თავდაცვის სამინისტროში საგანგებო ბრიფინგი გაიმართა, რომელზეც განაცხადეს, რომ სამხედრო პოლიციამ საბრძოლო მასალის უკანონო გაყიდვის ბრალდებით რამდენიმე ადამიანი დააკავა.
სამხედრო პოლიციამ ოპერატიული ინფორმაციის საფუძველზე, საბრძოლო მასალის უკანონო შეძენის, შენახვისა და რეალიზაციისთვის სამი ადამიანი დააკავა, მათგან ორი თავდაცვის სამინისტროს თანამშრომელია, ერთი კი სამოქალაქო პირია.
სამივე მათგანს წინასწარი პატიმრობა უკვე შეეფარდა. სამხედრო პოლიციის ინფორმაციით, ლოგისტიკური უზრუნველყოფის სარდლობის , შეიარაღებისა და ტექნიკის სარემონტო ბაზის, შენახვის განყოფილების საბრძოლო მასალის შენახვის სპეციალისტი გ.გ. დანაშაულებრივ კავშირში იმყოფებოდა ლოგისტიკური უზრუნველყოფის სარდლობის საავტომობილო ბაზის საშტაბო ასეულის მეთაურის მოადგილე ზ.მ.-სთან, რომელიც შეიარაღებისა და ტექნიკის სარემონტო ბაზიდან მართლსაწინააღმდეგოდ დაუფლებულ საბრძოლო მასალას კონკრეტულად საბრძოლო ვაზნებს მოქალაქე ს.ბ.-ს დახმარებით ახდენდნენ რეალიზაციას.
“საქმეზე ჩატარებული საგამოძიებო მოქმედებების შედეგად ბრალდებულების ბინიდან, დამხმარე სათავსოდან და ავტომანქანებიდან ამოღებულია დიდი რაოდენობით საბრძოლო ვაზნები”, – განაცხადა სამხედრო პოლიციის დეპარტამენტის გამოძიწბის მთავარი სამმართველოს უფროსის მოადგილე ირაკლი ბაზერაშვილმა.
ბრალდებულებს აღკვეთის ღონისძიების სახით პატიმრობა შეეფარდათ. ბრალის დამტკიცების შემთხვევაში მათ 9-დან 13 წლამდე პატიმრობა ემუქრებათ.
