გუშინ ბათუმში, საქართველოს ახალგაზრდულმა ნაკრებმა ამხანაგურ მატჩში ინგლისი დაამარცხა _ 3:2.
საქართველოს 21-წლამდელთა გუნდმა პრემიერლიგის ფეხბურთელებით დაკომპლექტებულ მოწინააღმდეგეს არა თუ ტოლი არ დაუდო, არამედ ყველა საფეხბურთო კომპონენტში დაჯაბნა კიდეც და რომ არა შეხვედრის დასასრულს დაშვებული შეცდომები, დიდი ანგარიშით გაიმარჯვებდა.
სტუმრებმა თავიდანვე შეუტიეს და მამარდაშვილმა ორჯერ რთული ბურთი მოიგერია. 24-ე წუთზე გულიაშვილმა შორიდან დალაშქრა მეტოქის კარი. მეორე ტაიმი ჩვენმა გუნდმა კარგად დაიწყო, გოჩოლეიშვილმა გულიაშვილი მეკარესთან პირისპირ გაიყვანა და მან დუბლი შეასრულა. 54-ე წუთზე გულიაშვილი ჰეთ-თრიკთან ახლოს იყო, თუმცა ახლო მანძილიდან თავით ვერ შეძლო გატანა.
საქართველოს ნაკრები უკვე სრულ უპირატესობას ფლობდა და 65-ე წუთზე გოჩოლეიშვილმა ბრწყინვალე დრიბლინგის შემდეგ ულამაზესი გოლი გაიტანა.
ჩვენს გუნდს ბოლოს ყურადღების მოდუნება კინაღამ ძვირად დაუჯდა _ ინგლისელებმა ორი გოლი კუთხურის მოწოდების შემდეგ გაიტანეს და მსაჯის საფინალო სასტვენის ხმაც გაისმა.
საქართველოს „უფროსთა“ ეროვნულმა გუნდმა კი მიმდინარე სეზონი უზბეკეთთან მოგებით დაასრულა.
26 დეკემბერს „ერთა ლიგის“ მორიგი გათამაშების წილისყრა გაიმართება და ჩვენი გუნდის მომავალი მეტოქეებიც გამოვლინდება.
უზბეკეთის ნაკრებთან თამაშის შემდეგ კომენტარები ზურიკო დავითაშვილმა, ხვიჩა კვარაცხელიამ და გურამ კაშიამ გააკეთეს.
დავით ვოლკოვი: „ყველას ვულოცავ გამარჯვებას. რა თქმა უნდა, ძალიან გახარებული ვიყავი, როდესაც ნაკრებში გამომიძახეს და ყველანაირად ვცდილობდი, ჩემი შანსი გამომეყენებინა. ძალიან გამიხარდა ძირითად შემადგენლობაში მოხვედრა. რთულია, სიტყვებით გადმოსცე ის ემოცია, რომელიც ეროვნული ნაკრების მაისურით გატანილ გოლს ახლავს თან. ბედნიერი ვარ, რომ გუნდმა ჩემი გოლით მოიპოვა გამარჯვება. მიხარია, რომ წელი დადებითად დავასრულეთ”.
ზურიკო დავითაშვილი: „ძალიან სასიხარულოა, როდესაც სამ თამაშს იგებ. ეს მთელ საქართველოს ძალიან სჭირდებოდა. რაც შეეხება ჩემ თამაშს: კმაყოფილი არასდროს არ ვარ. ფეხბურთელმა ყოველთვის მაქსიმუმი უნდა გააკეთო. რაც შეეხება ნაკრებს: იმედი მაქვს, მომავალშიც ასე გავაგრძელებთ და მომდევნო თამაშებშიც გამარჯვებით გავახარებთ ჩვენ გულშემატკივარს. ჩვენთვის ძალიან დიდი მნიშვნელობა აქვს გულშემატკივრის ფაქტორს, ეს კარგად გამოჩნდა ბოლო ორ თამაშში”.
