გუშინ გამოცემა „Евро-Футбол.Ру“-სთან საუბარში, რუსმა საფეხბურთო ფუნქციონერმა პაველ სტიპიდამ იტალიის პირველობის დონე გააკრიტიკა, შემდეგ კი ხვიჩა კვარაცხელიას გადაწვდა და მისი „ნაპოლიში“ გადასვლა ეჭვის ქვეშ დააყენა.
„შეხედეთ იტალიის ჩემპიონატს, რას დაემსგავსა? წაიკითხეთ ამ ლიგაში ადრე მოთამაშე საუკეთესო ფეხბურთელების „სერია A“-ზე გამონათქვამები. ისინი ამბობენ, რომ დღეს იტალიის ჩემპიონატი ფსკერია და მე ვეთანხმები. როდესაც ადამიანები 36, 38, 42 წლის ასაკში თამაშობენ, ეს ქვეითად მოსიარულეთა ფეხბურთი გამოდის.
თუმცა კვარაცხელია თვით იტალიაშიც ვერ ათამაშდება, რადგან ისევ ვამბობ, მისი დონე – საქართველოს ჩემპიონატია. რუსეთში მან ცოტა გაიბრწყინა და სწრაფად ჩაქრა. ჩვენთან ჟურნალისტებმა მისგან პირდაპირ პელე შექმნეს, ის კი უცბად ჩაიფუშა. თუ ძლიერი ფეხბურთელია, ვინ უშლიდა ხელს? მე საერთოდ ძალიან ეჭვი მეპარება, რომ მართლა აღმოჩნდება „ნაპოლიში“.
გუშინ გამოცემამ „Basketnews“ თორნიკე შენგელიას წერილი მიუძღვნა და გაავრცელა ინფორმაცია, რომ საქართველოს ნაკრების მოთამაშე უახლოესი ორი სეზონის განმავლობაში იტალიურ „ვირტუსში“ ითამაშებს.
„თორნიკე შენგელიასა და დენიელ ჰეკეტის მისვლით, ბოლონიელებმა სეზონის ყველაზე მნიშვნელოვან მომენტში დიდი ძალა შეიძინეს. გამოცდილება, ლიდერისთვის აუცილებელი თვისებები, კარგი დაცვა – ეს ის კომპონენტებია, რომლებიც აღნიშნულმა კალათბურთელებმა სერჯო სკარიოლოს გუნდში მიიტანეს.
შენგელიამ „ვირტუსთან“ კონტრაქტი სეზონის ბოლომდე გააფორმა და თავდაპირველი ვარაუდით, ბოლონიელებს მისი შენარჩუნება ძალიან უნდა გასჭირვებოდათ. ახლა, სიტუაცია შეიცვალა, ჩვენი ინფორმაციით, ფაქტობრივად გადაწყვეტილია, რომ თორნიკე იტალიურ კლუბში მინიმუმ კიდევ ორი სეზონი დარჩება“.
გუშინ გავრცელდა ცნობა რომ პოლონეთის ნაკრების თავდამსხმელი რობერტ ლევანდოვსკი „ბაიერნის“ ქმედებით იმედგაცრუებულია და კლუბის დატოვება სურს.
გამოცემა „Bild“-ის მტკიცებით, პოლონელი უკმაყოფილოა, რომ „ბაიერნი“ ერლინგ ჰოლანდის შეძენას ფარულად ცდილობდა და ყველაფერი მას შემდეგ გამოაშკარავდა, რაც „სიტიმ“ ტრანსფერის ოფიციალურად დახურვის შემდეგ გამოაცხადა.
ცნობილია რომ ლევანდოვსკი „ბარსელონაში“ გადასვლას ცდილობს და კლუბთან სიტყვიერი შეთანხმებაც აქვს. „ბაიერნი“ ამის წინააღმდეგია, თუმცა პარალელურად როგორც გაირკვა ჰოლანდზე მუშაობდნენ, რაც პოლონელის ავტომატურად გუნდიდან გაშვებას ნიშნავდა.
გუშინ „უეფა“-ს პრეზიდენტმა, ალექსანდრ მედიასთან რუსეთის ნაკრებსა და რუსულ კლუბებზე დაწესებულ სანქციებზე ისაუბრა:
„როდესაც უეფამ ჩემპიონთა ლიგის ფინალი სანქტ-პეტერბურგიდან პარიზში გადაიტანა, ეს პირველ რიგში უსაფრთხოების თვალსაზრისით იყო გამოწვეული. ასეთ დროს ფეხბურთია გამარჯვებული. სანქციების დაწესებით, გვინდა ჩვენი წვლილი შევიტანოთ კონტინენტზე მშვიდობის დასამყარებლად. ეს სახიფათო პრეცედენტია, მაგრამ ამ შემთხვევაში მიზეზი ყველაფერზე მნიშვნელოვანია. ეჭვგარეშეა, რომ რუსეთისთვის ამ რთულ დროს ფეხბურთი გახდა დამარცხებული. ძალიან მტკენს გულს ის ფაქტი, რომ ფეხბურთელებს, მწვრთნელებს და გულშემატკივრებს არ შეუძლიათ საკუთარ მიზნებისკენ და ოცნებებისკენ სწრაფვა“.
რამდენიმე დღის წინ უეფამ რუსეთი ყველა საერთაშორისო ტურნირზე 2022/23 წლების სეზონიდანაც მოკვეთა.
უკრაინის ნაკრების მთავარმა მწვრთნელმა ალექსანდრ პეტრაკოვმა კი გუშინ პრესკონფერენცია გამართა და „გლადბახთან“ გასამართ მატჩზე ისაუბრა. პეტრაკოვი უკრაინაში მიმდინარე მოვლენებსაც შეეხო:
„გერმანიაში ჩამოსვლისას შესანიშნავი დახვედრა მოგვიწყვეს. გამოცდილი ადამიანი ვარ და ვხედავ, რომ ჩვენ მიმართ დადებითი დამოკიდებულება და კეთილი სურვილები აქვთ. ვერასდროს ვიფიქრებდი, რომ გერმანიაში ვიქნებოდი, გერმანელებს ჩემ მიმართ კეთილი სურვილები ექნებოდათ, რუსი „ძმები“ კი ჩემი თანამემამულეების დახოცვით იქნებოდნენ დაკავებული, თუმცა დარწმუნებული ვარ, ყველაფერი კარგად დასრულდება“.
უკრაინის ნაკრები მოედანს დიდხნიანი პაუზის შემდეგ უბრუნდება და მსოფლიო ჩემპიონატის საკვალიფიკაციო ეტაპის ფლეიოფის მატჩებისთვის მზადებას იწყებს.
ავტორი
