„ნაპოლის“ მთავარმა მწვრთნელმა ფრანჩესკო კალცონამ „ინტერთან“ მატჩის (1:1) შემდეგ შემდეგი კომენტარი გააკეთა.
„ყველა პრობლემის მოსაგვარებლად ჯადოქარია საჭირო, რადგან ძალიან ბევრს ვთამაშობთ და ცოტას ვვარჯიშობთ. ვცდილობთ დაცვით ფაზას მეტი ყურადღება მივაქციოთ, ვიდრე შეტევას, რადგან ამას მეტი დრო სჭირდება. თუმცა, კარამდე ახლოს მივდივართ, მხოლოდ დასრულება გვიჭირს. ჩემი გუნდით კმაყოფილი ვარ. შეუიარაღებელი თვალითაც ჩანს, რომ გვიჭირს შეტევის დაგვირგვინება, დრო ცოტა გვაქვს და ყველაფრის მოგვარება რთულია. 24 დღეში 6 მატჩი გვქონდა, თუ აღდგენის დღეებსაც გავითვალისწინებთ, ტაქტიკურად სამუშაოდ მხოლოდ 6-7 ვარჯიში გქონდა. ჩვენთვის ეს არ არის ალიბი, მაგრამ ობიექტური ფაქტია. დროა საჭირო ყველაფრის დასალაგებლად.
ბევრი საქმე მაქვს და ოჯახთან სალაპარაკოდაც არ მაქვს დრო. პატარა შვილი მყავს, რომელსაც დღეში ერთხელაც ვერ ვესაუბრები. არ მაინტერესებს რას ამბობენ ჩემს მომავალზე, სლოვაკეთის ფეხბურთის ფედერაციასთან კონტრაქტი 2025-წლამდე მაქვს, პირველი მათ გამომიცხადეს ნდობა, ამიტომ მათ პატივს ვცემ.
„ინტერთან“ კარგად ვითამაშეთ, წარმოუდგენელი იყო იმაზე ფიქრი, რომ აქ ჩამოვიდოდით და არ გაგვიჭირდებოდა. თუმცა, რეალურად მხოლოდ 10 წუთი გაგვიჭირდა, მოვახერხეთ გათანაბრება გუნდთან, რომელსაც ზედიზედ 10 მოგება ჰქონდა. გარდა ამისა, მოგებაც ვცადეთ და ეს დამოკიდებული სწორია. დრო ცოტაა ყველა დეტალზე სამუშაოდ, მაგრამ ამ გუნდს ვენდობით და ვბრუნდებით, გუნდი იზრდება და გვინდა, რომ სეზონის ფინალური ნაწილი მაღალ დონეზე ჩავატაროთ“, – განაცხადა კალცონამ.
მილანის „ინტერის“ მთავარმა მწვრთნელმა სიმონე ინძაგიმ შემდეგი განცხადება გააკეთა.
„იმედგაცრუებულები ვართ, გამარჯვება გვინდოდა, ჩვენთვის, გულშემატკივრებისთვის. ბოლო წუთებში დაღლილობა იგრძნობოდა, მაგრამ ბევრი სახიფათო მომენტი ჩვენს კართან არ მიგვიღია.
ბიჭებმა შესანიშნავად ითამაშეს, ისინი შევაქე. „ატლეტიკოსთან“ 120 წუთი ვითამაშეთ და დღეს ეს არ ჩანდა. იტალიის ჩემპიონს ვეთამაშეთ და არაფერი დავუთმეთ. ძალიან ყურადღებით ვითამაშეთ. გვინდოდა ჩემპიონატში ზედიზედ მე-11 მატჩის მოგება და ვერ შევძელით, მაგრამ ეს ფეხბურთია, ვეცდებით, ეს თამაშიც გაკვეთილად გამოვიყენოთ.
იმედი გვაქვს, რომ სკუდეტოს მოვიგებთ, მაგრამ ჯერ კიდევ გვაქვს სამუშაო, სეზონის დასრულებამდე ორი თვე რჩება. არ უნდა მოვდუნდეთ და ეს კონცენტრაცია ბოლომდე შევინარჩუნოთ“, – თქვა სიმონე ინძაგიმ.
ხვიჩა კვარაცხელიას იტალიური მედიისგან შემდეგი შეფასებები ერგო.
Tuttonapoli – 6 ქულა: “როგორც წესად იქცა, ფეხებში ურტყამდნენ, ამას მსაჯიც უმეტესად უყურადღებოდ ტოვებდა. ისე ვერ გაიბრწყინა, როგორც საუკეთესო საღამოს, თუნდაც იმიტომ, რომ ოლივერასგან მცირე მხარდაჭერა ჰქონდა”.
