რუსი პოლიტიკოსი, იგორ ლებედევი 2018 წლის მსოფლიო თასის წინ საფეხბურთო ხულიგნობის ლეგალიზაციას ითხოვს. აღნიშნულ ინფორმაციას THE INDEPENDENT ავრცელებს.
მისი თქმით, ხულიგნობის ლეგალიზაცია ფეხბურთს ყურებად სპორტს გახდის.
როგორც ცნობილია, გასული წლის ევროპის ჩემპიონატზე მარსელში რუსი მხარდამჭერების ორგანიზებული ჯგუფი ინგლისელ გულშემატკივრებს დაუპირისპირდა.
მაუწყებლის ინფორმაციით, ლებედევმა შეადგინა წესები, რასაც „დრაკა“, ახალი სიტყვა უწოდა, რაც რუსულად ომს ნიშნავს.
„რუსეთი იქნება პიონერი ახალ სპორტში“, _ განაცხადა ლებედევმა და აღნიშნა, რომ სხვადასხვა გუნდების გულშემატკივრებს შორის ჩხუბმა შესაძლოა ათასობით ადამიანის ყურადღება მიიპყროს.
„მაგალითად, „ინგლისის“ გულშემაკტივარები ჩამოვლენ და დაიწყება შეგროვება ბრძოლისთვის. ისინი მიიღებენ პასუხს_ გამოწვევა მიღებულია. შეხვედრა სტადიონზე ამა და ამ დროს შედგება“,_ამბობს ლებედევი.
მაუწყებლის ცნობით, რუსეთში მხარდამჭერების ნაწილი წინასწარ დაგეგმილ მსგავს ბრძოლებს პოლიციისგან მოშორებით უკვე ატარებს.
გავრცელებული ცნობით, ეს არ არის პირველი შემთხვევა, როდესაც ლებედევი ხულიგნური დაპირისპირების შესახებ საკუთარ მოსაზრებას გამოთქვამს.
როგორც ცნობილია, ის გასულ წელს მარსელში მომხდარ დაპირისპირებას მიესალმა.
„ყოჩაღ ბიჭებო, ასე გააგრძელეთ“, _ განაცხადა მან.
მაუწყებლის ინფორმაციით, ლებედევი პარლამენტში ვიცე-სპიკერია და გარდა ამისა, რუსეთის საფეხბურთო კავშირის წევრია.
მისივე ცნობით, ლებედევი უკვე დიდი ხანია ალექსანდრე შპრიგინის თანამოაზრედ განიხილება, რომელიც მარსელში მომხდარი ძალადობის შემდეგ საფრანგეთიდან დეპორტირებულია.
მაუწყებლის ინფორმაციით, მიუხედავად იმისა, რომ ლებედევი ფეხბურთთან დაკავშირებული ძალადობის მიმართ ენთუზიაზმით არის განწყობილი, ამავდროულად აცხადებს, რომ მსოფლიო თასზე ჩასული უცხოელებისთვის პოლიცია უსაფრთხოების გარანტიაა.
„ჩვენ მივიღეთ უსაფრთხოების ზომები, რომ 2018 წლის ზაფხულში გასამართ მსოფლიო თასზე არცერთმა ტურისტმა არ თქვას, რომ ჩვენს ქვეყანაში ჩამოსვლის ეშინია“,_აცხადებს ლებედევი.
