ევროპის საბჭოს საპარლამენტო ასამბლეამ ორგანიზაციიდან რუსეთის გარიცხვას მხარი დაუჭირა. გადაწყვეტილებას 216 მომხრე ჰყავდა, რუსეთის გარიცხვის წინააღმდეგ კი მხარი არავის მიუცია.
“ევროპის საბჭოს საპარლამენტო ასამბლეამ 25-წლიანი წევრობის შემდეგ მხარი დაუჭირა რუსეთის გარიცხვას. ვწუხვარ, რომ ამის გაკეთება გვიწევს, მაგრამ მოხარული ვარ, რომ გავბედეთ პირველად ისტორიის განმავლობაში. ჩვენს წევრ სახელმწიფოზე, უკრაინაზე სასტიკი აგრესია მიუღებელია. დაასრულეთ ომი ახლავე”, – წერს ევროპის საბჭოს საპარლამენტო ასამბლეის პრეზიდენტი, ტინი კოქსი Twitter-ზე.
მანამდე კი რუსეთის საგარეო საქმეთა სამინისტრომ გაავრცელა ინფორმაცია და ევროსაბჭოს გადაწყვეტილების მიღება თავად “დაასწრო”.
“ნატოს და ევროკავშირის ქვეყნები ბოროტად იყენებენ თავიანთ უმრავლესობას ევროსაბჭოში. ეს ორგანიზაცია გადააქციეს ანტირუსული პოლიტიკის ინსტრუმენტად. უარს აცხადებენ თანაბარ დიალოგსა და ყველა იმ პრინციპზე, რის საფუძველზეც შეიქმნა ეს საერთო ევროპული სტრუქტურა. 25 თებერვალს მათ მიიღეს დისკრიმინაციული გადაწყვეტილება ევროპის საბჭოს ნორმატიულ ორგანოებში რუსეთის წარმომადგენლობის შეჩერების შესახებ. ასეთ პირობებში ჩვენი ქვეყანა არ დარჩება ევროპის საბჭოში” – წერია განცხადებაში.
უკრაინაში რუსეთის შეჭრის შემდეგ, 25 თებერვალს, ევროსაბჭოს მინისტრთა კომიტეტმა მხარი დაუჭირა რუსეთისთვის წარმომადგენლობითი უფლებების შეჩერებას.
ავტორი: მერაბ ცაავა
