ადვოკატი ვახტანგ მაჭავარიანი საკუთარ გვერდზე აქვეყნებს ვიდეოს და განმარტავს, როგორ უნდა ამოვარდეთ კრედიტ ინფოს “შავი სიიდან” თუ თქვენი ვალი ხანდაზმულია:
– ჩვენ გარშემო ბევრი ადამიანისაგან გაგვიგია, რომ კრედიტი აიღეს და წლებია, ვერ ფარავენ. მართალია, სასამართლოში არავინ შესდავებია, თუმცა ახალ სესხს ვერ იღებენ, რადგან “შავ სიაში” აღმოჩნდნენ და საკრედიტო ორგანიზაციები აღარ ენდობიან. რასაც “შავ სიას” ეძახიან, სინამდვილეში, კრედიტ ინფო საქართველოს საინფორმაციო ბაზებია. ალბათ, შეგიმჩნევიათ, რომ განვადების მოთხოვნისას თქვენი მონაცემები კომპიუტერში შეჰყავთ და შეტყობინებას ელოდებიან. ისინი კრედიტ ინფოს ბაზაში ეძებენ თქვენს საკრედიტო რეპორტს. რეპორტში საკრედიტო ისტორიის სურათია გაწერილი. ასევე, ინფორმაცია არსებული და დახურული სესხების შესახებ, გადახდების ისტორია და ვადაგადაცილებულ სესხებთან დაკავშირებული სხვა მონაცემები… კრედიტ ინფოს სერვისებით საკრედიტო ორგანიზაციები სარგებლობენ, რათა კლიენტის ფინანსური მდგომარეობა, სანდოობისა და სტაბილურობის ხარისხი განსაზღვრონ. ასე, რომ თუ სესხი აგიღიათ, თქვენც იქნებით ამ სივრცეში და შეგიძლიათ, საკრედიტო რეიტინგი გადაამოწმოთ. დაგუგლეთ და იპოვით. კონკრეტულ სესხზე ინფორმაცია კონტრაქტის დახურვიდან 5 წლის განმავლობაში ინახება. თუ თანხა გაქვთ ნასესხები და არ დაგიბრუნებიათ, თქვენი კონტრაქტი დახურული არ არის და არც დაიხურება, სანამ თანხას ან არ ამოიღებენ, ან ვალს ხანდაზმულად არ აღიარებენ.
