იურისტი და პოლიტიკოსი თამარ ჩუგოშვილი დიანა ტრაპაიძის “დღის ამბებში” საუბრისას, ამბობს, რომ წინ საკმაოდ რთული პროცესი გველის, რადგან საქართველოს კოალიციური მთავრობის შექმნის და ფორმირების გამოცდილება არ აქვს.
“წინ გველის საკმაოდ რთული პროცესი, რომლის გამოცდილებაც არ გვაქვს. წინ გველის კოალიციური უმრავლესობა. არ არის მარტივი კოალიციური მთავრობის შექმნა და ფორმირება. გამოცდილ ევროპულ ქვეყნებშიც კი, არ არის მარტივი. ეს იქნება საკმაოდ რთული რამ, მით უმეტეს რომ იმ ოპოზიციურ პარტიებს, რომლებიც ახლა შევლენ პარლამენტში და კოლექტიურად, ჯამურად დაუგროვდებათ საკმარისი ხმები, მათ აქვთ ერთმანეთთან დაპირისპირების პირადი, ორანიზაციული, ხედვითი თუ ასე შემდეგ , სხვადასხვა კონფლიქტების ისტორია”,_ განაცხადა ჩუგოშვილმა.
რაც შეეხება კოალიციური მთავრობის ფომირების პროცესს, თამარ ჩუგოშვილი ამბობს:
_ მას შემდეგ რაც მოხდება ახალი პარლამენტის უფლებამოსილების ცნობა, საუკეთესო შედეგის მქონე პარტია დაასახელებს პრემიერობის კანდიდატს, რომელსაც მიეცამა 2 კვირიანი ვადა, რომ წარმოადგინოს მინისტრობის კანდიდატები და პროგრამა.
საუკეთესო შედეგის მქონე პარტია არ ნიშნავს რომ მას უმრავლესობა აქვს, მას შეიძლება ჰქონდეს 30%, ეს არ იყოს საკმარისი, რომ დააკომპლექტოს მთავრობა, მაგრამ იყოს პირველ ადგილზე გასული. ასეთ შემთხვევაში პირველ ადგილზე გასული პარტია ასახელებს პრემიერ-მინისტრობის კანდიდატს, რომელსაც მიეცემა მცირე დრო, რომ წარმოადგინოს მინისტრთა კაბინეტი და სამთავრობო პროგრამა და ეყრება კენჭი. ნდობის გამოცხადებისთვის საჭიროა 76 მანდატი, ანუ 76 დეპუტატის ხმა. თუ 76 დეპუტატი ვერ მოგროვდა, ე.ი. ნდობა ვერ გამოცხადდა და შემდეგ იწყება მეორე პროცესი, როცა პარლამენტის წევრთა ერთი მესამედი, ანუ 50 დეპუტატი ოპოზიციის მხრიდან ასახელებს პრემიერ-მინისტრობის კანდიდატს. მას ასევე ეძლევა ვადა მინისტრობის კანდიდატების და სამთავრობო გეგმის წარმოსადგენად და უკვე ამ შემადგენლობას ეყრება კენჭი. აქაც 76 ხმა უნდა მოგროვდეს, მაგრამ თუ ისევ არ მოგროვდა საჭირო ხმები, პრეზიდენტი ვალდებულია, რომ ვადამდელი არჩევნები გამოაცხადოს.
ჩუგოშვილის თქმით, ძალიან მცირე დროში, ძალიან რთული მოლაპარაკებებია გასამართი.
“თუ ეს მოლაპარაკებები წარმატებით ვერ დასრულდა, მაშინ ქვეყანა შედის კრიზისში. კრიზისში რომ არ შევიდეთ, სწორედ ამას ცდილობს პრეზიდენტი. პრეზიდენტს არ გააჩნია არანაირი სამართლებრივი როლი თუ ფუნქცია, იმისა, რომ მან დაასახელოს პრემიერობის კანდიდატი. მას შეუძლია ელაპარაკოს პარტიებს და თავისი პოლკიტიკური ხედვა, ხალხის მხარდაჭერა გამოიყენოს იმაში, რომ პოლიტიკური პარტიები დაარწმუნოს, აირჩიონ ის გზა, რომელიც აგვარიდებს კრიზისს. პრეზიდენტს აქვს ახლა მცდელობა, მისი საუბარი, რომ თავად შესთავაზებს პრემიერობის კანდიდატს პარტიებს, იმის გამო კი არ ხდება, რომ მას თავის კაბინეტი უნდა, არამედ ის ხედავს თავის როლს, რომ ქვეყანა არ შევიდეს კრიზისში”,_ განაცხადა ჩუგოშვილმა.
