საიამ 2021 წლის თვითმმართველობის არჩევნების გრძელვადიანი სადამკვირვებლო მისიის მე-2 შუალედური ანგარიში მოამზადა და ის დარღვევები აღნიშნა, რომელსაც საარჩევნო კამპანიაში ჩართული პოლიტიკური პარტიები და სუბიექტები უშვებენ.
საარჩევნო კოდექსით, წინასაარჩევნო აგიტაციაში მონაწილეობის უფლების მქონე ნებისმიერ პირს წინასაარჩევნო პერიოდში ეკრძალება რომელიმე პოლიტიკური პარტიის ან საარჩევნო სუბიექტობის კანდიდატის მხარდასაჭერად ადმინისტრაციული რესურსის გამოყენება. საიას შეფასებით, ყველა ქვემოთ მოცემულ შემთხვევაში პარტია „ქართულმა ოცნებამ“ ეს წესი დაარღვია:
ქართული ოცნების მიერ შპს „ბათუმის წყლის“ ავტომობილით სარგებლობა
მედიის მიერ გავრცელებული ინფორმაციით, 16 აგვისტოს ბათუმში
„ქართული ოცნების„ აჭარის ცენტრალურ ოფისში შპს „ბათუმის წყლის“ კუთვნილი სატრანსპორტო საშუალებით სკამები მიიტანეს.
საიამ ფაქტი მმართველი პარტიის მხრიდან ადმინისტრაციული რესურსის გამოყენების წესის დარღვევად შეაფასა და ბათუმის საოლქო საარჩევნო კომისიას საჩივრით მიმართა, რომელიც არ დაკმაყოფილდა. სხდომაზე შპს „ბათუმის წყალმა“ წარმოადგინა გადახდის ქვითარი და ინვოისი, რომლითაც დგინდებოდა, რომ პარტია „ქართულმა ოცნებამ“ შპს „ბათუმის წყლისგან“მომსახურება შეიძინა.
ბათუმის საოლქო საარჩევნო კომისიის წერილობითი უარი საიამ ბათუმის საქალაქო სასამართლოში გაასაჩივრა. საქმის შეფასებისას მოსამართლე დაეყრდნო იმ ფაქტს, რომ შპს „ბათუმის წყალს“, წესდებით განსაზღვრული უფლებამოსილების ფარგლებში, მოგების მიღების მიზნით უფლება აქვს, განახორციელოს ნებისმიერი საქმიანობა, რომელიც არ ეწინააღმდეგება კანონმდებლობას. მან დაადგინა, რომ მმართველი პოლიტიკური პარტიისთვის მომსახურება გაწეულია ანაზღაურების სანაცვლოდ.
ამის პარალელურად, მედიაში გავრცელდა ვიდეოჩანაწერი, სადაც პარტია „ნაციონალური მოძრაობის“ წარმომადგენელი რეკავს „ბათუმის წყალში“ და სთხოვს სკამების გადატანას, თუმცა პასუხად მას ეუბნებიან, რომ „ბათუმის წყალს“ ასეთი სერვისი არ აქვს. საია არ დაეთანხმა სასამართლო გადაწყვეტილებას და ის სააპელაციო სასამართლოში გაასაჩივრა.
ამბროლაურის მერის („ქართული ოცნების“ კანდიდატი) მიერ სამსახურებრივი ნიშნით პირთა შეკრება
17 აგვისტოს ამბროლაურის მერი და, იმავდროულად, მერობის კანდიდატი ზვიად მხეიძე წინასაარჩევნო კამპანიის ფარგლებში, ამბროლაურის მუნიციპალიტეტში დასუფთავებისა და კეთილმოწყობის სამსახურისა და წყალმომარაგების ქსელის მოვლა-შენახვის ცენტრის თანამშრომლებს შეხვდა. შეხვედრა ღია სივრცეში გაიმართა. საუბარი შეეხო ამ სამსახურში არსებულ მდგომარეობას, პრობლემურ საკითხებსა და მათი მოგვარების გზებს. ზვიად მხეიძის პერსონალური Facebook-გვერდის მეშვეობით გავრცელდა ვიდეო, რომლის აღწერაშიც წერია: „დღეს ამბროლაურის მუნიციპალიტეტში დასუფთავების, კეთილმოწყობის და წყალმომარაგების სფეროს წარმომადგენლებს შევხვდი“. ვიდეოს დასაწყისში ჩნდება წარწერა „ქართული ოცნება“ და კანდიდატის საარჩევნო ნომერი.
