რუსეთის პრეზიდენტმა, ვლადიმერ პუტინმა “სპეციალური სამხედრო ოპერაციის” ნაცვლად ომი ახსენა. სიტყვა, რომელიც რუსეთში აკრძალულია, თავად რუსეთის პრეზიდენტს წამოსცდა.
პუტინმა უკრაინაში მიმდინარე პროცესებთან დაკავშირებით ჟურნალისტის კითხვას უპასუხა და თქვა, რომ რუსეთის მიზანი არა სამხედრო კონფლიქტის გაღვივება, არამედ პირიქით ამ ომის დასრულებაა, თან რაც შეიძლება მალე.
“ჩვენი მიზანი არ არის სამხედრო კონფლიქტის ეს ბორბალი დავატრიალოთ, არამედ ამ ომის დასრულება. ჩვენ ამისთვის ვიბრძვით და გავაგრძელებთ… ჩვენ ვეცდებით, რომ ეს დასრულდეს. და რაც მალე, მით უკეთესი, რა თქმა უნდა“, – განაცხადა პუტინმა.
ამ განცხადების შემდეგ სანკტ–პეტერბურგის საკრებულოს ოპოზიციონერმა მაჟორიტარმა ნიკიტა იუფერევმა რუსეთის ფედერაციის პრეზიდენტს, ვლადიმირ პუტინს სიტყვა “ომის” გამოყენებისთვის პროკურატურაში უჩივლა
იუფერევი მოითხოვს სამართალდამცავებმა გადაამოწმონ პუტინის 21 დეკემბრის მიმართვა, რომელშიც რუსეთის პრეზიდენტი ამბობს ფრაზას “”ჩვენი მიზანი არ არის სამხედრო კონფლიქტის გაღვივება, პირიქით, [ჩვენი მიზანია] დავასრულოთ ეს ომი“.
“ვლადიმირ პუტინმა ომს ომი უწოდა: “ჩვენი მიზანია დავასრულოთ ომი“. სპეციალური სამხედრო ოპერაციის დასრულებისა და ომის დაწყების ბრძანება არ ყოფილა. ასეთი სიტყვებისთვის ათასობით ადამიანი გაასამართლეს. მივმართე შესაბამის ორგანოებს რომ პუტინი ჯარზე ფეიკების გავრცელების მუხლით გაასამართლონ“, – წერს სოციალურ ქსელში რუსი ოპოზიციონერი.
პუტინის ხელისუფლება უკრაინაში მიმდინარე ომს სპეციალური სამხედრო ოპერაციის სახელით მოიხსენიებს. რუსეთში მოქმედებს კანონი, რომელიც სპეცოპერაციის ომად მოხსენებას კრძალავს. ამ კანონით დარღვევაში ამხილეს თავად იუფერევიც, მას შემდეგ რაც ოპოზიციონერმა პუტინს სამშობლოს მოღალატე და უკრაინაში ომის გამჩაღებელი უწოდა.
ნიკიტა იუფერევი პოლიტიკური გაერთიანება იაბლოკოს წევრია და სანკტ–პეტერბურგის საკრებულოში 2019 წლიდან მუშაობს.
ავტორი
