,,გურია ნიუსი“ ჟენევის მოლაპარაკებების 43-ე რაუნდთან დაკავშირებით საპარლამენტო უმრავლესობის წევრს ალექსანდრე ქანთარიას ესაუბრა.
_ ბატონო ალექსანდრე, საგარეო საქმეთა მინისტრის მოადგილის დავით დონდუას განცხადებით, ჟენევის მოლაპარაკებების 43-ე რაუნდზე საქართველომ წინ ვერაფრით წაიწია. მისი თქმით, ძალის არ გამოყენების თაობაზე, რუსეთმა თავი აარიდა კონსტრუქციულ მსჯელობას. ეს იმ ფონზე, როცა პრემიერის წერილის შემდეგ, რუსეთმა მზაობა გამოთქვა ორ ქვეყანას შორის ურთიერთობების დათბობის თაობაზე. როგორ ფიქრობთ, რატომ ვერ შედგა მხარეებს შორის მოლაპარაკება?
_ ეს არის გამოწვეული იმ უმძიმესი ვითარებიდან გამომდინარე, რომელშიც ვიმყოფებით. გვინდა რუსეთმა აღიაროს, რომ დამნაშავეა და საკუთარ თავზე აიღოს პასუხისმგებლობა, რასაც, ბუნებრივია, არ გააკეთებს. ვფიქრობ, მიდგომები უნდა შეიცვალოს. მიმაჩნია, პრემიერის განცხადება იყო იმედის მომცემი, მაგრამ ამის შემდეგ პარლამენტმა მიიღო რეზოლუცია, რომელსაც რუსული მხარე დაეყრდნო და ურთიერთობების გასამწვავებლად გამოიყენა. რეზოლუციაში მხოლოდ ტატუნაშვილზე რომ ყოფილიყო ყურადღება გამახვილებული, ვფიქრობ, უფრო სწორი იქნებოდა. რუსეთს ვთხოვთ, ყველაფერი საკუთარ თავზე აიღოს, ბუნებრივია, ასეთ დროს მოლაპარაკებები წარმატებით ვერ დასრულდება. რუსეთი ამბობს, თქვენ თვითონ ჩამოყალიბდით, პრემიერის განცხადება სხვა არის, რეზოლუციის შინაარსი კი სხვაო.
_ რუსეთის საგარეო საქმეთა მინისტრის მოადგილის გრიგორი კარასინის განცხადებით, დისკუსიის მონაწილეები ჟენევის ფორმატის გადახედვას აპირებენ, აღნიშნულის შესახებ ინფორმაცია უარყო საქართველოს საგარეო საქმეთა მინისტრის მოადგილე დავით დონდუამ. თქვენი აზრით, ამ წარუმატებელი რაუნდის შემდეგ, როგორ გაგრძელდება ორ ქვეყანას შორის ურთიერთობა? და რას ფიქრობთ ჟენევის მოლაპარაკებების ცვლილებაზე?
_ ვამბობდი, რომ ჟენევის მოლაპარაკებები უფრო მაღალ ფორმატში აგვეყვანა და ამაზე პრემიერიც საუბრობდა, თუმცა, ახლა გადავდივართ უფრო მწვავე მდგომარეობაში. რუსეთის მხრიდან მეტ სიმწვავეს უნდა ველოდოთ. ეს რაში გამოიხატება, საკითხავია, მაგრამ ურთიერთობების დალაგებას რუსი დიპლომატის გაძევება ნამდვილად არ შეუწყობს ხელს. სამსჯელოა, საქართველოს მხრიდან რამ გამოიწვია რუსი დიპლომატის გაძევება, საერთაშორისო თანამეგობრობა თუ გვპირდება თქვენც ჩაერთეთ ამ საქმეში და სამაგიეროდ, ავამოქმედებთ მე-5 პუნქტს, თუკი რუსეთი საქართველოს და ქართველ ხალხს ზიანს მიაყენებსო, მაშინ ყველა უნდა გაგვეძევებინა, მაგრამ საქართველომ თუ იმიტომ გააძევა რუსი დიპლომატი, რომ თქვენ გააძევეთ და ჩვენც თქვენთან ვართ და მეტის გაკეთება არ შეგვიძლიაო, რასაკვირველია, გაამწვავებს სიტუაციას და უფრო დახურავს იმ კარებს, რომელიც პრემიერმა თავისი განცხადებით თითქოს გახსნა.
