“სააკაშვილმა, „ქართულ ოცნებასთან“ შედარებით, მორალური უპირატესობა მოიპოვა“_ გუბაზ სანიკიძე

„ბიძინა ივანიშვილი ოდიოზურ მოსამართლეებზე ან უარს იტყვის, ან ხელისუფლების დატოვება მოუწევს. ახლა ჩვენი მთავარი ამოცანა ხელისუფლებიდან  „ქართული ოცნების“ გაშვებაა. სხვაგვარად, სასამართლო სისტემაში არსებული ვითარება არ გამოსწორდება“,_ აღნიშნა „გურია ნიუსთან“ „დემოკრატიული მოძრაობა-ერთიანი საქართველოს“ ლიდერმა გუბაზ სანიკიძემ.

მისივე თქმით, 2020 წლის საპარლამენტო არჩევნების შესაძლო გაყალბებას ქვეყანაში რევოლუცია მოჰყვება.

_ ბატონო გუბაზ, სასამართლო სისტემაში არსებულმა კლანურმა მმართველობამ „ქართული ოცნების“ გუნდი პოლიტიკურ ჩიხში შეიყვანა და მართლმსაჯულების დამოუკიდებლობა კითხვის ნიშნის ქვეშ დააყენა. როგორ ფიქრობთ,  შექმნილი მდგომარეობის გამოსწორების მიზნით, იუსტიციის უმაღლესი საბჭოს ოდიოზურმა წევრებმა თანამდებობები უნდა დატოვონ?

_ იუსტიციის უმაღლესი საბჭოს იმ წევრებმა, რომლებმაც პარლამენტში მოსამართლეთა სიას მხარი დაუჭირეს, თანამდებობები უნდა დატოვონ, მაგრამ არამგონია, რომ სასამართლოს საკითხი ასე მარტივად გადაწყდეს. „ქართული ოცნება“ რასაც აკეთებს, საბოლოო ჯამში, მანევრია, რაც საზოგადოებას აბნევს. ერთადერთი გამოსავალი ხელისუფლების ცვლილებაა. აუცილებელია, რომ ქვეყნის სათავეში კოალიციური ხელისუფლება მოვიდეს, რომელიც სასამართლო სისტემაში გენერალური რეფორმების განხორციელებას დაიწყებს. დღევანდელი სასამართლო სისტემა, ფაქტობრივად, ავაზაკების ხროვადაა გადაქცეული.

_ “ქართული ოცნება_დემოკრატიული საქართველოს“ თავმჯდომარე ბიძინა ივანიშვილი, რომელსაც პარლამენტში წარდგენილი მოსამართლეთა სიის ლობირებაში სდებენ ბრალს,  უარის იტყვის თანამდებობებზე სკანდალური მოსამართლეების  უვადო განმწესებაზე? მით უფრო, როცა საზოგადოებამ უკვე დაინახა, რომ  იუსტიციის უმაღლესმა საბჭომ ლევან მურუსიძე უვადო მოსამართლედ უკვე განამწესა.

_ბიძინა ივანიშვილს ან ოდიოზურ მოსამართლეებზე უარის თქმა მოუწევს, ან ხელისუფლებას დატოვებს. კვლავ გავიმეორებ, რომ ჩვენი მთავარი პოლიტიკური ამოცანა ხელისუფლებიდან  „ქართული ოცნების“ გაშვებაა. სხვაგვარად სასამართლო სისტემაში არსებული ვითარება არ გამოსწორდება.

_ ხელისუფლებაში “ქართული ოცნების“  მოსვლის შემდეგ, ქვეყანაში უამრავი პრობლემა დაგროვდა. საზოგადოების სოციალური მდგომარეობა, გაუმჯობესების ნაცვლად, გაუარესდა, წამლებზე და პროდუქტებზე  ფასები გაიზარდა და კრიმინალმა მოიმატა. ამ ფონზე, ბიძინა ივანიშვილი საზოგადოებას ერთ წელში არსებული პრობლემების აღმოფხვრას ჰპირდება. რატომ ვერ სრულდება „ოცნების“ დაპირებები ?

_ ხელისუფლებაში ქვეყნის წინსვლის პოლიტიკური ნება არ არსებობს. საზოგადოებაში არ არსებობს პერსპექტიული ხვალინდელი დღის შეგრძნება, რადგან ქვეყანას  უწიგნური ხალხი მართავს. როცა ბიძინა ივანიშვილმა თქვა, ერთი წლის განმავლობაში ყველაფერს გამოვასწორებო,  ვიღაცებმა შვებით ამოისუნთქეს. რასაც ბიძინა ივანიშვილი გამოსწორებას ეძახის, ჩვენ ქვეყნის დაქცევას ვეძახით. ივანიშვილი ვერაფერს გამოასწორებს. წინასწარ გეტყვით, რომ მორიგ გაყალბებულ არჩევნებს რევოლუცია აუცილებლად მოჰყვება.

_ საქართველოს ყოფილი პრეზიდენტი მიხეილ სააკაშვილი ემიგრანტებთან ერთად საქართველოში  ჩამოსვლისთვის ემზადება. როგორც ჩანს, ყოფილ პრეზიდენტს „ქართული ოცნების“  მმართველობის დამხობა რევოლუციის გზით სურს. მიხეილ სააკაშვილს, რომელსაც ქართული მართლმსაჯულება მრავალ სისხლის სამართლის საქმეს ედავება, ხელისუფლების შეცვლის რესურსი გააჩნია?

_ ვერ გეტყვით ყოფილ პრეზიდენტს ხელისუფლების შეცვლის რესურსი აქვს თუ არა, მაგრამ ცალსახად ჩანს, რომ მიხეილ სააკაშვილმა სტრატეგიულად სწორი გადაწყვეტილება მიიღო მაშინ, როცა ემიგრანტების კონსოლიდირება დაიწყო. აშკარად იგრძნობა, რომ „ქართულ ოცნებასთან“ შედარებით, სააკაშვილმა მორალური უპირატესობა მოიპოვა. 2015 წლის დეკემბერი იყო, როცა საპარლამენტო ტრიბუნიდან ვთქვი, რომ ასე მოხდებოდა.

_ საქართველოს მოქმედი პრეზიდენტი სალომე ზურაბიშვილი ქვეყანაში მიმდინარე მნიშვნელოვან პოლიტიკურ პროცესებთან დაკავშირებით, საკუთარ პოზიციას არ აფიქსირებს. როგორ ფიქრობთ, მისი დუმილი რით არის განპირობებული?

 _ სალომე ზურაბიშვილისგან ასეთ სიბრიყვეს არ მოველოდი. ადამიანი, რომელსაც უმაღლესი მთავარსარდალი ჰქვია და სახელმწიფოს მეთაურის სტატუსი აქვს, იძახის პოლიტიკოსი არ ვარო. როგორც ჩანს, სალომე ზურაბიშვილს  უნდა, რომ მარგველაშვილზე უკეთეს პრეზიდენტად წარმოჩნდეს. მასსა და „ქართულ ოცნებას“ შორის ასეთი ურთიერთობა დიდხანს არ გაგრძელდება. თუ სალომე ზურაბიშვილი დაინახავს, რომ „ქართული ოცნების“ საქმე დამთავრებულია, რა თქმა უნდა, ბიძინა ივანიშვილს პოლიტიკურ სამარეში არ ჩაყვება.