იუსტიციის მინისტრი, თეა წულუკიანი შვებულებაში იმყოფება, აღნიშნულის შესახებ ინფორმაციას იუსტიციის სამინისტრო ავრცელებს, თუმცა, ჯერჯერობით, უცნობია, შეინარჩუნებს თუ არა იუსტიციის მინისტრი თანამდებობას.
,,ქართული ოცნების“ წევრების განწყობით თუ ვიმსჯელებთ, თეა წულუკიანი იუსტიციის მინისტრის თანამდებობას შეინარჩუნებს. როგორც მმართველ გუნდში ამბობენ, წულუკიანმა თანამდებობაზე ყოფნის 6-წლიანი სტაჟი უნდა გაიხანგრძლივოს.
,,ქვეყანაში იმაზე ბევრი საქმეა, ვიდრე წულუკიანის გადაყენება და ვადამდელი საპარლამენტო არჩევნები. ყურადღების გადატანა იმაზე, რომ საპარლამენტო არჩევნები დავნიშნოთ და წულუკიანი მოვხსნათ, ამ სატყუარაზე არავინ წამოეგება. თეა წულუკიანთან ერთად ვაპირებთ ახალი კანონების მიღებასა და რეფორმების გატარებას“, _ უთხრა ,,გურია ნიუსს“ ,,ოცნების“ წევრმა ზაზა პაპუაშვილმა.
მმართველი გუნდიდან იუსტიციის მინისტრს ღიად დაუპირისპირდა ,,ქართული ოცნების“ წევრი, დავით ჭიჭინაძე, რომელმაც განაცხადა, რომ წულუკიანმა თანამდებობა უნდა დატოვოს. ჭიჭინაძის ამ განცხადებას მალევე მოჰყვა მმართველ გუნდის წევრების ვნებათაღელვა და კრიტიკა. ,,ქართული ოცნების“ ერთ-ერთმა წევრმა, კახაბერ ოქრიაშვილმა წულუკიანის წინააღმდეგ გალაშქრებულ დეპუტატს „ვანგაც“ კი უწოდა.
ექსპერტი, მამუკა არეშიძე ,,გურია ნიუსთან“ წულუკიანის თანამდებობიდან წასვლის შანსს აფასებს. მისი თქმით, გასათვალისწინებელია მუშაობის პროცესში როგორი ურთიერთობა ჩამოუყალიბდათ წულუკიანსა და ახალ პრემიერს.
,,არ ვიცი, როგორი ურთიერთობა ჩამოუყალიბდათ ბახტაძეს და წულუკიანს, ამიტომ დარჩება თუ არა წულუკიანი თანამდებობაზე რთული სათქმელია. ხელისუფლება თავის კადრებს არ ებრძვის, მაგრამ არც იცავს, ამიტომ თანამდებობის შენარჩუნების შანსი ორმოცდაათი პროცენტია. ის, რომ ხელისუფლება თავის კადრებს კბილებით იცავდეს, ასეთი რამ არ ხდება, ამიტომ, ვფიქრობ, რომ წულუკიანის თანამდებობაზე ყოფნა არყოფნის შანსი თანაბარია“,_ გვითხრა არეშიძემ.
როგორც იუსტიციის სამინისტროს განცხადებაშია აღნიშნული, წულუკიანი შვებულებიდან 9 ივლისს დაბრუნდება. გამოემშვიდობება თუ არა წულუკიანი მინისტრთა კაბინეტს უახლოეს მომავალში გახდება ცნობილი.
