სპორტის არბიტრაჟის სასამართლომ ძალაში დატოვა უეფას მიერ მიღებული გადაწყვეტილება, რომლის მიხედვითაც რუსულ გუნდებს ამ ორგანიზაციის ეგიდით ნებისმიერ ტურნირში მონაწილეობა აეკრძალათ.
28 თებერვალს უკრაინაში მიმდინარე ომის გამო ფიფამ და უეფამ რუსულ კლუბებსა და ნაკრებებს ყველა საერთაშორისო ტურნირში მონაწილეობა აუკრძალა. მანამდე 2022 წლის მუნდიალის ფლეი ოფში რუსეთთან თამაშზე უარი განაცხადა პოლონეთის ნაკრებმა, ასევე ფინალში სავარაუდო მეტოქეებმა, ჩეხეთმა და შვედეთმა. მათ მხარი ევროპის რამდენიმე ნაკრებმა (ალბანეთი, ირლანდია, შვეიცარია, ინგლისი) დაუჭირა. ამ გადაწყვეტილების მიღების შემდეგ რუსეთის საფეხბურთო კავშირმა აპელაცია შეიტანა, მაგრამ სპორტის არბიტრაჟის სასამართლომ ის უბრალოდ არ მიიღო.
უკრაინის ნაკრების ყოფილი მცველი, 36 წლის არტიომ ფედეცკი ქალაქ ლუცკის თავდაცვის წევრი გახდა და განაცხადა, რომ დასავლეთ უკრაინაში შეჭრის შემთხვევაში, რუს ოკუპანტებს არ დაინდობს.
„მქონდა უცხოეთში წასვლის საშუალება, მაგრამ ცხოვრებაში ასე არასოდეს მოვიქცეოდი. ამიტომ მზად ვარ აქ ბოლომდე ვიდგე. მზად ვარ ჩვენი მიწა დავიცვა. თუ საჭირო იქნება სროლა – ვისვრით. თუ მოსკალები აქ შემოიჭრებიან, იგრძნობენ, თუ რა არის დასავლეთ უკრაინაში პარტიზანული მოძრაობა. იქ მათ ბიჭები წვავენ, ჩვენ კი აქ ღორებივით დავკლავთ.“ – განაცხადა არტიომ ფედეცკიმ.
ცნობილი გახდა რომ შოტლანდიური „გლაზგო რეინჯერსის“ ხელმძღვანელობისა და ფეხბურთელების გადაწყვეტილებით, მათი ხელფასის ნაწილი უკრაინის დასახმარებლად გადაირიცხება. საუბარია 72 ათას ფუნტზე და ის იმ 15 ათასს დაემატება, რომელიც შოტლანდიური კლუბის საქველმოქმედო ფონდში უკვე იყო გადარიცხული.
უკრაინელი ლტოლვილებისთვის გასულ კვირას 10 ათასი ფუნტი გამოყო კიდევ ერთმა გლაზგოურმა კლუბმა „სელტიკმა“. ამის გარდა, 24 მარტს, „ჰემპდენ პარკზე“ შოტლანდიის ეროვნული ნაკრები ამხანაგურ მატჩში პოლონეთს შეხვდება და ეს თამაშიც საქველმოქმედო ხასიათის იქნება. მატჩის მთელი შემოსავალი „UNICEF“-ის უკრაინის დახმარების ფონდში გადაირიცხება.
ფრანგმა ჩოგბურთის ვარსკვლავმა გაელ მონფილსმა, რომელიც უკრაინელი ჩოგბურთელის ელინა სვიტოლინას მეუღლეა, უკრაინაში მიმდინარე ომის შესახებ ისაუბრა და აღნიშნა, რომ უკრაინელი ხალხის დასახმარებლად ყველაფერს აკეთებს.
