გამოცემამ „გაძეტა დელო სპორტმა” შეადგინა იმ ფეხბურთელთა სიმბოლური ნაკრები, რომლებიც სხვადასხვა მიზეზით მსოფლიოს ჩემპიონატზე არ იქნებიან.
ამ სიმბოლურ ნაკრებში მოხვდა ხვიჩა კვარაცხელიაც. აქვეა მისი თანაგუნდელი ვიქტორ ოსიმენიც…
დონარუმა (იტალია), კუადრადო (კოლუმბია), შკრინიარი (სლოვაკეთი), ალაბა (ავსტრია), რობერტსონი (შოტლანდია), ვერატი (იტალია), ბარელა (იტალია), სალაჰი (ეგვიპტე), კვარაცხელია (საქართველო), ოსიმენი (ნიგერია), ჰალანდი (ნორვეგია).
რამდენიმე კვირის წინ გავრცელდა ინფორმაცია, რომ ტურინის „იუვენტუსი“ ახალ მეკარეს ეძებდა და განსაკუთრებულ მიზნად გიორგი მამარდაშვილის ტრანსფერს ისახავდა. გუშინ გამოცემამ „Gazzetta dello Sport“ გაავრცელა ცნობა რომ ტურინული კლუბის ხელმძღვანელობის მთავარი სამიზნე „ემპოლის“ კარის დარაჯი გილერმო ვიკარიოა.
მამარდაშვილს „ვალენსიაში“ ჩინებული ასპარეზობის შემდეგ კლუბმა კონტრაქტი 2027 წლამდე გაუხანგრძლივა და გამოსასყიდი თანხაც 100 მილიონ ევრომდე ასწია. რაც სოლიდური თანხაა.
რაც შეეხება ვიკარიოს ტრანსფერს, თუ მხარეები შეთანხმდებიან, ფეხბურთელი სეზონს „ემპოლიში“ დაასრულებს, ზაფხულში კი „იუვენტუსის“ შემადგენლობაში გადავა.
გუშინ გამოცემამ „Manchester Evening“ გაავრცელა ინფორმაცია რომ, „მანჩესტერ იუნაიტედის“ ფეხბურთელების დიდი ნაწილის აზრით კრიშტიანო რონალდო გუნდში აღარ უნდა დარჩეს.
მოთამაშეები ითხოვენ რომ 37 წლის პორტუგალიელმა „იუნაიტედი“ იანვრის სატრანსფერო პერიოდში დატოვოს და ერთ-ერთი მათგანი ბრუნო ფერნანდეშია – რონალდოს თანაგუნდელი ეროვნულ ნაკრებში. ფერნანდეშსა და რონალდოს შორის გარკვეული გაუგებრობა უკვე კარგა ხანია არსებობს.
გუშინ, არგენტინის ნაკრების კაპიტანმა ლეო მესიმ მომავალი მსოფლიო ჩემპიონატის ფავორიტები დაასახელა.
„სუსტი არც ერთი გუნდი არაა. გამარჯვება ძნელი იქნება. არგენტინა ევროპელებთან ხშირად არ თამაშობდა. კარგ ფორმაში ჩამოვედით, მაგრამ ამ სახალხო სიგიჟეს არ უნდა ავყვეთ და თავი ფავორიტად არ უნდა მივიჩნიოთ. ობიექტურობა გვმართებს და ნაბიჯ-ნაბიჯ წინსვლა.
ვფიქრობ, მიუხედავად ფეხბურთელთა ტრავმებისა, საფრანგეთს უზარმაზარი პოტენციალი გააჩნია. ბევრი კარგი მოთამაშე და მწვრთნელი ჰყავთ, რომელიც ნაკრებში დიდი ხანია მუშაობს. მსოფლიო ჩემპიონატი მოგებული აქვთ.
ბრაზილია მაღალი კლასის ფეხბურთელებითაა დაკომპლექტებული. ჰყავთ ათიანი, ჰყავთ ნეიმარი“, – განაცხადა ლეო მესიმ.
კატარში კი, გუშინ, დიდი სკანდალი დაფიქსირდა. დანიელ ჟურნალისტებს Live-ჩართვის დროს გადაღებები შეაწყვეტინეს. უსაფრთხოების სამსახურის თანამშრომლებმა ოპერატორს კამერა წაართვეს და მისი დამტვრევითაც ემუქრებოდნენ. ეს იმ დროს, როცა მსოფლიოს ჩემპიონატი რამდენიმე დღეში, კვირას იწყება.
დანიური TV2-ის რეპორტიორმა რასმუს ტანთოლდტმა კატარელ სამართალდამცავებს თავისი აკრედიტაცია უჩვენა და შეეცადა აეხსნა, რომ საჯარო სივრცეში გადაღების უფლება ჰქონდა.
„თქვენ აქ მთელი მსოფლიო დაპატიჟეთ. რატომ არ შეგვიძლია გადაღება? ეს ხომ საჯარო სივრცეა. ჩვენ გვაქვს უფლება, რომ აქ გადავიღოთ“. – ეუბნებოდა ის კატარელებს.
ჟურნალისტის ამ სიტყვებს კატარელის მუქარა მოჰყვა – ის კამერის დამტვრევით იმუქრებოდა. ამან დანიელი ჟურნალისტიც ცოტა გააბრაზა: „თქვენ შეგიძლიათ კამერის დამტვრევა. ამის გაკეთება გინდა? კარგი, მიდი, დაამტვრიე“.
მოგვიანებით, ტანთოლდტი სხვა ტელევიზიას, NRK-ს ჩაერთო და თქვა, რომ მსოფლიოს ჩემპიონატის საერთაშორისო მედიის დეპარტამენტმა მას ოფიციალურად მოუბოდიშა მომხდარის გამო. თუმცა გამოცდილი ჟურნალისტი ამბობს, რომ უკვე შიშობს, უარესები არ მოხდეს.
„არა მგონია, რომ კატარში ყველა პოლიციელმა იცოდეს, როგორ უნდა მოიქცნენ მსოფლიოს ჩემპიონატის დროს. ეჭვი მეპარება, რომ მათ კარგად გაიგეს, რა ხდება ამ ქვეყანაში ამ ერთი თვის განმავლობაში. ეს შემთხვევა კარგად ასახავს, რა ხდება კატარში. საჯარო სივრცეში გადაღების აკრძალვა და თან ასეთი უხეშობით? კატარი თავისუფალი და დემოკრატიული ქვეყანა არ არის“ – თქვა 49 წლის დანიელმა ჟურნალისტმა.
ავტორი
