გუშინ რუსულ მასმედიაში საქართველოს ნაკრებისა და “რუბინის” მოთამაშე ხვიჩა კვარაცხელია მიმდინარე სეზონში იქაურ პრემიერლიგაში წარუმატებელი თამაშის გამო გააკრიტიკეს.
“sportbox”: “იყო კი ხვიჩა?”
“liveresult”: “ქართველი უკვე ტოპი აღარაა”.
“championat.ru”: “ხვიჩა უკვე ევროპაშია. ახლა როგორ დაბრუნდეს რუსეთში?”.
რუსმა ჟურნალისტმა მიხაილ როჟდესტვენსკიმ კვარაცხელიაზე შემდეგი მოსაზრება გამოაქვეყნა:
“გასულ სეზონში მოჩანდა, რომ რუსეთის პრემიერლიგაში ნამდვილი ბრილიანტი გამოჩნდა, რომელიც ორი ათეული მილიონი ევროს სანაცვლოდ მზად იყო უახლოეს ხანში ევროპის ტოპ-ჩემპიონატში გადასულიყო. ზაფხულში ყველაფერი ამისაკენ მიდიოდა, მაგრამ ტრანსფერი არ შედგა და ხვიჩა დანაღვლიანდა. იმის ნაცვლად, რომ განვითარება განეგრძო და თავისი ფასი აემაღლებინა, საკუთარ აჩრდილად გადაიქცა, რამაც “რუბინის” შედეგებზე ძალიან იმოქმედა. მხოლოდ 2 შედეგიანი მოქმედება 12 მატჩში _ აბსოლუტური გაკოტრება გასულ სეზონთან შედარებით. რა თქმა უნდა, ხვიჩას გონზე მოსასვლელად კიდევ აქვს შანსი, მაგრამ ასეთი გარდასახვის ცქერა საწყენია”.
საინტერესოა, რომ არსად არაფერია ნათქვამი, ხვიჩას მიერ შვედეთთან შესრულებულ დუბლზე, რამაც მთელი საფეხბურთო ევროპა მასზე კვლავ აალაპარაკა და იმაზე, რომ “რუბინმა” მაღალი სატრანსფერო ფასის გამო პრობლემები შეუქმნა.
რუსეთის 2021/22 წლების პრემიერლიგის პირველ წრეში ხვიჩა კვარაცხელიამ “რუბინის” ღირსება 12 მატჩში დაიცვა და გოლითა და ორი საგოლე პასით გამოირჩა, 4-ჯერ კი გააფრთხილეს. მისმა გუნდმა გასულ 15 ტურში 22 ქულა მოიპოვა და სატურნირო ცხრილში მე-8 ადგილზეა.
ხვიჩა კვარაცხელიას რუსეთში, იმედია, დროებითი პრობლემები შეექმნა. აი, საქართველოს ნაკრების მოთამაშემ გიორგი შერმადინმა კი საკალათბურთო ესპანეთი კიდევ ერთხელ აალაპარაკა.
ორი დღის წინ ვებ-გვერდმა “Eurobasket” “ტენერიფეს” ქართველი ცენტრი გიორგი შერმადინი ესპანეთის ჩემპიონატის მე-11 ტურის საუკეთესო მოთამაშედ დაასახელა. ეს გასაკვირი ნამდვილად არ ყოფილა, რადგანაც “გრან კანარიასთან” მოგებულ (98:89) მატჩში შერმადინის სარგებლიანობის კოეფიციენტი 41-ს გაუტოლდა.
“ტენერიფელთა გამოცდილ კალათბურთელ გიორგი შერმადინს საოცარი საღამო ჰქონდა და საუკეთესოს ტიტული დამსახურებულად მიიღო. 32 წლის ცენტრმა 25 ქულა და 10 მოხსნა მიითვალა და ორმაგი დუბლის წყალობით, “გრან კანარიასთან” მოგებაში უდიდესი როლი ითამაშა. ტენერიფელები “ლიგა ენდესაში” მე-3 ადგილზე იმყოფებიან და უკეთესი შედეგიც ექნებოდათ, სეზონის სტარტზე რამდენიმე მოულოდნელი მარცხი რომ არ განეცადათ. რაც შეეხება შერმადინს, მას წლები კი ემატება, თუმცა, პირიქით უკეთესი ხდება. მიმდინარე სეზონში მისი საშუალო მონაგარი 13.5 ქულა და 6.0 მოხსნაა”.
