რამდენიმე დღის წინ, ინფრასტრუქტურის მინისტრმა, რევაზ სოხაძემ მუნიციპალური განვითარების ფონდის აღმასრულებელ დირექტორთან, ბექა ურუშაძესთან, გურიის მხარეში სახელმწიფო რწმუნებულთან, გიორგი ღურჯუმელიძესა და ლანჩხუთის ადგილობრივი ხელისუფლების წარმომადგენლებთან ერთად სოფლებში: ნიგვზიანსა და ღრმაღელეში საბავშვო ბაღების მშენებლობის დასრულებული პროექტები მოინახულა.
“ლანჩხუთის მუნიციპალიტეტის სოფელ ღრმაღელეში დასრულდა 50 ბავშვზე, ხოლო სოფელ ნიგვზიანში 75 აღსაზრდელზე გათვლილი საბავშვო ბაღების მშენებლობა. თანამედროვე სტანდარტების შესაბამისად მოწყობილ შენობებში გათვალისწინებულია სკოლამდელი განათლებისთვის აუცილებელი ყველა პირობა _ სასწავლო, საძინებელი და ადმინისტრაციული ოთახები, სამზარეულო, შიდა და გარე სათამაშო ზონები და რეკრეაციული სივრცეები.
საქართველოს მთავრობის ერთ–ერთ მნიშვნელოვან პრიორიტეტს წარმოადგენს ყველა მუნიციპალიტეტში შესაბამისი სერვისების, მათ შორის სკოლამდელი აღზრდის დაწესებულებების ხელმისაწვდომობა“, _ განაცხადა რევაზ სოხაძემ გურიის რეგიონში ინფრასტრუქტურული პროექტების მონიტორინგის შემდეგ.
ნიგვზიანისა და ღრმაღელის ახლადგახსნილ ბაღებში სააღმზრდელო პროცესი უკვე მიმდინარეობს. თუმცა, ამ ყველაფრის ფონზე ფაქტად რჩება, რომ საბავშვო ბაღების ინფრასტრუქტურის მხრივ ლანჩხუთში ძალიან ბევრი პრობლემაა. მაგალითად, ნინოშვილისა და გულიანში საბავშვო ბაღის ახალი შენობები კი აშენდა, თუმცა, ჯერჯერობით, ვერ ხერხდება სასწავლო-სააღმზრდელო პროცესის დაწყება. აი, შრომისუბანში, ჯურუყვეთში, ეწერსა და ჩიბათში კი უკვე წლებია დანგრეულია საბავშვო ბაღის ძველი შენობები, მაგრამ როდის აშენდება ახალი, ჯერჯერობით კონკრეტული პასუხი არ არის.
ამ მხრივ რომ პრობლემებია, ამაზე ინფრასტრუქტურის მინისტრმა, რევაზ სოხაძემაც ისაუბრა გურიაში სტუმრობისას:
“არსებობს გარკვეული გამოწვევები შეჩერებულ მშენებლობებთან დაკავშირებით, რაც რიგი სამშენებლო კომპანიების პასუხისმგებლობას უკავშირდება _ ზოგიერთ შემთხვევაში დაწყებულია სისხლის სამართლის წარმოებაც. ვმუშაობთ, რათა შეჩერებულ ობიექტებზე სამშენებლო სამუშაოები დროულად განახლდეს“.
საბავშვო ბაღების ინფრასტრუქტურის მხრივ, გარკვეული პრობლემები რომ შეიქმნა მუნიციპალიტეტში, ამას ლანჩხუთის საკრებულოს წევრი პარტია ლელოდან, გოჩა ჯანაშია ადასტურებს:
“ლანჩხუთის მუნიციპალიტეტში საბავშვო ბაღების საკითხი წლებია, წარმატებულად ითვლება, მაგრამ ბოლო ხანს ინფრასტრუქტურული კუთხით ძალიან ბევრი პრობლემა დაგროვდა.
დავიწყოთ იქიდან, რომ ათამდე ახალი ბაღის შენობა გაიხსნა “ქართული ოცნების” ხელისუფლებაში მოსვლიდან, მაგრამ სხვადასხვა პრობლემათა გამო, ამ შენობების ნაწილი უკვე არ ფუნქციონირებს. ავიღოთ ჯურუყვეთის თემი, სადაც ამ ეტაპზე ორივე ბაღის შენობა დანგრეულია, ახლის მშენებლობა კი არ დაწყებულა.
საქმე იმაშია, რომ ორივე ბაღის ასაშენებლად არაკეთილსინდისიერმა მშენებლებმა არაფერი გააკეთეს და დღესდღეობით სასამართლო დავა მიმდინარეობს საქმის გასარკვევად, არადა, ჯურუყვეთის ბაღი 2016 წელს აშენდა, ხოლო ეწრის შენობას რეაბილიტაცია ჩაუტარდა, თუმცა, რატომ დაანგრიეს და სად წავიდა ამ მუნიციპალური შენობის ნანგრევები, გაურკვეველია.
