მოძრაობა „ევროპული საქართველოსთვის“ წევრი აკაკი ბობოხიძე ყოველწლიურად დაახლოებით 4000- ლარზე მეტს ქონების გადასახადისთვის იხდის. ამის შესახებ ბობოხიძის ქონებრივ დეკლარაციაში წერია, რომელიც საჯარო სამსახურის ბიუროს ვებ-გვერდზეა გამოქვეყნებული.
დეკლარაციის თანახმად, 2016 წელს, აკაკი ბობოხიძემ მხოლოდ ქონების გადასახადისთვის 4200 ლარი გადაიხადა.
ბობოხიძე „გურია ნიუსთან“ საუბრისას განმარტავს, რომ მას დაახლოებით, 45 ჰექტარი სასოფლო სამეურნეო მიწის ნაკვეთი აქვს, რისთვისაც 2015-2015 წლებში ქონების გადასახადი გადაიხადა.
„ეს არის მიწის და სახლის გადასახადი, მიწა დაახლოებით, 45 ჰექტარია; 1 ჰა-ზე 80 ლარამდეა გადასახადი“, _ ამბობს ბობოხიძე.
რაც შეეხება აკაკი ბობოხიძის ქონებას, როგორც დეკლარაციაშია აღნიშნული, მისი ოჯახი ფლობს სამ საცხოვრებელ სახლს, სამ მიწის ნაკვეთს, რომელთაგან ორს სასოფლო-სამეურნეო დანიშნულება აქვს და ავტომანქანას.
კერძოდ, აკაკი ბობოხიძის 100%-იან საკუთრებაშია 2004 წელს, 24 000-დოლარად ნაყიდი საცხოვრებელი სახლი თბილისში, დიღომში, რომლის ფართობიც 80,00 კვ.მ-ია.
1998 წელს შეძენილ 1200,00 კვ.მ-ის ფართობის სასოფლო სამეურნეო მიწის ნაკვეთს თბილისში, ლისზე (მუხათწყარო); 2010 წელს, 90000,00-დოლარად შეძენილ 230,00 კვ.მ-ის ფართობის საცხოვრებელ სახლს თბილისში, ვაშლიჯვარში.
2011 წელს, 360 000-დოლარად ნაყიდ 70,00 კვ.მ-ის ფართობის საცხოვრებელ სახლს თბილისში, გურამიშვილის 35 ნომერში.
ასევე, აკაკი ბობოხიძის 100,00% საკუთრებაშია 2013 წელს, 39000-დოლარად ნაყიდი 2000,00 კვ.მ.-ის ფართობის მიწის ნაკვეთი ქუთაისში, დავით და კონსტანტინეს, ყოფილი ლესელიძის 2 ნომერში.
რაც შეეხება ბობოხიძის მეუღლის ქონებას, დეკლარაციის თანახმად, ნანა გოდერძიშვილის მფლობელობაშია 2008 წელს ნაყიდი მსუბუქი ავტომანქანა TOIOTA RAV4 და 2005 წელს, 13200,00-ლარად ნაყიდი, 450000,00 კვ.მ-ის ფართობის სასოფლო სამეურნეო მიწის ნაკვეთი საგარეჯოში.
სწორედ ამ მიწის ნაკვეთიდან მიღებული სასოფლო-სამეურნეო პროდუქტის რეალიზაციიდან აქვს ოჯახს მიღებული 12 000 ლარის შემოსავალი, რაზეც აკაკი ბობოხიძე, „ურია ნიუსთან“ საუბრისას განმარტავს, რომ ეს თანხა სიმინდის და ხორბლის რეალიზაციიდან მიიღო.
„ეს ყველაზე ცოტაა, რაც ბოლო წლებში მიმიღია. ჩასაბარებელი ფასები დაბლა მოდის და შემოსავალიც იკლებს, თორემ პროდუქტის რაოდენობას იგივეს ვიღებ. მოგება აღარ არის იმდენი, რაც გასულ წლებში. 15 ტონა სიმინდს ვიწევ მარტო“, _ აღნიშნავს ბობოხიძე.
