდის დალევაში გამართულ შეჯიბრში გამარჯვებული კაკო ჯიბლაძე გახდა. მას საჩუქრად ენერგეტიკულები გადაეცა.
საზამთროს სწრაფად ჭამაში გამარჯვებული ლაშა ქამადაძე კი საზამთროთი დაასაჩუქრეს.
ღონისძიებისთვის განკუთვნილ ტერიტორიაზე წარმოდგენილი იყო სოფლის ეზოც. ჩატარდა კულტურული ღონისძიებაც, სადაც იუმორისტული სახის და მუსიკალური ნომრები იყო წარმოდგენილი. ღონისძიების დასაწყისში კი გაიხსენეს და პატივი მიაგეს გუდაურში, ვერტმფრენის ჩამოვარდნის შედეგად დაღუპულთ. შეგახსენებთ, რომ 29 ივლისს, გუდაურის მიმდებარე ტერიტორიაზე, პარაპლანით ფრენისას ჩამოვარდნილი ორი პირის სამაშველო ოპერაციაში მონაწილე სასაზღვრო პოლიციის კუთვნილმა ვერტმფრენმა მართვა დაკარგა, ჩამოვარდა და აფეთქდა. დაიღუპა ვერტმფრენის ბორტზე მყოფი 8-ვე პირი, რომელთა შორის ეკიპაჟის 4 წევრი, შსს-ს საგანგებო სიტუაციების მართვის სამსახურის 2 მაშველი და ჯანდაცვის სამინისტროს საგანგებო სიტუაციების კოორდინაციისა და გადაუდებელი დახმარების ცენტრის 2 მედიკოსია. ამასთან გარდაიცვალა უცხოელი პარაპლანისტიც. გადარჩა მხოლოდ ქართველი პარაპლანისტი.
დარბაზში მყოფთ სიტყვით მიმართა მუნიციპალიტეტის მერმა დავით შარაშიძემ. მერის განცხადებით, მსგავსი ღონისძიებები ყველა სოფელში ჩატარდება.
“რაც პანდემია მძვინვარებდა, ჩვენს ქვეყანაში საზოგადოება ძალიან მოაკლდა კულტურულ ღონისძიებებს. ერთად შევიკრიბეთ, დავგეგმეთ და გვინდა რომ ყველა სოფელში მსგავსი სახის ღონისძიება შევთავაზოთ ჩვენს ჩოხატაურელებს. ვფიქრობთ, ეს მისასალმებელია ახალგაზრდების საზოგადოებაში უკეთ ადაპტაციისთვის, სოფლის გამოღვიძებისთვის”,_ განაცხადა შარაშიძემ და დარბაზში შეკრებილებს სოფელში მიმდინარე ინფრასტრუქტურული სამუშაოები გააცნო. მერმა ყურადღება სამომავლო გეგმებზეც გაამახვილა, რითაც მიიჩნევს, რომ არსებული პრობლემების გადაჭრა უნდა მოხდეს.
მერის განცხადებით, უდაბნოს გზის პროექტი, რომელიც რამდენიმე დღეში უნდა დასრულდეს, რის შედაგადაც იქნება ერთ-ერთი მაგარი ადგილი და სავიზიტო ბარათი ჩოხატაურისთვის.
“კვლავ პრობლემად რჩება წყალმომარაგება. 2023 წლიდან საქართველოში იწყება მასშტაბური წყალმომარაგების პროექტი და ამ კუთხით ჩვენ ვფიქრობთ, რომ გურია იყოს მოწინავე პოზიციაზე და პირველ რიგში დავაპროექტებთ, შევისწავლით სად რა წყალია, სოფლის უხუცესებს ეკითხებიან, გეოლოგები ჩამოვლენ და ამის მიხედვით გავაკეთებთ ჩოხატაურის მთლიან წყალმომარაგებას, რომელიც დაიწყება შემდეგი წლიდან.
კიდევ ერთ მნიშვნელოვან სიახლეა ის, რომ ნებისმიერი ბიუჯეტის დაგეგმვა მოხდება საზოგადოების ინტერესებიდან გამომდინარე. სოფლის ხელმძვანელობა, საკრებულოს წარმომადგენლები, მერიის თანამშრომლები, შეიძლება გუბერნატორიც, შევიკრიბებით და დავგეგმავთ, რა არის იმ წელს იმ სოფლისთვის მნიშვნელოვანი. საჯარო მოხელეს არ უნდა დაავიწყდეს არასდროს რომ ის არის ხალხის არჩეული, ხალხმა მასზე იმედები დაამყარა და ეს იმედები არასოდეს უნდა გააცრუოს. ეს არის ჩვენი მთავარი ამოცანა. ბევრი პრობლემა შეგვხვდა არამარტო შუა ამაღლებაში, არამედ მთელ ჩოხატაურში, მაგრამ სწორი განაწილებით, ვფიქრობთ, რომ ამ ძირითად საკითხებს გადავჭრით”,_ განაცხადა დავით შარაშიძემ.
დარბაზში შეკრებილებს სიტყვით მიმართა დეპუტატმა კაკო ყაჭეიშვილმაც. მან მონაწილეებს მადლობა გადაუხადა.
თუმცა შუამაღლებლობა მარტო ამით არ შემოფარგლულა და სოფლის რამდენიმე გამორჩეული ადამიანიც დააჯილდოვეს.
დაჯიდლოებულებს შორის არის მრავალშვილიანი, 4 შვილის დედა, ქეთევან ქამადაძე. ღვაწლმოსილი პედაგოგი, ლანდა ნიკოლეიშვილი, რომელმაც 50 წელზე მეტი იმოღვაწევა შუა ამაღლების საჯარო სკოლაში და მრავალი თაობები აღზარდა. სოფლის უხუცესი ქალბატონი, ზინა დოლიძე, რომელიც არის 95 წლის ამ მომენტისთვის. ხშირად მუშაობდა ჩაიში, გამოირჩეოდა საუკეთესო აქტივობებით. ჰყავს საუკეთესო შვილები. ერთი სოფლის ვეტერინარი, მეორე სამხედრო პიროვნებაა. ომის ვეტერანის ქვრივია. მეორე ქალბატონი, რაისა ჯიბუტი. ესეც 95 წლის არის. 4 შვილის დედაა, ომის ვეტერანის ქვრივი.
როგორც მერის წარმომადგენელმა გვითხრა, ღვაწლმოსილი პედაგოგის ნომინაციაში კიდევ ოთარ დოლიძე იყო ჩასმული, მაგრამ სამწუხაროდ, მისი დაჯილდოება ვერ მოხერხდა. ამის მიზეზი კი მოულოდნელად მისი გარდაცვალება გახდა.
ავტორი