„ძალიან რთულ მდგომარეობაში ვართ. საშინელებაა იმის ნახვა, როდესაც შენი მეუღლე ყოველდღე ტირის. ცხადია, ვცდილობ, მის გვერდით ვიყო და დახმარება გავუწიო. მას ხომ უკრაინაში უამრავი ახლობელი ჰყავს და მათზე ვნერვიულობთ. ეს რაღაც სიგიჟეა, ამაზე ფიქრიც კი მიჭირს. ვცდილობ, ელინას მდგომარეობა შევუმსუბუქო. მზად ვარ, ყველაფერი გავაკეთო, რაც ჩემს ძალებს არ აღემატება“.
რამდენიმე დღის წინ სვიტილონამ და მონფილსმა აშშ-ის ქალაქ ინდიან ველსში საქველმოქმედო ღონისძიება ჩაატარეს, სადაც ჩოგბურთის ვარსკვლავების ნივთები გაყიდეს და მთელი თანხა უკრაინის დახმარების ფონდში გადარიცხეს.
უკრაინის ნაკრების ფეხბურთელმა არტიომ დოვბიკმა ლეგენდარული მაისურა გაყიდა და თანხა უკრაინის შეიარაღებულ ძალებს გადაურიცხა.
„დნიპრო 1“-ის 24 წლის თავდამსხმელმა საქველმოქმედო აუქციონი „Instagram“-ზე გამართა, სადაც გასაყიდად ის მაისურა გაიტანა, რომლითაც შარშან ზაფხულში გამართულ ევროპის ჩემპიონატზე შვედეთს გაუტანა. არტიომ დოვბიკმა აუქციონიდან მიღებული სრული თანხა – 100 ათასი გრივნა (3 ათას აშშ დოლარზე მეტი) უკრაინის შეიარაღებულ ძალებს მოახმარა.
დოვბიკმა ევროპის ჩემპიონატის 1/8-ფინალურ შეხვედრაში შვედეთთან გოლის გატანა კომპენსირებულ 120+1 წუთზე მოახერხა და თავისი ნაკრები 1/4-ფინალში გაიყვანა.
ორი დღის წინ, კიევის „დინამოს“ გულშემატკივრებმა საგანგებო განცხადება გაავრცელეს და კლუბის პრეზიდენტი იგორ სურკისი უმოქმედობაში დაადანაშაულეს.
გუშინ გუნდის პრეზიდენტი უკრაინაში დაწყებული ომის 21-ე დღეს საზოგადოების წინაშე პირველად გამოჩნდა და მიმდინარე მოვლენები შეაფასა.
„მირჩევნია, ცოტა ვილაპარაკო და ბევრი საქმე ვაკეთო, თუმცა, თუკი საუბარიც საჭიროა, პრობლემა არაა. ჩვენი მეზობელი რუსეთის ფედერაცია უმიზეზო დაგვესხა თავს და უკრაინის წინააღმდეგ საომარ აგრესიას აწარმოებს. მიმდინარეობს მშვიდობიანი მოსახლეობის, ინფრასტრუქტურისა და შეიარაღებული ძალების განადგურება. ახლა, სრულიად ჩვენი ქვეყანა გმირია. ისინი, ვინც წინა ხაზზე მამაცობის მაგალითს გვაძლევენ, ათასობით ვოლონტიორი ზურგს ამაგრებს, ბიზნესი კი არმიის ფინანსირებასა და ლტოლვილების დახმარებაზე მუშაობს. ჩვენი ჯარისკაცების ვაჟკაცობა უკვე მსოფლიო ისტორიაში შევიდა, უკრაინის ხელმძღვანელები კი მსოფლიოს ცივილიზებული ლიდერებისთვის მაგალითის მიმცემები არიან.
მჯერა, რომ უკრაინა გაიმარჯვებს და მალე ყველაფერი ჩვენს სასიკეთოდ დასრულდება. მშვიდობა და სიწყნარე დაისადგურებს. ინფრასტრუქტურული ობიექტების აღდგენა შეიძლება, აი, ადამიანების სიცოცხლეს კი ვერ დავაბრუნებთ. ამდენად, ჩვენ ვეხმარებოდით და დავეხმარებით ქვეყანას, რათა ბავშვებმა და დაჭრილებმა ყველა საჭირო დახმარება მიიღონ“.
ავტორი: გიორგი გაჩეჩილაძე
