23 აპრილს ცნობილი გახდა, რომ ბახმაროში 12 მგვტ ჰესის მშენებლობაზე წარმოება განახლდა. საქართველოს გარემოს დაცვისა და სოფლის მეურნეობის სამინისტროს ვებგვერდზე გამოქვეყნებულ განცხადებაში წერია: “განცხადება დამატებითი ინფორმაციის წარმოდგენის თაობაზე – შპს „სი-სი-ი-ეიჩ ჰაიდრო VI“-ს მდ. ბახვისწყალზე 12 მგვტ დადგმული სიმძლავრის, ბუნებრივ ჩამონადენზე მომუშავე ბახვი 1 ჰესის მშენებლობისა და ექსპლუატაციის პროექტი.
შპს „სი-სი-ი-ეიჩ ჰაიდრო VI“-ს მიერ საქართველოს გარემოს დაცვისა და სოფლის მეურნეობის სამინისტროში წარმოდგენილი იქნა მდ. ბახვისწყალზე 12 მგვტ დადგმული სიმძლავრის, ბუნებრივ ჩამონადენზე მომუშავე ბახვი 1 ჰესის მშენებლობისა და ექსპლუატაციის პროექტის სკოპინგის ანგარიში
ამ ინფორმაციის გავრცელების შემდეგ გურიაში სამოქალაქო სექტორის წარმომადგენლებმა კვლავ გააგრძელეს აქტივობა და კიდევ ერთხელ დააფიქსირეს მედიის წარმომადგენლებთან თავიანთი პოზიციები, რომ ბახმაროში ჰესის მშენებლობას ნებას არავის მისცემენ.
დღეს ჩოხატაურის მუნიციპალიტეტის საკრებულოს დარბაზში ინვესტორი და ის კომპანია, რომელიც აპირებს გურიაში ჰესის მშენებლობას, საკრებულოს და არასამთავრობო ორგანიზაციის წევრებს შეხვდნენ.
შეხვედრას ესწრებოდნენ არასამთავრობო ორგანიზაცია “საქართველოს ახალგაზრდა იურისტთა ასოციაცია“ და “ეკოს“ წარმომადგენლები.
“გურია ნიუსი“ “საიას“ ოზურგეთის ოფისის ხელმძღვანელს თამაზ ტრაპაიძეს ტელეფონით დაუკავშირდა და შეხვედრის შესახებ კომენტარი თხოვა.
“დღეს გააკეთეს პრეზენტაცია და როგორც მოსალოდნელი იყო, ყველაფერი ვარდისფერ ფერებში წარმოადგინეს. მათი თქმით, ყველაფერი კარგად იქნება და ეს ჰესის მშენებლობა კარგი არის რეგიონისთვის. ისე დახატეს პროექტი, რომ უარყოფითი არაფერი ექნება ამ ჰესის მშენებლობას. შეხვედრაზე ითქვა, რომ თუ ამ პროექტის ფარგლებში ხეებს მოჭრიან, სამაგიეროდ, სამჯერ მეტ ხეს დარგავენ.
კითხვები დავსვით. ნაწილზე _ გვიპასუხეს და ნაწილზე _ ისევ კითხვის დონეზე დარჩა.
ამ შეხვედრაზე კომპანიამ, რომელიც აპირებს ბახვი 1 ჰესის მშენებლობას საკრებულოს წევრებს გააცნო, რას გეგმავენ გურიაში. ასევე, მინდა აღვნიშნო, რომ ეს შეხვედრა კანონმდებლობით არ ევალება და მგონი, ეს პირველი პრეცედენტი იყო. ეს იმის დამსახურება არის, რომ ძალიან აქტიურად არის ჩართული სამოქალაქო სექტორი, მედია და ადგილობრივები.
ჩვენი პოზიცია არის უცვლელი _ გარემოზე ზემოქმედებას იქონიებს ჰესის მშენებლობა და ეს პოზიცია საკრებულოში გამართულ შეხვედრაზეც დავაფიქსირეთ“, _ აღნიშნა თამაზ ტრაპაიძემ “გურია ნიუსთან“ საუბრის დროს.