საიას ანგარიშში წერია, რომ საარჩევნო კოდექსი კრძალავს წინასაარჩევნო აგიტაციის დროს ადმინისტრაციული რესურსის გამოყენებას. კერძოდ, აკრძალულია სახელმწიფოს ან მუნიციპალიტეტის მიერ დაფუძნებული ააიპ-ების თანამშრომლების სამსახურებრივი ნიშნით შეკრება. საია მიიჩნევს, რომ ზვიად მხე-იძემ დაარღვია ეს მოთხოვნა და წინასაარჩევნო კამპანიის დროს ადმინისტრაციული რესურსი გამოიყენა.
ამბროლაურის სამხატვრო სკოლა „ქართული ოცნების“ მხარდამჭერ პოსტებს აზიარებს
2021 წლის 5, 15 და 16 სექტემბერს ააიპ ამბროლაურის უჩა ჯაფარიძის სახელობის სამხატვრო სკოლამ თავის Facebook-გვერდზე გააზიარა „ქართული ოცნებისა“ და ამბროლაურში ამ პარტიის მერობის კანდიდატის ზვიად მხეიძის მხარდამჭერი პოსტები.ხსენებული სამხატვრო სკოლა ამბროლაურის მუნიციპალიტეტის ბიუჯეტიდან ფინანსდება. მუნიციპალიტეტის ორგანიზაციებს კი, რომლებიც სახელმწიფო ბიუჯეტიდან ფინანსდებიან, ეკრძალებათ საკომუნიკაციო თუ საინფორმაციო საშუალებების გამოყენება აგიტაციის მიზნით.
ოზურგეთის მერის (დამოუკიდებელი კანდიდატი) მიერ პირთა სამსახურებრივი ნიშნით შეკრება
10 სექტემბერს ოზურგეთის მოქმედი მერი და, იმავდროულად, მერობის დამოუკიდებელი კანდიდატი კონსტანტინე შარაშენიძე ოზურგეთის მუნიციპალიტეტის მერიისა და ააიპ-ების თანამშრომლებს შეხვდა. შეკრებაზე დამსწრე პირები საინფორმაციო ვიდეორგოლში თავად აცხადებენ, რომ მუნიციპალიტეტის მერიისა და ააიპ-ის თანამშრომლები არიან. ისინი ასევე ადასტურებენ, რომ მერობის კანდიდატთან შეხვედრაზე მოვიდნენ და სამუშაო დროის ამოწუ- რვაზე მიუთითებენ.თავად კონსტანტინე შარაშენიძეც აცხადებს, რომ შეკრების მიზანი მისი, როგორც მერობის კანდიდატის, პოზიციების გაზიარება იყო.
საარჩევნო კოდექსის მიხედვით, სამსახურებრივი ნიშნით საჯარო მოსამსახურეებისა და მუნიციპალიტეტის მიერ დაფუძნებული ააიპ-ის თანამშრომლების შეკრება სამუშაო დროის ვადით არ არის შეზღუდული და ყოველთვის იკრძალება. ამდენად, საია მიიჩნევს, რომ ფაქტი საჯარო მოსამსახურეების და მუნიციპალიტეტის მიერ დაფუძნებული ააიპ-ების თანამშრომლების სამსახურებრივი ნიშნით შეკრების მაგალითია, რაც კანონდარღვევაა.
სასმელი წყლის ქსელის რეაბილიტაციის სამუშაოების შესრულებისას „ქართული ოცნების“ სააგიტაციო ატრიბუტიკის გამოყენება
21 სექტემბერს ასპინძის მუნიციპალიტეტის სოფელ ნაქალაქევში სასმელი წყლის ქსელის რეაბილიტაციის სამუშაოების შესრულებისას შპს „ნდს მშენებლობის“ წარმომადგენლებს ეცვათ „ქართული ოცნების“ სააგიტაციო ატრიბუტიკა – მაისურებიდა ქუდები.
წინასაარჩევნო პერიოდში აკრძალულია რომელიმე პოლიტიკური პარტიის მხარდასაჭერად აგიტაციასა და კამპანიაში ადმინისტრაციული რესურსის გამოყენება. ასპინძის მუნიციპალიტეტსა და შპს „ნდს მშენებლობას“ შორის დადებულია ხელშეკრულება სოფელ ნაქალაქევში სასმელი წყლის ქსელის რეაბილიტაციის შესახებ. ხსენებული კომპანია კონკრეტულ სამუშაოებს აწარმოებს მუნიციპალიტეტის ბიუჯეტის დაფინანსებით. ის მოქმედებს სახელმწიფოსთან დადებული ხელშეკრულების შესაბამისად, საჯარო ფინანსების საფუძველზე. ამ პროცესში მმართველი გუნდის სასარგებლოდ აგიტაცია, საიას მოსაზრებით, უნდა ჩაითვალოს ადმინისტრაციული რესურსის გამოყენებად. ორგანიზაციამ ამ ფაქტზე შესაბამის საოლქო საარჩევნო კომისიას საჩივრით მიმართა.
[sexy_author_bio]
