ბოლო რამდენიმე დღის ევროპული საფეხბურთო ამბების ძირითადი თემა კრიშტიანო რონალდუსა და კილიან მბაპეს მოსალოდნელი ტრანსფერები გახლდათ. პირველმა ახალი ნავსაყუდელი უკვე მოძებნა, მეორის ბედი კი კვლავ გაურკვეველია.
ცნობილი იყო, რომ რონალდუს კარიერა “მანჩესტერ სიტიში” უნდა გაეგრძელებინა, მაგრამ ყველაფერი თავდაყირა დადგა _ პეპ გვარდიოლას გუნდმა პორტუგალიელის აყვანაზე ბოლო წამს ოფიციალურად უარი განაცხადა. ამ დროს კრიშტიანოს მშველელად ყოფილი კლუბი _ “მანჩესტერ იუნაიტედი” მოევლინა, რომელთა რიგებშიც 2003-2009 წლებში ასპარეზობდა.
“ვარსკვლავთბიჭუნას” თავდაპირველად “იუნაიტედში” მოთამაშე თანამემამულე ბრუნო ფერნანდეშმა დაურეკა, მოგვიანებით კი “იუნაიტედის” ლეგენდარული მწვრთნელი, თვით სერ ალექს ფერგიუსონიც ესაუბრა. გენიოს შოტლანდიელთან რონალდუს დღემდე ჩინებული ურთიერთობა გააჩნია და მის თითოეულ სიტყვას უდიდეს პატივს სცემს. მათი მოლაპარაკების შემდეგ, “მანჩესტერ იუნაიტედის” კიდევ ერთმა ლეგენდა რიო ფერდინანდმა შემდეგი განაცხადა:
“სერ ალექსმა რონალდუს ტრანსფერში უდიდესი როლი ითამაშა. კრიშტიანუს მასთან განსაკუთრებული ურთიერთობა აკავშირებს. ასეთი კავშირი მხოლოდ გამორჩეულ ფეხბურთელს და მწვრთნელს შეიძლება ჰქონდეს. სერ ალექსის ზარი რომ არა, რონალდუ “მანჩესტერ იუნაიტედში” არ გადავიდოდა”.
ფერგიუსონის სატელეფონო ზარის შემდეგ მოვლენები ელვის სისწრაფით განვითარდა. სულ რამდენიმე საათში, “იუვენტუსმა” და ბრიტანულმა გუნდმა საერთო ენა გამონახეს და პორტუგალიელმაც ყოფილ გუნდთან ორწლიანი ხელშეკრულება გააფორმა. “მანჩესტერ იუნაიტედში” მის “ახალ დებიუტს 11 სექტემბერს, “ნიუკასლთან” შეხვედრაში უნდა ველოდოთ. საინტერესოა, რომ რონალდუ კვლავ შვიდნომრიანი მაისურით იასპარეზებს, რომელიც “იუნაიტედში” მოასპარეზე ურუგვაელმა ედინსონ კავანიმ დიდსულოვნად დაუთმო.
ამასობაში ლიდერის გარეშე დარჩენილმა “იუვენტუსმა” იტალიის პირველობის მეორე ტურში, საკუთარ მოედანზე სენსაციურად წააგო “ემპოლისთან”. დღის წესრიგში “ბებერი ქალბატონის” სასწრაფო წესით გაძლიერების საკითხი დადგა, სატრანსფერო ფანჯარა კი 31 აგვისტოს იწურება. ბოლო ცნობით “იუვე” “პარი სენ-ჟერმენთან” მოლაპარაკებას აწარმოებს და პარიზულ გუნდში მოასპარეზე არგენტინელი მარიო იკარდის თავისთან გადაყვანას ლამობს.
მილანის “ინტერის” ყოფილი თავდამსხმელის იტალიაში დაბრუნება უპირველეს ყოვლისა, კილიან მბაპეს მომავალზეა დამოკიდებული. რამდენი დღის წინ “პსჟ”-მ და “რეალმა” მის შესახებ თითქოს საბოლოოდ მოილაპარაკეს და შაბათს მბაპე სამედიცინო შემოწმების გავლისთვის მადრიდში უნდა ჩაფრენილიყო. ამის ნაცვლად ფეხბურთელმა კვირას, “რეიმსთან” შეხვედრაში, “პარი სენ-ჟერმენის” მაისური მოირგო. აღმოჩნდა რომ ესპანურ-ფრანგული მოლაპარაკებები დღემდე გრძელდება და მხარეები საბოლოო შეთანხმებამდე ჯერ ვერ მიდიან. ცეცხლზე ნავთი “პსჟ”-ს მთავარმა მწვრთნელმა მაურისიო პოჩეტინომაც დაასხა: “მბაპე მელაპარაკა და არსად წასვლა აღარ უნდა”, _ განაცხადა არგენტინელმა. თუ მბაპე კლუბს შეიცვლის, იკარდი პარიზში დარჩება, წინააღმდეგ შემთხვევაში კი “იუვენტუსში” გადაბარგდება.
