ბახმაროში “ორბი ჯგუფის” დაგეგმილი მშენებლობის მიმართ საზოგადოების ინტერესი არ წყდება. საზოგადოების ნაწილი ამბობს, რომ მშენებლობა საფრთხისშემცველია კურორტისთვის და მშენებლობის გასაუქმებლად ხელმოწერებს აგროვებს, ურბანული განვითარების ინსტიტუტს კი მიაჩნია, რომ ბახმარო მრავალბინიან განაშენიანებას ვერ გაუძლებს.
აქვს თუ არა კომპანიას შესაბამისი ნებართვები ბახმაროში მაქსიმუმ 12 მეტრიანი სასტუმრო კომპლექსის ასაშენებლად და ჩატარებულია თუ არა გეოლოგიური კვლევა _ ამის შესახებ “ორბი ჯგუფის” გენერალურმა დირექტორმა ირაკლი კვერღელიძემ თბილისში გამართულ პრესკონფერენციაზე 27 თებერვალს ისაუბრა
ირაკლი კვერღელიძემ საზოგადოებას ფრანგული ორგანიზაციის მიერ ჩატარებული გეოლოგიური კვლევასთან ერთად ჩოხატაურის მუნიციპალიტეტის მერიის მიერ გაცემული ბრძანებაც წარუდგინა.
“სამწუხაროა ის ფაქტი, რომ გარკვეულ წრეებში ამ საკითხის პოლიტიზირებასაც ცდილობენ. თუმცა, მინდა ავღნიშნო, რომ გასაგებია იმ ადამიანების პოზიცია, ვინც ამ საკითხზე თავიანთ მოსაზრებებს აფიქსირებენ. ალბათ, ყველას გვალაპარაკებს ბახმაროს ხვალინდელი ბედი, რაზეც ყველას საკუთარი მოსაზრება გვაქვს.
ვერ ვიქნები თავდაცვის რეჟიმში, რადგან მიმაჩნია, რომ ეს არის პროექტი, რომელიც კარს გაუხსნის ბახმაროს განვითარებას”,_ თქვა კვერღელიძემ და აღნიშნა, რომ პროექტის მოსამზადებლად შვიდი კომპანია ერთმანეთისგან დამოუკიდებლად მუშაობდა.
“ყველა კომპანია ჩამოვიყვანეთ ბახმაროში, რომ მათთვის გასაგები ყოფილიყო ის ავთენტური სივრცე, რომელიც ბახმაროს გააჩნია. შვიდივე კომპანიის მიდგომა და კონცეფცია იყო ერთგვაროვანი. თუ ჩვენ გვინდა რომ ნაკლებად შევეხოთ ლანდშაფტს, მაშინ უნდა გახორციელდეს ცენტრალიზებული სერვისების მქონე კომპლექსი, იმ პარამეტრებით, რომელიც გენგეგმით არის გათვალისწინებული. ამ შვიდი კომპანიიდან კი შევარჩიეთ WilkinsonEyre”,,_ განაცხადა კვერღელიძემ და საუბრის დასასრულს, სამშენებლო ნებართვის შესახებ განაცხადა: “ხელთ მიჭირავს ჩოხატაურის მუნიციპალიტეტის მერიის 2023 წლის 26 დეკემბრით დათარიღებული ბრძანება და სანებართვო მოწმობა“.
ბახმაროში “ორბი ჯგუფის” მიერ სასტუმრო კომპლექსის პროექტის შესახებ გამართული პრესკონფერენციის შემდეგ WilkinsonEyre-ის პარტნიორმა და დირექტორმა სემ ვრაითმა ჟურნალისტებთან საუბრისას განაცხადა, რომ ტერიტორია, სადაც მშენებლობა იგეგმება ლამაზია, მაგრამ დაზიანებული.
“ამ ტერიტორიაზე აშკარად თვალშისაცემია ულამაზესი ბუნება, თუმცა, პარალელურად, თვალშისაცემია ისიც, რომ ამ ტერიტორიის დიდი ნაწილი არის დაზიანებული. რაც გულისხმობს იმას, რომ ნაკლებია კონტროლი. არის შენობები, რომელიც 50 წელზე მეტ ხნისაა. ასევე, როცა ავტომობილით გადაადგილდები, თვალშისაცემია ისიც, რომ არ არსებობს სათანადო დრენაჟი და საკანალიზაციო სისტემა.