ხვიჩა კვარაცხელია: „ნაკრების თამაშს დადებითად შევაფასებ. ჩემი აზრით, ზედიზედ სამი მოგება ძალიან კარგი შედეგია. მნიშვნელობა არ აქვს, ამხანაგური თამაში იქნება თუ ოფიციალური. ვაჯობეთ მეტოქეს და გამარჯვება მოვიპოვეთ. ძალიან კარგია, რომ ეს წელი დადებით ნოტაზე დავასრულეთ. იმედი მაქვს, მომავალ წელსაც გაგვყვება ეს განწყობა და დაგვეხმარება, რომ მეტი მოტივაციით ვითამაშოთ”.
გურამ კაშია: „ბოლო სამი თამაში, რა თქმა უნდა გვაძლევს იმ ოპტიმიზმს, რომ შემდეგი ციკლისთვის უკეთესად ვითამაშოთ. სათამაშო ხარისხი გავაუმჯობესეთ, ახალი სისტემაც ვიპოვეთ, რომელიც კომფორტულია ფეხბურთელებისთვისაც და მწვრთნელებისთვისაც. ფეხბურთელებს ყოველთვის გვიხარია და მოტივირებული ვართ ნაკრებში ჩამოსვლისას”.
მიმდინარე თვის ბოლოს შოთა არველაძის სამწვრთნელო კარიერაში, ალბათ, ახალი ფურცელი გადაიშლება _ სხვადასხვა სპორტული გამოცემების მიერ გავრცელებული ცნობებით ქართველი ფეხბურთის სპეციალისტის გადაბირება რუსულ „კრასნოდარს“, ინგლისურ „ჰალსა“ და შოტლანდიურ „გლაზგო რეინჯერს“ სურთ.
რუსული „Sportarena“-ს მტკიცებით, „კრასნოდარმა“ შოთა არველაძეს უკვე ოფიციალური წინადადებით მიმართა, რადგან დიდი ალბათობით „კრასნოდარის“ მოქმედი მთავარი მწვრთნელი ვიქტორ გონჩარენკო პოსტს დატოვებს.
„კრასნოდარი“, რომელსაც რუსი მილიარდელი სერგეი გალიცკი მმართავს, არველაძისგან პასუხს მიმდინარე თვის მიწურულს ელის. მოგეხსენებათ, „კრასნოდარის“ გარდა არველაძე „ჰალ სიტისა“ და „გლაზგო რეინჯერსს“ დაუკავშირეს.
წარსულში არველაძემ რუსეთში მუშაობაზე უარი ორჯერ განაცხადა. პირველად, როდესაც გუუს ჰიდინკმა რუსეთის ნაკრებში ასისტენტის პოზიცია შესთავაზა, მეორედ კი იგივე „კრასნოდარის“ წინადადებაზე თქვა უარი.
მიმდინარე წლის ზაფხულში „კრასნოდარი“ კიდევ ერთი ქართველით, საქართველოს ნაკრების მარცხენა მცველით, ირაკლი აზაროვით დაინტერესდა. გალიცკის „კრასნოდარში“ თავის დროზე თორნიკე ოქრიაშვილი თამაშობდა, რომელმაც ტრავმების მიუხედავად, „ზენიტთან“ და „სევილიასთან“ გატანილი ბრწყინვალე გოლებით ქომაგს დიდი სიხარული მოუტანა. გალიცკის ოქრიაშვილთან კარგი ურთიერთობა ჰქონდა. როცა ფეხბურთელმა რუსული გუნდი დატოვა, ერთმანეთს თბილად დაემშვიდობნენ.
ესპანური გამოცემა „fichajes“ ირწმუნება, რომ „რუბინის“ ნახევარმცველ ხვიჩა კვარაცხელიას სამსახურით „ვილიარეალი“ დაინტერესდა. ყაზანური კლუბი ქართველს უკვე 25 მილიონ ევროდ აფასებს – ადრე 18-20 მილიონად აფასებდა.
გამოცემამ „Sempremilans“ კი გუშინ გაავრცელა ცნობა რომ ხვიჩასადმი ინტერესი „მილანმა“ განაახლა და ყაზანის „რუბინს“ უახლოეს მომავალში კიდევ ერთხელ დაუკავშირდება.
[sexy_author_bio]
