ყაზახეთში კოლექტიური თავდაცვის შეთანხმების ორგანიზაციის (ОДКБ) ე.წ. სამშვიდობო ოპერაციის ფარგლებში, რუსეთი სამხედრო გვარდიის 45-ე სპეცდანიშნულების ბრიგადას გზავნის, რომლებიც 2008 წლის აგვისტოს ომში მონაწილეობდნენ – ამის შესახებ ინფორმაციას BBC ავრცელებს.
გამოცემის ცნობით, ეს არის რუსული არმიის ერთ-ერთი ყველაზე ელიტური ქვედანაყოფი. ამ ქვედანაყოფის სამხედროებმა მონაწილეობა მიიღეს ჩეჩნეთის პირველ და მეორე ომებში, 2008 წლის რუსეთ-საქართველოს ომში, 2014 წელს რუსეთის მიერ ყირიმის ანექსიის ოპერაციაში, ასევე სირიის ომში.
45-ე ბრიგადის ძირითადი დანიშნულება კომპლექსური სადაზვერვო ოპერაციებისა და დივერსიული ოპერაციების ჩატარებაა.
BBC წერს, რომ არაერთი მედიასაშუალების ცნობით, ამ ქვედანაყოფის სამხედროებს აქვთ სამშვიდობო ოპერაციებში მონაწილეობის გამოცდილება – ბოსნია და ჰერცეგოვინაში 1996 წელს, ქართულ-აფხაზური კონფლიქტის ზონაში 1998 წელს და კოსოვოში 1999 წელს.