პრობლემების გამო დაინგრა ასევე ჩიბათისა და შრომისუბნის ბაღების შენობებიც, თუმცა, დღემდე არც აქ ჩანს სიახლე. ამავდროულად, ახალაშენებული შენობებიდან დაგვიანდა ნინოშვილის, გულიანის, ღრმაღელისა და ნიგვზიანის საბავშვო ბაღების გახსნა და მხოლოდ რამდენიმე დღის წინ გაიხსნა ბოლო ორი შენობა. რაც შეეხება ნინოშვილს, აქ სასწავლო პროცესი კვლავაც შეფერხებულია და როგორც მუნიციპალიტეტის მერი აცხადებს, უსაფრთხოების საკითხების მოგვარების პროცესი მიმდინარეობსო. საგულისხმოა ის, რომ ეს შენობა მეწყრულ ზონაში აიგო და ღმერთმა უწყის, შენობის წინ მიმდინარე მეწყრული პროცესი ხვალ რა შედეგს მოიტანს.
ამასობაში პრობლემები შეექმნა 2016 წელს აშენებულ კიდევ ერთ შენობას, სადაც ლესის საბავშვო ბაღია განთავსებული. აქაც დროებით შეჩერდა სასწავლო პროცესი და რას იტყვის ექსპერტიზა, ამაზეა დამოკიდებული ეს შენობა დაინგრევა თუ რეაბილიტაცია მოხდება.
მოკლედ, თავად განსაჯეთ რა რთულ დღეშია ჩავარდნილი რიგი სოფლების სკოლამდელი აღსაზრდელები, რომლებსაც სხვადასხვა ადგილებზე უწევთ სასწავლო პროცესში ჩართვა. მართალია მუნიციპალიტეტში გვარწმუნებენ, რომ მათი ტრანსპორტირება უზრუნველყოფილია, მაგრამ მაინც რთულად მოჩანს ამ პატარა ბავშვების სასწავლო პირობები“, _ ამბობს ჯანაშია.
საბავშვო ბაღების თემაზე ლანჩხუთის მერმა, ალექსანდრე სარიშვილმა საკრებულოს ბოლო სხდომაზე გააკეთა განმარტება და აღიარა, რომ ამ კუთხით, ბოლო პერიოდში, მართლაც რთული სიტუაციაა. მისი ინფორმაციით, ოთხი საბავშვო ბაღის მშენებლობასთან დაკავშირებით დავა მიმდინარეობს სამუშაოების შემსრულებელ კომპანიებთან. მერის თქმით, გულიანისა და ნინოშვილის ახალაშენებულ საბავშვო ბაღებში 112-ის სამსახურის სტანდარტების შესაბამისად, დამატებითი ღონისძიებებია გასატარებელი:
“ვფიქრობთ, რომ ნინოშვილის საბავშვო ბაღს თებერვლის შუა რიცხვებისთვის გავხსნით, ხოლო გულიანში არ არის დასრულებული ლიფტის დამონტაჟება და უკანა ტერიტორიაზე მიწის გარკვეული გამაგრებითი სამუშაოებია შესასრულებელი. მოკლედ,ნინოშვილი და გულიანი არ არის პრობლემური, პრობლემად რჩება ოთხი ბაღის: ჩიბათის, შრომისუბნის, ეწერისა და ჯურუყვეთის საკითხი. თუმცა, ხორციელდება ამ ბარების აღსაზრდელებისა და მასწავლებლების ტრანსპორტირება მიმდებარე საბავშვო ბაღებში. პრობლემის აღმოსაფხვრელად მიდის მუშაობა და აუცილებლად ყველაფერი დალაგდება“, _ თქვა მერმა.
ცნობისთვის, მუნიციპალური განვითარების ფონდმა ლანჩხუთში კიდევ ორი ახალი საბავშვო ბაღის მშენებლობა დააანონსა _ უწყების ცნობით, ახალი საბავშვო ბაღების პროექტირებისთვის კონკურსები გამოცხადდა.
ირკვევა, რომ ახალი ბაღის მშენებლობა იგეგმება ქალაქში, რომელიც არანაკლებ 125 აღსაზრდელზე იქნება გათვლილი; ხოლო სოფელ წყალწმინდაში 100 ბავშვზე გათვლილი საბავშვო ბაღი უნდა გაკეთდეს. არადა, წყალწმინდაში მოქმედი საბავშვო ბაღი დაახლოებით 10 წლის წინ აშენდა
ავტორი