ჩვენი მიზანი იყო შეგვესწავლა ადგილობრივი ლანდშაფტი და ეკოსისტემა. გვინდა, რომ მშენებლობით ნაკლები ზიანი მიადგეს გარემოს. შევინარჩუნოთ ადგილობრივი მრავალფეროვნება, ეკოლოგია და მისი მიმდებარე ინფრასტრუქტურა, რომ მოხდეს თანამედროვე დიზაინის არქიტექტურის არსებულ ლანშაფტთან შერწყმა”,_ განაცხადა ჟურნალისტებთან საუბრისას ვრაითმა.
“ორბი ჯგუფში” ამბობენ, რომ ბახმარო, რომელსაც უკვე 100 წელია კურორტის სტატუსი აქვს, ადგილობრივი მოსახლეობის ბიუჯეტსა და ქვეყნის კეთილდღეობაში მნიშვნელოვან ეკონომიკურ როლს ვერ ასრულებს. ამის ერთ-ერთი მიზეზი კი ინფრასტრუქტურული პრობლემებია, რომლის მოგვარებაც ბახმაროს განვითარების სახელმწიფო გეგმის მიხედვით, ახალი ინვესტიციის პარალელურად მოხდება.
კვერღელიძის თქმით, დღესდღეობით ბიზნესურად არ არის გამართული აუთვისებელ კურორტზე თანხის შეტანა. ეს ხდება მხოლოდ მაშინ, როცა სიყვარული გაკავშირებს. ბახმარო ერთადერთი გადამრჩენი და ძირითადი იმედია ჩოხატაურის და რეგიონში მცხოვრები ადამიანებისთვის. მოხდება კადრების გადამზადება დასასაქმებლად და დავაბრუნებთ ხალხს იმ სახლებში, რომლებიც დღეს ცარიელია.
ჟურნალისტებთან საუბრისას, ირაკლი კვერღელიძე გამოეხმაურა გარემოს დაცვის მინისტრის მოადგილის მიერ გაკეთებულ განცხადებასაც, რომლის მიხედვითაც, აღნიშნული პროექტის გარემოზე ზემოქმედების შეფასების დოკუმენტი არ არსებობს.
კვერღელიძის განმარტებით, გარემოზე ზემოქმედების შეფასების დოკუმენტი არ არსებობს, რადგან გარემოზე ზემოქმედების შეფასება ხდება მხოლოდ მაშინ, როცა პროექტი ცდება 10 ჰა-ს.
“ორ წელზე მეტია ამ პროექტზე ვმუშაობთ. ყველა კვლევა, რომელიც კომპანიამ განახორციელა, არის კანონთან შესაბამისობაში”, _ თქვა კვერღელიძემ.
გავრცელებულ ინფორმაციას, რომ აღნიშნული პროექტი გაეროს მდგრადი განვითარების მიზნებთან წინააღმდეგობაშია, კვერღელიძე პასუხობს:
“ბევრ მსგავს კურორტზე რომ შენდება და აშენებულია მსგავსი შენობები, ამით გაეროს მდგრადობა დავანგრიეთ? გამოდის, რომ თუ ეს მდგრადობა არსებობს, შენობა ნაგებობა აღარ უნდა აშენდეს კურორტზე?”
შეკითხვაზე, იყო თუ არა პროექტის მზადების პროცესში ჩართული ადგილობრივი მოსახლეობა, კვერღელიძე ამბობს, რომ შეხვედრები ჩოხატაურშიც და ბახმაროშიც ზაფხულში გაიმართა.
“გურია ნიუსმა” “ორბი ჯგუფის” გენერალურ დირექტორ ირაკლი კვერღელიძესთან სცადა გადაემოწმებინა სხვადასხვა ინფორმაცია, რაც ბოლო დღეების განმავლობაში სოციალურ ქსელებში გავრცელდა.
_ ბატონო ირაკლი, გავრცელდა ინფორმაცია, რომ წარმოდგენილი პროექტი და შენობა ერთმანეთს არ შეესაბამება…
_ არ არის სწორი ინფორმაცია. როცა რენდერინგი კეთდება, შეიძლება ვერ აისახოს იდენტურად პროექტის პარამეტრები. პროექტის მნიშვნელოვან ნაწილზე ნებართვა გაცემულია, არსებობს შეთანხმების და განაშენიანების დამტკიცების დოკუმენტაცია. გრძელდება მეორე ფაზა და რადგან ასეთი ინტერესი გამოიწვია ბახმაროში ამ პროექტმა, მზად ვართ ყველას გავაცნოთ, თუ რა სარგებელი მოაქვს მას კურორტისთვის, ქვეყნისთვის ტურისტული პოტენციალის განვითარების კუთხით.
