ამ წუთებში, ოზურგეთის გამგეობასთან “ქართული ოცნების” ახლად არჩეული საკრებულოს დეპუტატები იკრიბებიან. “გურია ნიუსის” წყაროს ინფორმაციით, ისინი თბილისში, ცენტრალურ ხელისუფლებასთან არიან დაბარებული საკრებულოს თავმჯდომარის და მისი მოადგილის არჩევასთან დაკავშირებით.
ჩვენ შევეცადეთ სათითაოდ გამოგვეკითხა, რატომ მიემგზავრება 36 დეპუტატი დედაქალაქში. მათი პასუხები ასეთი იყო: “გენადი მესხიძის ქორწილში მივდივართ, ჯვრისწერაზე მივდივართ, სვეტიცხოველში მივდივართ, საგულაოდ მივდივართ, ხინკლების საჭმელად მივდივართ, _ გვეუბნებოდნენ ისინი სიცილით და გვეპატიჟებოდნენ.
“ქართული ოცნების” სიის მეორე ნომრისგან, გიორგი ღურჯუმელიძისგან, რომელიც საკრებულოს თავმჯდომარის მოადგილედ მოიაზრება, ვცადეთ მიგვეღო პასუხი.
გიორგი ღურჟუმელიძის თქმით, ისინი საკუთარი ინიციატივით მიდიან თბილისში.
“ჩვენი ინიციატივით, საქმესთან დაკავშირებით მივდივართ თბილისში. წინა მოწვევის საკრებულოს შეკრებამდეც ასე გავემგზავრეთ.
ჩვენს კითხვაზე, ეს გამგზავრება ხომ არ უკავშირდება საკრებულოს თავმჯდომარისა და მისი მოადგილის არჩევას, ამის გამო ხომ არ არიან ისინი დაბარებული “ქართული ოცნების” ცენტრალურ ოფისში, ღურჯუმელიძე გვპასუხობს, რომ ეს ასე არ არის.
შეგახსენებთ, რომ რამდენიმე დღის წინ, “ქართული ოცნების” დეპუტატებს საპარლამენტო უმრავლესობის ლიდერი და ოზურგეთის მაჟორიტარი დეპუტატი არჩილ თალაკვაძეც შეხვდა. ჩვენი წყაროს ინფორმაციით, ახლა ყველაზე მთავარი მმართველ გუნდში საკრებულოს თემის დალაგება და გაძლიერებაა. აღნიშნული დეპუტატები ამის გამო არიან დაბარებული თბილისში. ისინი პარტიის ცენტრალურ ოფისში მიიღებენ დირექტივებს, ვინ უნდა გახდეს საკრებულოს თავმჯდომარე და მოადგილე.
თავმჯდომარის პოსტზე ოცნების დეპუტატებმა დავით დარჩია უნადა გაიყვანონ, ხოლო შარაშენიძის გუნდს შოთა გოგიბერიძის თავმჯდომარეობა სურს.
მოადგილეობისთვის კი ლელა საჯაია და გიორგი ღურჯუმელიძე იბრძვიან. სწორედ, ეს საკითხი უნდა გადაწყდეს დღეს თბილსიში, _ ამბობს ჩვენთან საუბრისას კონფიდენციალურად ერთ-ერთი დეპუტატი.
