აფხაზეთში რუსეთის ე.წ. ელჩმა, ალექსსეი დვინიანმა, „სპუტნიკ-აფხაზეთის” მიერ მოწყობილ ვიდეო-კონფერენციაში აფხაზეთის ე.წ. „პარლამენტს” მოუწოდა, აფხაზეთის ენერგო, ტურისტულ და სოფლის მეურნეობის სექტორში რუსული ინვესტიციების მოზიდვისათვის, დე ფაქტო საკანონმდებლო ორგანომ ე.წ მთავრობასა და პრეზიდენტს საჭირო ცვლილებების განხორციელებასა და აფხაზური „კანონმდებლობის” რუსულ კანონმდებლობასთან ჰარმონიზაციაში მოსაყვანად მხარი დაუჭიროს.
თუმცა, აფხაზეთის არსებული „კანონმდებლობა” სინამდვილეში რუსულ ინვესტიციებს სულაც არ ზღუდავს, პირიქით – ის გარკვეულ პრეფერენციებსაც კი სთავაზობს მათ. რეალურად, რუსი „დიპლომატი” აფხაზეთის იმ „კანონზე” მიუთითებდა, რომელიც ენერგო ინფრასტრუქტურის გაყიდვას კრძალავს.
აღნიშნული განცხადება მიუთითებს რუსეთის სურვილზე, იყიდოს და სრულად გააკონტროლოს აფხაზეთის ენერგოსექტორი, რაც აფხაზეთს რუსეთზე კიდევ უფრო მეტად დამოკიდებულს გახდის, გაზრდის კრემლის ზემოქმედების მექანიზმებს და რუსეთის მიერ აფხაზეთის ანექსიის პროცესს შეუწყობს ხელს. დვინიანის განცხადებიდან ჩანს, რომ აფხაზეთის დე ფაქტო მთავრობა აღნიშნულ საკითხზე რუსეთთან აქტიურად მუშაობს, ხოლო ე.წ. პარლამენტი ინიციატივას მკაცრად ეწინააღმდეგება.
წყარო: “საქართველოს გუშაგი“
