2019 წლის გლობალური ტერორიზმის ინდექსის კვლევის მონაცემებით, გასულ წელს “თალიბანის” თავდასხმებს უფრო მეტი ადამიანი ემსხვერპლა, ვიდრე “ისლამური სახელმწიფოსას”. აღნიშნული ანგარიში ეკონომიკისა და მშვიდობის ინსტიტუტმა მოამზადა.
ინდექსის კვლევამ, ასევე გამოავლინა მემარჯვენე ტერორიზმის მკვეთრი ზრდა განსაკუთრებით ევროპასა და ჩრდილოეთ ამერიკაში.
მიუხედავად იმისა, რომ 2018 წელს ტერორიზმის შედეგად დაღუპული ადამიანების რიცხვი შემცირდა, 71 ქვეყანაში 1 ადამიანი ჯერ კიდევ ტერორიზმის მსხვერპლია.
2018 წელს ტერორიზმმა ყველაზე მეტად ავღანეთი დააზარალა. ქვეყანაში ტერორიზმის მსხვერპლი 7000-ზე მეტი ადამიანია.
ანგარიშში აღნიშნულია, რომ 2018 წელს “თალიბანი” 6 103 ადამიანის დაღუპვაზეა პასუხისმგებელი.
კვლევაში აღნიშნულია ისიც, რომ “თალიბანის” თავდასხმები უმეტესად სამართალდამცავებისკენ იყო მიზანმიმართული.
2018 წელს 3600 სამხედრო და პოლიციის თანამშრომელი დაიღუპა “თალიბანის” თავდასხმების შედეგად.
2018 წლის ბოლოს ამერიკის შეერთებულმა შტატებმა სამშვიდობო მოლაპარაკებები დაიწყო თალიბებთან, თუმცა, პრეზიდენტმა ტრამპმა ეს ოფიციალური მოლაპარაკებები 2019 წლის სექტემბერში ქაბულში მომხდარი თავდასხმის შემდეგ შეწყვიტა. აღნიშნულ თავდასხმას ათეულობით ადამიანი ემსხვერპლა, მათ შორის ამერიკელი ჯარისკაცი.
“ისლამური სახელმწიფო” კი 2018 წელს 1323 ადამიანის დაღუპვაზეა პასუხისმგებელი, რაც გასულ წლებთან შედარებით დაბალი მაჩვენებელია.
როგორც კვლევაშია აღნიშნული, “ისლამური სახელმწიფოს” საქმიანობის მკვეთრი ვარდნა ძირითადად ადგილობროვი ძალების და ამერიკის შეერთებული შტატების მეთაურობით საერთაშორისო კოალიციის წარმატებამ განაპირობა.