გუშინ ფიბამ თითოეულ პოზიციაზე 10-10 გამორჩეული კალათბურთელი დააასახელა, რომელთაც მსოფლიოს 2023 წლის ჩემპიონატის საკვალიფიკაციო ციკლში განსაკუთრებული ყურადღება უნდა მივაქციოთ. ჩამონათვალში საქართველოს ნაკრების ორი წევრიცაა: ცენტრებს შორის გიორგი შერმადინი, ხოლო მძიმე ფორვარდებში _ ბექა ბურჯანაძე.
“2.17 მეტრი სიმაღლის ცენტრის თმებში შერეული ჭაღარა იმაზე მეტყველებს, რა სტრესის ქვეშ უწევთ კალათბურთელებს თამაში, რათა გუნდებს გამარჯვებისკენ გაუძღვნენ. მწვრთნელებმა კარგად იციან, რომ თუ ბურთს გიორგი შერმადინამდე ჩაიტანენ, ის დიდი ალბათობით, ჩააგდებს. 32 წლის ქართველი ცენტრი საუკეთესო ფორმაშია. ევრობასკეტის საკვალიფიკაციო ციკლში შედეგიანობის მხრივ მე-6 იყო და მის თამაშს ახლაც უდიდესი მნიშვნელობა ექნება საქართველოს ნაკრებისთვის, რომელიც ეცდება, მსოფლიოს ჩემპიონატის ფინალურ ეტაპზე პირველად გავიდეს”.
გიორგის გარდა, საუკეთესო ცენტრებს შორის ჟუ ქი (ჩინეთი), ჯორდან ბელი (აშშ), ოლეკ ბალცეროვსკი (პოლონეთი), დენგ გეუ (უგანდა), ტიბორ პლეისი (გერმანია), ჯილსონ ბანგო (ანგოლა), ფურკან ჰალტალი (თურქეთი), მოჰამედ ალ სუვაილემი (საუდის არაბეთი) და ისმაელ ბაკო (ბელგია) მოხვდნენ.
გიორგი შერმადინი და ბექა ბურჯანაძე მსოფლიოს ჩემპიონატის საკვალიფიკაციო ციკლის მატჩებისთვის ემზადებიან. საქართველოს ეროვნული გუნდი 26 ნოემბერს თბილისში უკრაინას უმასპინძლებს, 29-ში კი, ხაენში, ესპანეთს გაეჯიბრება. ჯგუფიდან, რომელშიც ჩრდილოეთ მაკედონიაც ირიცხება, შემდეგ ეტაპზე 3 საუკეთესო ნაკრები გავა.
საქართველოს ეროვნული ნაკრებისა და კლუბი “სერენის” 21 წლის თავდამსხმელი გიორგი მიქაუტაძე კი ბელგიის “ჟუპილერ ლიგის” მე-15 ტურის სიმბოლურ ნაკრებში მოხვდა. ქართველი ფეხბურთელი საუკეთესო თერთმეტეულში გამოცემამ “Voetbalkrant” დაასახელა.
მიქაუტაძის გუნდმა ლევან შენგელიას “ლიოვენთან” იმარჯვა – 3:1. გიორგი სასტარტო შემადგენლობაში იყო (89-ე წუთზე შეცვალეს) და მე-20 წუთზე ბრწყინვალე გოლი გაიტანა, რომელიც მისთვის “ჟუპილერ ლიგაში” მეექვსეა. 71-ე წუთზე კი მან ჩემპიონატში პირველი საგოლე პასი გააკეთა.
[sexy_author_bio]