_ ბატონო ირაკლი, სასტუმრო კომპლექსი 10 ჰექტარ ფართობს მოიცავს. მშენებლობის პროცესში ხეები ხომ არ მოიჭრება?
_ სამწუხაროდ, საზოგადოების შეცდომაში შეყვანა ხდება, რომ თითქოს კომპანია იქ ხეებს ჭრის. ეს სინამდვილეს არ შეესაბამება, რადგან ეს არის უკვე გაშენებული ტერიტორია. სასტუმრო კომპლექსი შენდება ყოფილი ბანაკების ტერიტორიაზე, სადაც არც ერთი ძირი ხე არ დგას.
_ შეიძლება თუ არა საფრთხე შეიქმნას სასტუმროს აშენების შედეგად თავად კურორტს?
_ არანაირი საფრთხე ამ პროექტის განხორციელებით არ შეიქმნება. სამწუხაროდ, არასწორი ინფორმაცია ვრცელდებოდა. რა არის მნიშვნელოვანი, როდესაც ვაფასებთ რა კეთდება ბახმაროში? პირველი საკითხი _ ვარღვევთ გენგეგმას, რომელიც ბახმაროში არსებობს? არ ვარღვევთ. მეორე საკითხი _ არ გვაქვს გეოლოგიური კვლევა? წარმოვადგინეთ გეოლოგიური კვლევა. მესამე საკითხი _ შენობა–ნაგებობა მდებარეობს ზვავსაშიშ ზონაში და არ აქვს შესაბამისი კვლევები? პასუხი: შენობა–ნაგებობა არ მდებარეობს ზვავსაშიშ ზონაში. მიუხედავად იმისა, რომ ტერიტორია არ არის ზვავსაშიში, ფრანგული კომპანიის მიერ მაინც ჩატარებულია კვლევა, სადაც ცალსახად აღნიშნულია, რომ შესაბამისი საინჟინრო გადაწყვეტებით, შესაძლებელია შენობის აშენება და არ უნდა დაგვავიწყდეს, იმ ადამიანებს, რომლებსაც ამ ზონაში სააგარაკე შენობები აქვთ უკვე წლებია, ამ დრომდე არანაირი ზიანი არ მიყენებიათ თოვლ-ზვავისგან.
_ როდესაც მაგალითები მოგყავთ სხვადასხვა კურორტებთან მიმართებაში, რამდენად შესაბამისობაშია იმ კურორტების ლანდშაფტი ბახმაროსთან?
_ ინფორმაციები ბევრი სხვადასხვა კუთხით ვრცელდება. მაგალითად, რომ თითქოს 1960-70-იანი წლების შენობებია და ასე კურორტის განვითარებას შემდეგ უკვე შეცდომად თვლიდნენ, რომ მეტი ახალი შენობა არც დავოსში და არც სხვა სამთო კურორტზე არ აშენებულა. მოცემულ შემთხვევაში, არ არსებობს არც ერთი კურორტი, რა ინტენსივობის და რა განვითარებისაც არ უნდა იყოს ის, ვთქვათ, დაბალი განაშენიანების თუ მაღალის და ა.შ., რომ ერთი მიზიდულობის ცენტრი არ ჰქონდეს. ადამიანები, რომლებსაც განსხვავებული მოსაზრებები აქვთ, ავთენტურ განვითარებაზე ლაპარაკობენ. რა არის კოტეჯი? 50-70 კვადრატული მეტრის შენობა, რომელიც, დაახლეობით, 2 სართულზე და მანსარდზე ვითარდება. ვინმე ამიხსნის, როგორ შეიძლება ჩავატიოთ 60 კვადრატულ მეტრში რესტორანი, სპა, ბავშვთა გასართობი ცენტრი, კინოთეატრი, როგორ შეიძლება მოვახდინოთ იმ აუცილებელი ინფრასტრუქტურის ერთობლიობის შექმნა, რომელიც კურორტს სჭირდება?! მე ვფიქრობ რომ კოტეჯური განვითარება რჩება ბახმაროს განვითარების თემად, მაგრამ ეს არ ნიშნავს და არ გამორიცხავს იმას, რომ კურორტს ჰქონდეს მიზიდულობის ცენტრი, რომელიც ვერ შეცვლის ვერც კურორტის ავთენტურობას და ვერც ისტორიას. ყველა კურორტის, რომელიც თავის დროზე ევროპაში განვითარდა, აქვს თავის განვითარების ისტორია, თუმცა, ყველა კურორტს აქვს ერთი მიზიდულობის ცენტრი, რომელიც სჭირდება სერვისების მისაწოდებლად.