აქვე უნდა აღინიშნოს, რომ საჯარო სამსახურის ბიუროს ვებ-გვერდზე გამოქვეყნებული დეკლარაციების თანახმად, 2015 წელს, აკაკი ბობოხიძეს, სასოფლო-სამეურნეო პროდუქციის რეალიზაციიდან 22000-ლარის შემოსავალი მიუღია; 2014 წელს – 28000 ლარი; 2013 წელს – 34000 ლარი; ხოლო 2012 წელს – 51000.00 ლარი.
რაც შეეხება ოჯახის სხვა შემოსავლებს, 2017 წლის 23 მაისს შევსებული დეკლარაციიდან ირკვევა, რომ გასულ წელს აკაკი ბობოხიძემ საქართველოს პარლამენტიდან, პარლამენტის წევრობისთვის და ფრაქციის თავმჯდომარეობისთვის – 65163,81 ლარის შემოსავალი აქვს მიღებული.
გარდა ამისა, აკაკი ბობოხიძემ, გასულ წელს, საგარეჯოში მდებარე, მის საკუთრებაში არსებული სახლის წილი 38000-ლარად გაყიდა.
ქონებრივი დეკლარაციის შევსების მომენტში კი, აკაკი ბობოხიძეს ნაღდი ფულის სახით 31000,00 დოლარი ჰქონდა, ხოლო „ბაზისბანკის“ სახელფასო ანგარიშზე 100,00 ლარი ერიცხებოდა. გარდა ამისა, „რესპუბლიკა ბანკის“ მიმდინარე ანგარიშზე 10,00 დოლარი, ხოლო ამავე ბანკის დეპოზიტზე 19 900– დოლარი ჰქონდა.
ნანა გოდერძიშვილს კი, “საქართველოს ბანკის” დეპოზიტზე 27000,00 დოლარი ერიცხებოდა.
დეკლარაციის თანახმად, აკაკი ბობოხიძის სახელზე, 2011 წელს აღებული იპოთეკური სესხია, რომელიც მას გურამიშვილის გამზირზე მდებარე სახლის შესაძენად გამოუყენებია, გასულ წელს კი ბანკისთვის 4697,00 დოლარი გადაუხდია.
2017 წლის 24 იანვარს, აკაკი ბობოხიძეს საგარაჟე ფართი 10000,00 ლარად შეუძენია, თუმცა სად მდებარეობს ეს ფართი, ქონებრივ დეკლარაციაში მითითებული არ რის.
გარდა ამისა, ბობოხიძეს გასულ წელს „ნაციონალური მოძრაობისთვის“ 15 ათასი ლარი შეუწირავს, თუმცა დეკლარაციაში მხოლოდ 13 ათასი ლარია აღნიშნული.
„გურია ნიუსთან“ საუბრისას ბობოხიძემ დააზუსტა, რომ თანხა დეკლარაცაიში შეცდომით აქვს ჩაწერილი და ენმ-ს არა 13 ათასი, არამდე 15 ათასი ლარი შეწირა.
„გასულ წელს „ნაციონალურ მოძრაობაში“ ვიყავი და მათ შევწირე 15 ათასი ლარი, მგონი დეკლარაციაში შეცდომით მიწერია, რომ 13 ათასი ლარი მაქვს შეწირული, ამ 2 ათას ლარს, მაპატიებენ, იმედია. ახლა „ევროპული საქართველოს წევრი ვარ და აპრილში მათაც შევწირე გარკვეული თანხა, დაახლოებით, 15 ათასამდე ლარი. კიდევ კარგი, რომ შემახსენეთ, მომავალი წლისთვის გავფრთხილდები, რომ არ შემეშალოს და შეწირულობა ისევ „ნაციონალურ მოძრაობისთვის „არ ჩავწერო“, _ ამბობს ბობოხიძე.
ოჯახის გასავლების გრაფაში ასევე აღნიშნულია, რომ გასულ წელს აკაკი ბობოხიძემ შვილის, ირაკლი ბობოხიძის სწავლისთვის 3990,00 ლარი გადაიხადა.