Eurosport – 5.5 ქულა: “პავარი მის წინააღმდეგ უხეშობისთვის გააფრთხილეს. მეორე ტაიმში უმიზნებს მეტოქეს და კარშიც დაარტყა, მაგრამ ზომერმა ადვილად მოიგერია. მატჩის ფინალურ ნაწილში მოჩვენებასავით იყო”.
Calcionapoli1926 – 6 ქულა: “როგორც პოლიტანო, ისიც მეორე ტაიმში გამოჩნდა და რამდენჯერმე საინტერესოდ იმოქმედა. თუმცა, ყოველთვის ვერ ახერხებს მეტოქის მოტყუებას და მახრჩობელა მეურვეობისგან თავის დაღწევას. სამწუხაროდ, თანაგუნდელებმაც მარტო დატოვეს”.
Tuttomercatoweb – 5.5 ქულა: “ცდილობდა ცენტრში გადაწევას, რათა არ ჩაკარგულიყო. პავარმა და ბისეკმა ის გაანეიტრალეს. მატჩი განსაკუთრებული ეფექტების გარეშე”.
Calciomercato – 5.5 ქულა: “როდესაც ჩვეულ სტილში თამაშობს, სახიფათო შთაბეჭდილებას ტოვებს ინტერისთვის, მაგრამ მთლიანობაში საკმარისად ვერ გაიბრწყინა”.
ესპანეთის „ლა ლიგის“ 29-ე ტურში „ვალენსია“ სტუმრად „ვილიარეალთან“ 0:1 დამარცხდა, მატჩის საუკეთესო ფეხბურთელი კი წაგების მიუხედავად, გიორგი მამარდაშვილი აღიარეს.
ქართველმა მეკარემ მე-13 წუთზე ზედიზედ ორჯერ იხსნა თავისი გუნდი, როცა რთული დარტყმები უკუაგდო. 38-ე წუთზე სტუმართა კარში პენალტი დაინიშნა, რომელიც ალექს ბაენამ შეასრულა, მაგრამ გიორგიმ დარტყმის მიმართულება გამოიცნო და ბურთი მოიგერია. მან მეორედ შეძლო თერთმეტმეტრიანის აღება „ლა ლიგაში“.
„ლა ლიგამ“ მატჩის საუკეთესო ფეხბურთელად მამარდაშვილი დაასახელა, რომელსაც მიმდინარე სეზონში ჩატარებულ 28 შეხვედრაში 32 გოლი აქვს გაშვებული, ხოლო კარის მშრალად 9-ჯერ შეძლო, რაც მისთვის ესპანურ კარიერაში საუკეთესო შედეგია.
მატჩის შემდეგ ვალენსიელთა მთავარმა მწვრთნელმა რუბენ ბარახამ შემდეგი კომენტარი გააკეთა.
„ორივე გუნდს ერთნაირად ჰქონდა საგოლე მომენტები. გიორგი კარგი იყო, შესანიშნავი, მაგრამ ეს იყო თამაში, რომელშიც მათ ერთი მომენტი გამოიყენეს, მაგრამ ჩვენ ეს ვერ მოვახერხეთ და განსხვავებაც ამან განაპირობა. თუმცა, არ მაქვს განცდა, რომ „ვილიარეალმა“ გვაჯობა და ჩვენზე 20-ით მეტი მომენტი შექმნა“, – თქვა ბარახამ.
მამარდაშვილის თამაში ესპანურმა მედიამ შემდეგნაირად შეაფასა:
As: „თითქმის ყველა შეტევა გააჩერა. მხოლოდ კუენკამ აჯობა ქართველს, რომელმაც კიდევ ერთხელ აჩვენა, რომ სასიამოვნო მომენტში იმყოფება. მე-13 წუთზე „ვილიარეალის“ წინააღმდეგ სამმაგი სეივი მიითვალა. შემდეგ ბაენას პენალტიც აუღო. მეორე ტაიმში კიდევ სამი ბურთი აიღო, განსაკუთრებით, ეფექტური იყო ჟერარ მორენოს ეპიზოდში. მან 6 მოგერიება მიითვალა და MVP იყო“.
Eldesmarque: „მისი სამმაგი სეივი ამართლებს მასზე გაცემულ ნებისმიერ ავანსს. პენალტიც მოიგერია და მის ისტორიაში ახალი მომენტი დგება, მიუხედავად იმისა, რომ კუენკას გოლზე ვერაფერი გააკეთა“.
ავტორი
