“როგორც კი საჭირო თანხა გამოჩნდება, კორპუსის გამაგრებითი სამუშაოებიც დაიწყება” _ მოსახლეობა მრავალჯერ მიღებული დაპირების შესრულების მოლოდინში

ადგილობრივთა თხოვნით, ლანჩხუთში, ჟორდანიას #114-ში მდებარე მრავალბინიანი საცხოვრებელი სახლის პრობლემის თაობაზე “გურია ნიუსი” არაერთხელ წერდა. თავის დროზე, აქ არსებული პრობლემის გასაცნობად ადგილზე ადგილობრივი ხელისუფლების არა ერთი წარმომადგენელიც მივიდა არაერთგზის, თუმცა, სამწუხაროდ, საქმე სიტყვიერ დაპირებებს არ გასცდენია და პრობლემის აღმოსაფხვრელად მისხალიც არაფერი გაკეთებულა.

ჯერ იყო და, ქალაქში მერის წარმომადგენლის თანაშემწე მივიდა, მოსახლეობის საწუხარს გაეცნო, პრობლემებიც მოისმინა და შესაბამისი რეაგირების პირობაც გასცა.

მორიგ ჯერზე თვით მუნიციპალიტეტის მერი ალექსანდრე სარიშვილი, მერიის შესაბამისი სამსახურის წარმომადგენელთა თანხლებით, პირადად მივიდა და საკუთარი თვალით იხილა, თუ რა სავალალო მდგომარეობაა რეალურად. მრავალბინიანი სახლის მონახულების შემდეგ მერმა ინფრასტრუქტურის სამსახურის წარმომადგენელს იქვე მითითებაც მისცა, საკითხი შეესწავლა და შესაბამისი პროექტიც მოემზადებინა. თუმცა, ხანი გავიდა და რამდენიმე თვის წინ, კიდევ ერთხელ მოგვიხდა მერიის შეწუხება, რომ გაგვერკვია, თუ რა გეგმები აქვს ჟორდანიას 114-ში მდებარე ავარიულ სახლთან დაკავშირებით მუნიციპალიტეტს. როგორც მერიის პიარმა მაშინ გვითხრა, ზემოთ ნახსენები პრობლემის მოგვარების მიზნით, სათანადო სამუშაოების დაწყება უახლოეს პერიოდში იგეგმება.

“პრობლემის თაობაზე კარგად ვართ ინფორმირებულები, უკვე გამოცხადდა ტენდერი და სარეაბილიტაციო სამუშაოებიც მალე დაიწყება”, _ დაგვაიმედა მორიგ ჯერზე მაკა სულაბერიძემ.

საქმე ისაა, რომ ჟორდანიას 114-ში მდებარე მრავალბინიანი საცხოვრებელი სახლი ერთ-ერთია, რომლის იერ-სახეც, სახელმწიფო პროგრამის “განახლებული რეგიონები” ფარგლებში, ცენტრალური ქუჩის მხრიდან გაალამაზეს და მოაწესრიგეს, თუმცა, მაშინ არავინ დაინტერესებული შიდა ეზოს მხრიდან კორპუსის მდგომარეობით. არადა, სამსართულიანი სახლის საყრდენი ბოძები საკმაოდ დაზიანებულია, კოსმეტიკური სილამაზის უკან მრავალბინიანი სახლების პრობლემები მძლავრობს და დროულ მიხედვას საჭიროებს.

“არაფრისგან ვართ დაზღვეულები! არავინ იცის, როდის გამოინგრევა ეს ბოძები. შესწავლა და შემოწმება კი არა, ერთი თვალის შევლებითაც კარგად ჩანს, რა მდგომარეობაცაა. გაზეთშიც დავწერეთ, მერიაშიც ბევრჯერ ვიყავით, არის დაპირებები, თუმცა, კონკრეტული კი, ჯერჯერობით, არაფერია. მაინცდამაინც უნდა ჩამოინგრეს, რომ მერე გააკეთონ?! ნელ-ნელა უკვე დაწყებულია ჩამონგრევის პროცესი, შენობიდან ჩამოვარდნილი კარგად მოზრდილი ბათქაში დაეცა კიდეც თავში სადარბაზოში შემავალ ადამიანს.

ფაქტია, რომ ბოძები ავარიულ მდგომარეობაშია და მიხედვას საჭიროებს, თორემ ერთ დღეს არაა გამორიცხული გალამაზებული ფასადის ფონზე ეს სახლი შიდა ეზოს მხრიდან ჩამოინგრეს და ბათუმში მომხდარი ტრაგედიის მსგავსი დატრიალდეს”, _ უკვე არაერთგზის ამბობენ “გურია ნიუსთან” საუბარში აღნიშნული სახლის ის მობინადრეები, რომელთაც დახმარების თხოვნით მოგვმართეს და მუნიციპალიტეტის ხელმძღვანელობისგან დაპირების ნაცვლად რეალურ ქმედებას ითხოვენ.

მოსახლეობის თხოვნის შესაბამისად, “გურია ნიუსი” კიდევ ერთხელ დაინტერესდა ჟორდანიას ქუჩაზე მდებარე ავარიული სახლის ბედით და ამჯერად, ქალაქის მაჟორიტართან კახა კვიტაიშვილთან შეეცადა გარკვევას, თუ როდის და რა ღონისძიებების გატარება იგეგმება მოსახლეობის პრობლემის გადასაჭრელად. თუმცა, სამწუხაროდ, კონკრეტული პასუხის მიღება ვერც ამჯერად შევძელით. როგორც ქალაქის მაჟორიტარი ამბობს, პრობლემას სამუშაოების საწარმოებლად თანხის მოძიება წარმოადგენს. მისი თქმით, როგორც კი საჭირო თანხა გამოჩნდება, კორპუსის ბოძების გამაგრებითი სამუშაოებიც დაიწყება.