მსახიობ ანდრო ჭიჭინაძის დედა, ლიკა გუნცაძე მისი შვილის დაკავების დეტალებზე საუბრობს.
“ეზოში 60-მდე პოლიციელი დამხვდა, შევარდი კორდონში, ვყვიროდი. ანდრო მშვიდად იყო, მითხრა, დედა არ ინერვიულოო. რაღაცის ორგანიზებას აბრალებენ, რომელი თავდამსხმელი ანდროა?! დგას, მიტინგებზე, მეც მანდ ვარ, ერთად ვებრძვით! სხვისი ხელით ამ საქმის გაკეთება არ შეიძლება.
ჩვენს სახლში, პოლიციელები დიდი ხნის განმავლობაში იყვნენ, აგრესიულები არ იყვნენ, არ უცემიათ, თუმცა ელოდებოდნენ “იმედის” ტელევიზიას საჩვენებლად რომ დაეკავებინათ!
საბოლოო ჯამში, მოლოდინი ყველაფრის მქონდა, ჩემზე უფრო მქონდა მოლოდინი, ადგან უფრო აქტიური ვარ, ვიდრე ანდრო. პირდაპირ ვამბობ – მე არ მეშინია. იმაზე მეშლება ნერვები, რომ რუსთაველზე რაც ხდებოდა, იმას ვერ ვადევნე თვალი. თანაგრძნობა ვერ გამოვხატე, მათ მიმართ, ვინც სასტიკად სცემეს. მრცხვენია, რომ რუსთაველის გამზირზე არ ვარ. თავად ანდრო მხნედაა, ძალიან მინდა, ყველა დაკავებულს გათავისუფლება, დაშავებულებს გამოჯანმრთელებას ვუსურვებ. მინდა, ჩემი შვილი მალე ვნახო,”- თქვა დაკავებულის დედამ ტვ “პირველთან”.
ინფორმაციისთვის, პოლიციამ ჯგუფური ძალადობის ორგანიზების, ხელმძღვანელობის, მასში მონაწილეობისა და ძალადობრივი ქმედებისაკენ საჯაროდ მოწოდების ბრალდებით 5 პირი დააკავა. დაკავებულთა შორის არიან იუმორისტი ონისე ცხადაძე და მსახიობი ანდრო ჭიჭინაძე. მათ 9 წლამდე ვადით თავისუფლების აღკვეთა ემუქრებათ.
როგორც შინაგან საქმეთა სამინისტროში აცხადებენ:_ კომპლექსურად ჩატარებული საგამოძიებო მოქმედებების შედეგად დადგინდა, რომ ბრალდებულები რუსთაველის გამზირზე, მიმდინარე აქციების დროს არ ემორჩილებოდნენ და წინააღმდეგობას უწევდნენ შინაგან საქმეთა სამინისტროს თანამშრომლებს, ასევე აქტიურად მონაწილეობდნენ ჯგუფურ ძალადობაში და პოლიციელების მიმართულებით სხვადასხვა საგანს ისროდნენ.
სამართალდამცველებმა ბრალდებულების პირადი და საცხოვრებელი სახლების ჩხრეკისას მობილური ტელეფონები, კომპიუტერული ტექნიკა, სამხედრო ტანსაცმელი, აირწინაღები ნივთმტკიცებად ამოიღეს.
ასევე, მიმდინარე გამოძიების ფარგლებში, გადაუდებელი აუცილებლობიდან გამომდინარე თბილისში 4 პირის საცხოვრებელ ბინაში ჩხრეკა ჩატარდა, საიდანაც სამართალდამცველებმა ცეცხლსასროლი იარაღები, დიდი ოდენობით თანხა, მეხსიერების ბარათები და კომპიუტერული ტექნიკა ამოიღეს.
