საქართველოს ახალგაზრდა იურისტთა ასოციაციამ ციალა ქათამიძის ადმინისტრაციული წესით დაკავებისა და მის წინააღმდეგ ადმინისტრაციულ სამართალდარღვევათა საქმეების წარმოებაზე სტრასბურგის სასამართლოში საჩივარი გაგზავნა.
2025 წლის იანვარში, პოლიციამ სამოქალაქო აქტივისტი ციალა ქათამიძე ბათუმში ადმინისტრაციული წესით დააკავა და მის მიმართ 2 ადმინისტრაციული სამართალდარღვევის საქმის წარმოება დაიწყო. ორივე საქმეზე სასამართლომ ციალა სამართალდამრღვევად ცნო და დააჯარიმა პოლიციის მოთხოვნისადმი დაუმორჩილებლობის და პოლიციელის სიტყვიერი შეურაცხყოფის საფუძვლით 2000 ლარის, ხოლო სტიკერის ქვაფენილზე დაკვრით იერსახის დამახინჯების საფუძვლით — 1000 ლარის ოდენობით.
საია-ს განცხადებით, ადამიანის უფლებათა ევროპულ სასამართლოში წარდგენილი საჩივრით დასაბუთებულია, რომ ციალა ქათამიძის მიმართ გამოყენებული ადმინისტრაციული დაკავებით, ასევე ადმინისტრაციულ სამართალდარღვევათა საქმეების წარმოებით, დაირღვა ადამიანის უფლებათა ევროპული კონვენციით გათვალისწინებული ისეთი უფლებები, როგორებიცაა:
- თავისუფლებისა და უსაფრთხოების უფლება (კონვენციის მე-5 მუხლი)
- საქმის სამართლიანი განხილვის უფლება (კონვენციის მე-6 მუხლი)
- გამოხატვის თავისუფლება (კონვენციის მე-10 მუხლი)
- შეკრებისა და გაერთიანების თავისუფლება (მუხლი 11).
„2025 წლის 11 იანვარს, ციალა ქათამიძე, შინაგან საქმეთა სამინისტროს (შსს) ქ. ბათუმის საქალაქო სამმართველოს შენობის წინ, ე.წ. შლაგბაუმთან, ქვაფენილზე წარწერის „იფიცება საქართველო“, გაკვრის გამო, დააკავეს. იმ მომენტში, ბათუმის პოლიციის ხელმძღვანელმა, ირაკლი დგებუაძემ განმარტა, რომ ციალა ქათამიძე დააკავეს ადმინისტრაციულ სამართალდარღვევათა კოდექსის 150-ე მუხლის საფუძველზე, შენობის იერსახის დამახინჯებისათვის. უკანონო დაკავების გასამართლებლად, ციალა ქათამიძის მიმართ პოლიციამ ადმინისტრაციულ სამართალდარღვევათა კოდექსის 173-ე მუხლის საფუძველზე გაყალბებული ოქმი შეადგინა, რომელიც, მომჩივნის მტკიცებით, მცდარ ინფორმაციას შეიცავდა, მათ შორის, დამკავებელი პირის შესახებ. სტრასბურგის სასამართლოში გაგზავნილ საჩივარში ხაზგასმულია, რომ ციალა ქათამიძის დაკავება იყო რუტინული და თვითნებური და არ შეფასებულა საქმის ინდივიდუალური გარემოებები“, — აცხადებს საია.
ახალგაზრდა იურისტთა ასოციაცია საჩივარში ასევე დავობს, რომ რეალურად საქმეში არ არსებობს მტკიცებულება, გარდა პოლიციელთა ჩვენებებისა, რომელიც ციალა ქათამიძის მხრიდან პოლიციელების შეურაცხყოფას დაადასტურებდა. შესაბამისად, ორივე ინსტანციის სასამართლომ მტკიცების ტვირთი არასწორად გაანაწილა და მხოლოდ პოლიციელთა მიერ წარდგენილ ჩვენებებზე დაყრდნობით მიიჩნია ციალა ქათამიძე სამართალდამრღვევად.
„საჩივარში, ასევე, ვდავობთ, რომ ციალა ქათამიძე მშვიდობიან პროტესტს გამოხატავდა აქციის სხვა მონაწილის დაკავების გამო. შესაბამისად, არ არსებობდა გაერთიანების და გამოხატვის თავისუფლების უფლებაში ჩარევის გამამართლებელი საფუძველი“, — აცხადებს საია.
წყარო ნეტგაზეთი
