ქალაქ სოჭში რუსეთის პრეზიდენტი ვლადიმერ პუტინისა და გერმანიის კანცლერი ანგელა მერკელის შეხვედრა გაიმართა. რასაკვირველია, ამ მოლაპარაკების დიდი ნაწილი დახურულ კარებს მიღმა შედგა, თუმცა, მასმედიისთვის ცნობილი გახდა. რომ ორი ქვეყნის ლიდერებმა საუბრის ძირითადი დრო მსოფლიოში არსებულ საერთაშორისო მდგომარეობას დაუთმეს. მხარეები შეეხნენ ლიბიაში არსებულ სიტუაციას, განიხილეს უკრაინის პრობლემა. ცნობილი გახდა, რომ ორმხრივი შეთანხმებით სირიაში არსებული მდგომარეობა დღის პროგრამაში შეტანილი არ გახლდათ. რასაკვირველია, პრეზიდენტმა და კანცლერმა დიდი ყურადღება რუსეთ-გერმანიის ურთიერთობებსაც დაუთმეს.
ბოლო დროს ვლადიმერ პუტინს ისტორიულ სამშობლოში კრიტიკოსები მოუმრავლდა. ამისი ნათელი დამადასტურებელია ცოტახნის წინ რუსეთის მთელ რიგ ქალაქებში ჩატარებული მძლავრი ანტიკორუფციული სახის მანიფესტაციები. ამ ფონზე მოულოდნელიც კი არის რომ ბატონი ვლადიმერი თავის ქვეყანაში თურმე კვლავინდებურად მაღალი რეპუტაციით სარგებლობს.
რუსეთში მოქმედმა „ლავადა ცენტრმა“ ორი დღის წინ მოსახლეობაში სოციოლოგიური გამოკითხვა ჩაატარა. აღმოჩნდა, რომ რუსეთის მოსახლეობის 64 პროცენტს მომავალში ქვეყნის პრეზიდენტად კვლავ პუტინის ხილვა სურს. წინააღმდეგი მხოლოდ 22 პროცენტი აღმოჩნდა. საინტერესოა, რომ პუტინის შემდეგ „პოპულარობის რეიტინგში“ მოხვედრილმა გენადი ზიუგანოვმა და ვლადიმერ ჟირინოვსკიმ მხოლოდ სამ-სამი პროცენტი დააგროვეს. რუსეთში, ისევე, როგორც საქართველოში მომავალი საპრეზიდენტო არჩევნები 2018 წელს გაიმართება.
სააგენტო „Reuters”-ის მტკიცებით, გუშინ აშშ-ის პრეზიდენტ დონალდ ტრამპსა და ვლადიმერ პუტინს შორის მორიგი სატელეფონო საუბარი გაიმართა. ორი ქვეყნის პირველმა პირებმა სირიაში არსებული მდგომარეობა განიხილეს. საინტერესოა, რომ ეს მათი უკვე მესამე სატელეფონო საუბარია. პირველი მიმდინარე წლის იანვარში გაიმართა, მეორე კი აპრილის დასაწყისში. პუტინი და ტრამპი ერთმანეთის პირისპირ მიმდინარე წლის ივლისში, გერმანიის ქალაქ ჰამბურგში წარსდგებიან, სადაც „დიდ ოცეულში“ შემავალი ქვეყნების ლიდერების მორიგი შეხვედრა გაიმართება.
გამოცემა „Ruptly”-ის ცნობით, პირველ მაისს, აშშ-ის ქალაქ ვაშინგტონში დონალდ ტრამპის მოწინააღმდეგეთა მორიგი საპროტესტო მანიფესტაცია გაიმართა. ამ ღონისძიებაში მონაწილეობა რამდენიმე ასეულმა დემონსტრანტმა მიიღო, რომლებმაც ახალი საემიგრაციო კანონების წინააღმდეგ კიდევ ერთხელ გაილაშქრეს.
მსვლელობა „წყნარად“ და ექსცესების გარეშე წარიმართა. ვაშინგტონის პოლიციას საქმე პრაქტიკულად არ ჰქონია.
სანამ პუტინი და დონალდ ტრამპი ტელეფონით ერთმანეთში საუბრობდნენ და სირიის პრობლემებს იხილავდნენ, ესტონეთის პრემიერ მინისტრმა ტაავი რიივასმა რუსეთის აგრესიული საგარეო პოლიტიკის გამო დიდი შეშფოთება გამოხატა. ესტონური მასმედიის მტკიცებით, პრემიერ მინისტრი ბალტიისპირეთის საზღვრებთან რუსეთის შეიარაღებული ძალების გაზრდილი კონტინგენტის ყოფნით ფრიად შეშფოთებულია. ბატონი ტაავი მსოფლიო თანამეგობრობას მიმართავს და რუსეთის მხრიდან სავარაუდო საფრთხის შესახებ აფრთხილებს.
ნამდვილად ვერ გეტყვით ბალტიისპირეთის ქვეყნებს უახლოეს მომავალში რუსული აგრესია თუ ემუქრება. ამას დრო გვიჩვენებს. რადგან სიტყვამ ომი მოიტანა, წერილის დასასრულს ერთ საყურადღებო „ნიუსს“ გაგაცნობთ.
რუსული მასმედიის მტკიცებით, ცოტა ხნის წინ სანკტ-პეტერბურგის გუბერნატორმა პოლტავჩენკომ მოსალოდნელი ომის შემთხვევაში ქალაქის მოსახლეობის პურის მომარაგების შესახებ ბრძანებას ხელი მოაწერა. იმ შემთხვევაში თუ რუსეთი ომს დაიწყებს, სანკტ-პეტერბურგელები დღეში 300 გრამ პურს მიიღებენ. საინტერესოა, რომ ლენინგრადის ბლოკადის დღეებში, რომელიც 872 დღე გაგრძელდა, პურის ნორმა თითოეული ადამიანისთვის 125-800 გრამის ფარგლებში მერყეობდა.
საკითხავია, რა ისეთი უჭირს რუსეთის ეკონომიკას, რომ ფორსმაჟორულ მდგომარეობაში საკუთარი მოსახლეობისთვის დღეში მხოლოდ 300 გრამი პურის დარიგება შეუძლია. საინტერესოა ისიც, პუტინი ომს ვისთან იწყებს და ზემოთმოყვანილი ბრძანების მიღება რატომ დასჭირდათ.