კვირას ლეო მესის “პსჟ”-ში ოფიციალური დებიუტი ჰქონდა _ იგი “რეიმსთან” შეხვედრის 66-ე წუთზე გამოჩნდა მინდორზე და ბრაზილიელი ნეიმარი შეცვალა. დროის მცირე მონაკვეთში თავის გამოჩენა ვერ მოსწრო, მაგრამ მატჩის დასრულების შემდეგ ყურადღების არეალში მაინც მოექცა. ნამატჩევს მესი თანაგუნდელ კეილორ ნავასთან ერთად საუბრობდა, როდესაც მასთან მეტოქე გუნდის მეკარე პრედრაგ რაიკოვიჩი მივიდა და სთხოვა, თავის შვილთან ერთად სურათი გადაეღო. ლეომ უარი არ უთხრა, ბავშვი ხელში დაიჭირა, ხოლო რაიკოვიჩმა სურათი გადაიღო.
მესი, რონალდო, მბაპე, იკარდი _ საინტერესოა ამ მოთამაშეების შესახებ უახლოესი ინფორმაციების გაგება, მაგრამ ქართველებისათვის მიმდინარე ევროპული საფეხბურთო “უიქ-ენდის” უმთავრესი თემა მაინც ესპანური “ვალენსია” და გიორგი მამარდაშვილი გახლდათ.
“ვალენსიამ” ბასკურ “ალავესს” უმასპინძლა და დიდი ანგარიშით _ 3:0 იმარჯვა. ქართველი კვლავ გუნდის ძირითად შემადგენლობაში ვიხილეთ. შეხვედრის დასრულების შემდეგ ესპანური მასმედია მამარდაშვილის თემას კიდევ ერთხელ გამოეხმაურა.
Deportevalenciano: “მამარდაშვილი დამაჯერებლად თამაშობს. თუნდაც ბოლო შეხვედრა რომ ავიღოთ, ქართველმა შესანიშნავი “სეივი” შემოგვთავაზა. როცა მამარდაშვილი “ვალენსიას” შემადგენლობაში გამოჩნდა, მაშინ ძალიან ძნელი სავარაუდო გახლდათ, რომ ის ასე მოკლე ხანში გახდებოდა გუნდის ძირითადი მეკარე, მაგრამ ფეხბურთი იმიტომაც არის სპორტის გამორჩეული სახეობა, რომ ყველაფერს წინასწარ ვერ გათვლი. მხოლოდ და მხოლოდ ბედნიერების მიზეზი უნდა იყოს ის, რომ “ვალენსიას” ასეთი კარგი მეკარე ჰყავს. კონკურენცია ფეხბურთში ძალიან სასარგებლო რამაა და “ვალენსიას” ის ნამდვილად არ ავნებს.”
Lanetaneta.com: “ახალგაზრდა მეკარე, რომლის სიმაღლეც თითქმის 2 მეტრია, ხმაურით შემოიჭრა “ლა ლიგაში”. შეგვიძლია ვთქვათ, რომ პირველივე შეხვედრაში ის გახლდათ “ვალენსიას” გამარჯვების მთავარი “შემოქმედი”. ახლა კი გავიხსენოთ, თუ რა მოხდა გასულ პარასკევს _ მამარდაშვილმა მორიგი, ძალიან დამაჯერებელი მატჩი ჩაატარა “ალავესის” წინააღმდეგ. ერთი, რომ მას გოლი არ გაუშვია, ხოლო ერთ ეპიზოდში მართლაც რომ ურთულესი “სეივი” შემოგვთავაზა _ მაშინ, როცა “ვალენსიას” კარში გოლი თითქმის გარდაუვალი ჩანდა. თავიდან გეგმა ასეთი იყო: მამარდაშვილს უნდა ევარჯიშა პირველ გუნდთან და ეთამაშა მეორე გუნდში. ის მეოთხე იყო მეკარეების როტაციაში. მასზე წინ იდგნენ იესპერ სილესენი, ხაუმე დომენეკი და კრისტიან რივეროც კი, მაგრამ ახლა ყველა ვხედავთ, თუ რა სიტუაციაა. პირველი ორის ტრავმებმა მამარდაშვილს “ლა ლიგაში” დებიუტის შანსი მისცა და მან ეს შანსი მშვენივრად გამოიყენა”.
[sexy_author_bio]