პროექტის მზადების პროცესის საჯაროობის შესახებ დასმულ კითხვაზე ირაკლი კვერღელიძე გვპასუხობს:
_ როდესაც შევიტანეთ განაცხადი დეტალური განაშენიანების შესახებ, პროექტი საჯარო განხილვისთვის აიტვირთა ეკონომიკის სამინისტროს ვებგვერდზე. საჯაროობა დაცული იყო და ყველას მიეცა შესაძლებლობა საკუთარი მოსაზრება წარმოედგინა, თუმცა, არანაირი მოსაზრება ამ პროექტთან დაკავშირებით არ გამოთქმულა. ჩვენ არ ვგეგმავთ პროექტში ცვლილების შეტანას, რადგან ვერ ვხედავთ ამის პირდაპირ საფუძველს, არგუმენტს. შეცვლას ხომ რამე პირობა უნდა ჰქონდეს?
_ როგორ ფიქრობთ, კომპლექსის აშენება გამოიწვევს ბახმაროში დასვენების ღირებულების შეცვლას?
_ ეს უდაოა. ბახმაროს მკვიდრი მოსახლეობის და არა მარტო მათი, მიმდებარე სოფლების მცხოვრებელების სოციალური და ფინანსური მდგომარეობა შემოსავლების კუთხით შეიცვლება. ეს ლოგიკური და ავტომატური პროცესია. ქალაქისკენ ადამიანები რატომ მიისწრაფიან? იმიტომ რომ უფრო მეტი მომხმარებლების ერთობლიობაა და უფრო მეტი სამუშაო ადგილია საჭირო. ანალოგიური ეფექტია აქაც. დღეს, როცა ევროპაში თოვლის შიმშილია, ბახმაროში კი, სადაც უნიკალური სიტუაციაა, მხოლოდ 120-მდე ტურისტია. ეს ნორმალური და კარგია? არ გვაქვს სურვილი, რომ 120 კი არა, 5 000 ტურისტი იყოს? ის ჯობს, რაც დღეს არის? როგორ უნდა ვთქვათ, რომ ეს არის ბახმაროს დანგრევა? რთულია ბახმაროში სტუმრის მიყვანაც… ღამით სად დავტოვო? რომელ რესტორანში მივიყვანო? დღესდღეობით ბახმაროში უმეტესად საზაფხულო აგარაკებია და თუ ბახმარო 4-სეზონიან ტურისტულ ცენტრად გადაიქცევა, მოსახლეობასაც გაუჩნდება სურვილი, მოდერნიზება გაუკეთონ თავიანთ კოტეჯებს.
_ ის კოტეჯები, რაც დღეისთვის ბახმაროშია, ვერ აკმაყოფილებს სტანდარტებს?
_ძალიან მარტივად გეტყვით. ბახმაროში სულ 2500 კოტეჯია და აქედან მხოლოდ 5% აკმაყოფილებს მინიმალურ პირობებს, მაგრამ სასტუმროს სტანდარტის პირობებს ვერც ერთი ვერ აკმაყოფილებს. თუ ჩვენ გვინდა, პლატონ სამანიშვილივით ვირტყათ გულზე ხელები და არაფერი არ გამოგვდიოდეს, კი ბატონო, მაგრამ მე არ მინდა, რომ ასე იყოს.
როგორც ამ დროისთვის ცნობილია, „ორბის პროექტი“ ორ ფაზად არის გაყოფილი. ამ ეტაპზე პროექტი შეთანხმებულია და მშენებლობის ნებართვა გაცემულია მხოლოდ კომპლექსის ნაწილზე, რომელიც მოიცავს ჯამურად 4 ჰექტარ ტერიტორიას.
რაც შეეხება მეორე ფაზის პროცედურას, ამაზე გაიმართება საჯარო განხილვები. მრავალფუნქციური სასტუმრო კომპლექსის მაქსიმალური სიმაღლე 12 მეტრს არ აღემატება, ხოლო კომპანიის საკუთრებაში არსებული 10 ჰა-დან შენობა-ნაგებობები მხოლოდ მის მერვედ ნაწილზე აშენდება.
ავტორი
