10 ოპოზიციური პარტიის საპრეზიდენტო კანდიდატს, „ნაციონალური მოძრაობის“ პოლიტსაბჭოს წევრს, გრიგოლ ვაშაძეს წინასაარჩევნოდ თავის მართლება უწევს.
საქმე ეხება, 2008 წლის აგვისტოს ომიდან, დაახლოებით, სამი თვის შემდეგ, რუსეთში გაგზავნილ წერილს, რომლითაც მაშინდელი საგარეო საქმეთა მინისტრი, გრიგოლ ვაშაძე რუსეთის კულტურის მინისტრს ქართული ანსამბლების, თეატრების, კონცერტებისა და სპექტაკლების ჩატარებას სთავაზობს.
მმართველ გუნდში გრიგოლ ვაშაძეს რუსეთში გაგზავნილი წერილის გამო აკრიტიკებენ და აცხადებენ, რომ საპრეზიდენტო კანდიდატის ქმედება დანაშაულია.
ფრაქცია „ქართული ოცნება – სოციალ-დემოკრატების“ თავმჯდომარე გია ჟორჟოლიანი ,,გურია ნიუსთან“ საუბრისას აღნიშნავს, რომ ვაშაძის საქციელი გაუმართელებელი და ლოგიკას მოკლებულია.
,,ზუსტი ინფორმაცია იმის თაობაზე ასეთი წერილი იყო თუ არა გაგზავნილი, არ მაქვს, მაგრამ თუ ასეთ ფაქტს ჰქონდა ადგილი, რასაკვირველია, პირდაპირ რომ ვთქვათ, შეცდომა იყო. არასწორი ნაბიჯია ნამდვილად. ვერავითარ ლოგიკას ამაში ვერ ვხედავ. ბუნებრივია, ვაშაძეს მხარს არ ვუჭერ და ვფიქრობ, არც ჩვენი მოსახლეობის დიდი ნაწილი დაუჭერს მხარს“, _ გვითხრა ჟორჟოლიანმა.
,,ნაციონალურ მოძრაობაში“ საკითხთან დაკავშირებით, ჯერჯერობით, კომენტარს არ აკეთებენ. როგორც პარტიის თავმჯდომარემ, რომან გოცირიძემ ,,გურია ნიუსს“ განუცხადა, ვაშაძის წერილთან დაკავშირებით არაფერი იცის, ამიტომ კომენტარს მოგვიანებით გააკეთებს.
,,არ ვარ საქმის კურსში, ახლა მივდივარ გრიგოლ ვაშაძის საარჩევნო კამპანიაში, ვკითხავ და ამის შემდეგ გავაკეთებ კომენტარს“, _ გვითხრა გოცირიძემ
გრიგოლ ვაშაძე სატელეფონო ზარებს ამ დრომდე არ პასუხობს.
