სახელმწიფო საქართველოს სამოციქულო მართლმადიდებლურ ეკლესიას ჩოხატაურის მუნიციპალიტეტში მდებარე სახელმწიფო ქონებას სიმბოლურ ფასად გადასცემს.
“სახელმწიფო ქონების შესახებ” საქართველოს კანონის მე-18 მუხლის მე-3 პუნქტის შესაბამისად, სახელმწიფო საკუთრებაში არსებული, ჩოხატაურის მუნიციპალიტეტში, კურორტ ბახმაროში მდებარე 500.00 კვ/მ არასასოფლო–სამეურნეო დანიშნულების მიწის ნაკვეთი (მიწის (უძრავი ქონების) საკადასტრო კოდი: №28.25.01.480) პირდაპირი მიყიდვის ფორმით, 1 (ერთი) ლარად, საკუთრებაში გადაეცეს საქართველოს სამოციქულო ავტოკეფალურ მართლმადიდებელ ეკლესიას.
- ამ განკარგულების პირველ პუნქტში მითითებული უძრავი ქონების საპრივატიზებო პირობად განისაზღვროს საპრივატიზებო თანხის გადახდა შესაბამისი ხელშეკრულების გაფორმებიდან 1 (ერთი) თვის ვადაში.
- საქართველოს ეკონომიკისა და მდგრადი განვითარების სამინისტროს სისტემაში შემავალმა სსიპ – სახელმწიფო ქონების ეროვნულმა სააგენტომ, ამ განკარგულების შესრულების მიზნით, უზრუნველყოს კანონმდებლობით გათვალისწინებული ღონისძიებების განხორციელება“, _ წერია მთავრობის განკარგულებაში, რომელსაც ხელს ირაკლი კობახიძე აწერს.
კითხვაზე, თუ რას გეგმავს საპატრიარქო ბახმაროში, საპატრიარქოს პრესსამსახურმა შემოქმედის ეპარქიასთან გადაგვამისამართა.
როგორც შემოქმედის ეპარქიის პრესსამსახურმა, დეკანოზმა ბასილ გოგოტიშვილმა გვითხრა, ბახმაროში ტაძრის აშენებას აპირებენ.
დეკანოზ ბასილის თქმითვე, ტაძარი წმინდა პანტელეიმონ მკურნალის სახელობის იქნება.
როგორც ეპარქიაში ამბობენ, ტაძრის ასაშენებლად ადგილი მრევლის თხოვნით შეირჩა.
“ტაძარი უნდა იყოს წმინდა პანტელეიმონ მკურნალის სახელობის. ზემოთ არის ფერისცვალების ტაძარი. წლების განმავლობაში ბახმარო ისე გაშენიანდა, ძირითადი მოსახლეობა არის გურია–აჭარის ქუჩაზე, რომლებიც სულ გამოთქვამდნენ სურვილს, რომ ერთი ტაძარი ქვემოთაც იყოს, რადგან ზემოთ ბავშვებთან ერთად ვერ ამოდიან. მეუფემ ითხოვა, თუ იქნებოდა შესაძლებელი საზოგადოების აზრიდან გამომდინარე აქ ტაძრის აშენება და სახელმწიფომ კეთილი ნებით გადმოგვეცა ადგილი“, _ გვპასუხობს ეპარქიის პრესსამსახური.
_ ვინ იქნება ტაძრის არქიტექტორი?
_ ამ დროისთვის სახსრების მოძიების პროცესში ვართ. როგორი იქნება პროექტი და ა. შ. ჯერ ეს დეტალები არ არის ჩამოყალიბებული. ვეძებთ სახსრებს და დეტალები ცნობილი შემდეგ გახდება.
ინფორმაციისთვის, წმ. პანტელეიმონ მკურნალის ხსენების დღეს საქართველოს წმინდა სამოციქულო ეკლესია 9 აგვისტოს აღნიშნავს. ეს არის დღე წმინდა მკურნალის მოწამებრივი აღსასრულისა. წმინდა მოწამისა და მკურნალის წმინდა ნაწილები მთელ საქრისტიანოშია განფენილი და მორწმუნეები დღესაც იღებენ კურნებას.
ცნობისთვის, მამით წარმართი, ხოლო დედით ქრისტიანი დიდმოწამე და მკურნალი პანტელეიმონი მეოთხე საუკუნეში მოღვაწეობდა ქალაქ ნიკომიდიაში, საბერძნეთში.
ავტორი
