ჩვენს მიერ გამოქვეყნებულ წერილს _ „ევროპაში მოგზაურობის წესები იცვლება“, დიდი ინტერესი მოყვა _ მკითხველს ამ თემაზე უფრო დეტალური ინფორმაცია აინტერესებს.
ამჯერად გთავაზობთ დაზუსტებულ ინსტრუქციას, თუ რა ცვლილებები იგეგმება ევროპაში მოგზაურობასთან დაკავშირებით 2025 წლის გაზაფხულიდან _ ამ ინფორმაციას econsul.io აქვეყნებს.
რა იცვლება 2025 წლის გაზაფხულიდან?
2025 წლის გაზაფხულიდან ევროპის 30 ქვეყანაში საზღვრის კვეთისთვის 1.4 მილიარდ ადამიანს 60ზე მეტი ქვეყნიდან დასჭირდება მოგზაურობის ავტორიზაცია ე. წ. ETIAS, მათ შორის, საქართველოს მოქალაქეებსაც.
რა არის ETIAS?
ETIAS იგივე ევროპაში მოგზაურობის შესახებ ინფორმირებისა და ავტორიზაციის სისტემა, არის ევროპის 30 ქვეყანაში შესვლის მოთხოვნა უვიზო რეჟიმის მქონე პირებისთვის.
ვადიანი ETIAS ავტორიზაციით, შესაძლებელია საზღვრის კვეთა ევროპული ქვეყნების ტერიტორიაზე რამდენჯერმე, მოკლევადიანი ვიზიტებით – ჩვეულებრივ, 90 დღემდე 180-დღიან პერიოდში. თუმცა, არსებული ავტორიზაცია არ არის ქვეყანაში შესვლის გარანტია. საზღვარზე, სასაზღვრო დაცვის თანამშრომელი მოითხოვს თქვენი პასპორტისა და სხვა დოკუმენტების ჩვენებას და შეამოწმებს, აკმაყოფილებთ თუ არა შესვლის პირობებს.
განაცხადის გაკეთება
ავტორიზაციისთვის განაცხადის გაკეთება შესაძლებელია როგორც ETIAS-ის ოფიციალური ვებ-გვერდიდან, ასევე, მობილური აპლიკაციიდან. განაცხადის ღირებულებაა 7 ევრო. 18 წლამდე და 70 წელზე მეტი აპლიკანტებისთვის კი განაცხადის გაკეთება უფასოა.
განაცხადის დამუშავება
განაცხადის გაკეთების შემდეგ, მის დამუშავებასა და პასუხის მიღებას, ჩვეულებრივ რამდენიმე წუთი დასჭირდება. თუმცა, შესაძლოა პროცესი შედარებით გახანგრძლივდეს და დღეები გასტანოს. იმ შემთხვევაში თუ პროცესში ავტორიზაციისთვის დამატებითი დოკუმენტების წარდგენა გახდება საჭირო, განხილვის პროცესი 14 დღემდე გასტანს, ინტერვიუზე დაბარების შემთხვევაში კი 30 დღემდე. სწორედ ამიტომ, ავტორიზაციისთვის განაცხადის გაკეთება დაგეგმილი მოგზაურობის პერიოდამდე, რამდენიმე კვირით ადრე უმჯობესია.
მას შემდეგ რაც განაცხადი დადასტურდება, მეილზე მიიღებთ აპლიკაციის დასტურის ნომერს, რომელიც უნდა შეინახოთ. განაცხადის დამუშავების დაწყების შემდეგ კი, ასევე მიიღებთ მეილს, რომ თქვენი განაცხადის დამუშავება დაწყებულია.
ავტორიზაციის მიღების შემდეგ, მნიშვნელოვანია გადაამოწმოთ რომ თქვენი პირადი მონაცემები, როგორებიცაა: სახელი, პასპორტის ნომერი და სხვა, მითითებულია სწორად. (ნებისმიერი ინფორმაციის არასწორად მითითების შემთხვევაში, მიუხედავად ავტორიზაციის მიღებისა, თქვენ ვეღარ შეძლებთ საზღვრის კვეთას)
თუ თქვენი აპლიკაცია არ დადასტურდება და ავტორიზაციაზე მიიღებთ უარყოფით პასუხს, გადმოგეგზავნებათ მეილი, სადაც მითითებული იქნება უარყოფითი პასუხის მიზეზები. იმ შემთხვევაში თუ ჩათვლით რომ არასამართლიანი გადაწყვეტილება იქნა მიღებული, პასუხის გასაჩივრებას შეძლებთ.
ETIAS-ის მოქმედების პერიოდი
ევროპაში მოგზაურობის ავტორიზაციის მოქმედების ვადა განისაზღვრება სამი წლით. თუმცა თუ თქვენს პასპორტს ETIAS-ის ვადის ამოწურვამდე მოქმედების ვადა გაუვა, მნიშვნელოვანია განაცხადი ახლიდან გააკეთოთ.
ETIAS გაძლევთ საშუალებას დარჩეთ იმ ევროპულ ქვეყნებში, რომლებიც ETIAS-ის ავტორიზაციას ითხოვენ, 90 დღემდე ნებისმიერ 180-დღიან პერიოდში.
მნიშვნელოვანია, რომ გქონდეთ ვადიანი ETIAS მოგზაურობის ავტორიზაცია ევროპაში ყოფნის პერიოდში. თქვენ შეგიძლიათ ნებისმიერ დროს დაბრუნდეთ ან დატოვოთ ქვეყანა, თუკი დროით ლიმიტებს დაიცავთ.
რა ხდება საზღვარზე?
ETIAS მოგზაურობის ავტორიზაცია დაკავშირებულია თქვენს მოგზაურობის დოკუმენტთან, ამიტომ დარწმუნდით, რომ საზღვარზე თან გექნებათ ის დოკუმენტი, რომელიც ETIAS განაცხადში გამოიყენეთ. წინააღმდეგ შემთხვევაში, თქვენ არ დაიშვებით იმ ევროპულ ქვეყნებში, სადაც ETIAS არის აუცილებელი.
ვადიანი ETIAS ავტორიზაციის ქონა ავტომატურად არ ნიშნავს შესვლის უფლებას. როდესაც ჩამოხვალთ საზღვარზე, სასაზღვრო დაცვის თანამშრომლები შეამოწმებენ, აკმაყოფილებთ თუ არა შესვლის პირობებს.
ამრიგად, ETIAS არის მოგზაურობის ავტორიზაციის სისტემა, რომელიც უზრუნველყოფს უსაფრთხო და კონტროლირებად შესვლას ევროკავშირის იმ ქვეყნებში, რომლებიც მას ითხოვენ. სისტემა უზრუნველყოფს პირთა იდენტიფიკაციას, რომლებიც არ აკმაყოფილებენ შესვლის პირობებს, რაც ამცირებს უსაფრთხოების რისკებს.
