გუშინ ქალაქ პრიშტინაში მსოფლიო პირველობის მორიგი შესარჩევი შეხვედრა გაიმართა. საქართველოს ნაკრებმა გასვლაზე კოსოვო 2:1 დაამარცხა და ბათუმში მარცხისთვის რევანში აიღო.
როგორც იქნა შეწყდა საქართველოს ნაკრების 9-წლიანი დანავსული სერია და ჩვენმა ეროვნულმა გუნდმა მსოფლიოს ჩემპიონატის შესარჩევ ტურნირზე თამაში მოიგო.
მე-11 წუთზე ჩვენების შეტევისას კარგად ითამაშა გიორგი წიტაიშვილმა, შემდეგ თორნიკე ოქრიაშვილმა ისარგებლა მეკარის შეცდომით და ანგარიში გახსნა. ტაიმის მიწურულს კოსოვოელებმა პენალტით გაათანაბრეს ანგარიში.
სანიოლმა შეცვლები გამოიცნო. მეორე გოლი შეცვლაზე შესულმა მოთამაშეებმა შექმნეს. ფლანგიდან ირაკლი აზაროვის ჩაწოდებული ზურიკო დავითაშვილმა თავით გადაგზავნა კოსოვოელთა კარში და საქართველოს ნაკრებს მონატრებული გამარჯვება მოუტანა.
ვულოცავთ ნაკრებს გამარჯვებას. რა ცოტა უნდა გულშემატკივარს, რომ გაახარო. ამდენი „საფეხბურთო უბედურების“ შემდეგ მართლა ჰაერივით გვჭირდებოდა ეს მოგება ! მადლობა ბიჭებს რომ იბრძოლეს.
საინტერესოა რომ შეხვედრის დაწყებამდე უკრაინულმა ვებგვერდმა „sportsmole“ ამ შეხვედრის საინტერესო პროგნოზი შემოგვთავაზა.
„კოსოვოს ნაკრებმა სექტემბერში ქართველები სტუმრად დაამარცხა და შალანდეს გუნდი 3 ქულას ისევ მათთან თუ დაგეგმავს. „ჯვაროსნებს“ კი შესარჩევ ციკლში მხოლოდ ერთი ნათელი წერტილი ჰქონდათ – საბერძნეთის ნაკრებთან გასვლითი მატჩი (1:1). ვილი სანიოლის გუნდი უკანასკნელ 3 შეხვედრაში ისე დამარცხდა, გოლიც ვერ გაიტანა. საქართველოს ნაკრების ჯგუფის აუტსაიდერად ხილვა გასაკვირი სულაც არაა, ისინი ხომ მსოფლიო ჩემპიონატის უკვე მესამე საკვალიფიკაციო ციკლში ვერაფერს ახერხებენ.
მოსალოდნელია, რომ სამშაბათ საღამოს ქართველი ფეხბურთელები საკმარისად კარგები იქნებიან და კიდევ ერთ შეხვედრაში არ დამარცხდებიან. პირიქით, დიდი ალბათობით შეიძლება გაიმარჯვონ კიდეც“.
საქართველოს ნაკრებს კოსოვოში ჩაფრენის დროს არასასიამოვნო თავგადასავალი გადახდა. გუნდი დედაქალაქ პრიშტინაში ჩარტერული რეისით ჩაფრინდა „Georgian Airways“-ის თვითმფრინავით, რომელსაც აეროპორტში დაშვების პრობლემა შეექმნა.
როგორც ცნობილი გახდა, დაახლოებით 40 წუთის განმავლობაში თვითმფრინავი წრიულად მოძრაობდა, საბოლოოდ კი, პრიშტინას აეროპორტში უსაფრთხოდ დაეშვა. სავარაუდო მიზეზად უამინდობა დასახელდა, რადგან იმავე პერიოდში აეროპორტის თავზე კიდევ ორი თვითმფრინავი გარკვეული დროის განმავლობაში ტრიალებდა.
16-17 ოქტომბერს პარიზი ძიუდოს „გრან სლემს“ უმასპინძლებს. ტურნირზე საქართველოს ნაკრები 5 ძიუდოისტით წარდგება.
ფრანგულ ტატამზე ტოკიოს ოლიმპიური თამაშების ვერცხლის პრიზიორს ვაჟა მარგველაშვილს, ევროპის ჩემპიონს ტატო გრიგალაშვილს, ლუკა მაისურაძეს, ონისე სანებლიძესა და ეთერ ლიპარტელიანს ვიხილავთ. ტურნირამდე ჯერ დროა და შესაძლოა ჩვენს რიგებს სხვა ძიუდოისტებიც დაემატონ.
შარშანდელი პარიზის გრან სლემი კორონავირუსის პანდემიის გამო გაუქმდა. 2019 წლის ტურნირზე კი ჩვენმა დელეგაციამ სამი მედალი მოიპოვა. გრან სლემის გამარჯვებული ვარლამ ლიპარტელიანი გახდა. ვერცხლის პრიზიორი ვაჟა მარგველაშვილი, ხოლო ბრინჯაოს მედალს ლაშა შავდათუაშვილი დასჯერდა.
და კვლავ ფეხბურთი. გამოცემა Goal.com-ის ჟურნალისტებს ინგლისის ნაკრების მთავარმა მწვრთნელმა, გარეთ საუთგეიტმა მსოფლიო ჩემპიონატების ორ წელიწადში ერთხელ ჩატარების თაობაზე გაუზიარა აზრი.
„რაღაც წინადადებები ვნახე, მაგრამ კარგად არ მესმის რა პროექტზე მუშაობს ახლა ფიფა. ყველაფერი სწრაფად იცვლება. იყო რაღაც პრეზენტაცია, იდეების გაზიარება. მგონია, რომ ასეთ მსჯელობაში ყველა უნდა მონაწილეობდეს. მე თუ მკითხავთ, მსოფლიო ჩემპიონატების ორ წელიწადში ერთხელ ჩატარება უაზრო იდეა მგონია.“
ბრაზილიის პრეზიდენტი კი საფეხბურთო მატჩზე არ შეუშვეს. ჟაირ ბოლსონარუ ეროვნული ჩემპიონატის ეგიდით „სანტოსისა“ და „გრემიოს“ მატჩზე დასასწრებად მივიდა, თუმცა, სტადიონზე არ შეუშვეს იმის გამო, რომ ჯერაც არ გაუკეთებია „კოვიდ 19“-ის საწინააღმდეგო აცრა.
ადგილობრივი პროტოკოლის თანახმად, სპორტული ღონისძიებებისთვის თვალის მიდევნება მხოლოდ აცრილ მოქალაქეებს შეუძლიათ, ბოლსონარუ კი მათ რიცხვს არ მიეკუთვნება, თუმცა, მომხდარით მაინც ძალიან უკმაყოფილო დარჩა.
ჟაირ ბოლსონარუ უცნაური ქცევით აქამდეც გამორჩეული იყო, პანდემიის პერიოდში კი, კორონავირუსის საწინააღმდეგო განცხადებებით გამოიჩინა თავი. თავად აცრაზე უარს აცხადებს და რაც მთავარია, ბრაზილიის მოქალაქეებსაც იგივესკენ მოუწოდებს, იმის ფონზე, რომ ქვეყანაში 600 ათასზე მეტი გარდაცვლილია.
[sexy_author_bio]
