საიდუმლო რუსული გაერთიანება ცდილობს ევროპაში დესტაბილიზაციის გამოწვევას_ აღნიშნული სათაურით სტატიას The New York Times დასავლეთის ქვეყნების სადაზვერვო სამსახურის ინფორმაციაზე დაყრდნობით აქვეყნებს.
გავრცელებული ინფორმაციით, დასავლეთის ქვეყნების სადაზვერვო სამსახურებმა დაჯგუფების შესახებ ჯერ კიდევ 2016 წელს, მონტენეგროში ხელისუფლების დამხობის მცდელობისას შეიტყვეს, თუმცა, მასზე დაკვირვება სკრიპალების მოწამვლის შემდეგ დაიწყეს.
მათი ინფორმაციით, დესტაბილიზაციის კამპანია მოლდოვაში დაიწყო, რასაც მოჰყვა ბულგარეთში იარაღით მოვაჭრის მოწამვლა, შემდეგ მონტენეგროში გადატრიალების მცდელობა. გასულ წელს კი ბრიტანეთში ნერვული აგენტის გამოყენებით სცადეს რუსეთის ყოფილი ჯაშუშის, სერგეი სკრიპალის და მისი ქალიშვილის მოკვლა.
სადაზვერვო სამსახურის ცნობით, დაჯგუფების წევრები ბრიტანეთში სკრიპალების მოწამვლამდე 1 წლით ადრე ჩავიდნენ, შესაძლოა, პრაქტიკის გასავლელად. ერთი მიშკინი იყო, მეორე სერგეი პავლოვი, ხოლო დაჯგუფების მესამე წევრი სერგეი ფედოტოვი.
მათ მალევე დაადგინეს, რომ ფედოტოვი და პავლოვი იმ დაჯგუფების წევრები არიან, რომლებმაც 2015 წელს ბულგარეთში იარაღებით მოვაჭრე ემილიან გებრევი მოკლეს.
დაჯგუფებამ გებრევის მოკვლა 2 -ჯერ სცადა, ერთხელ სოფიაში, მეორედ კი შავი ზღვისპირეთში მდებარე სახლში.
დასავლეთის უსაფრთხოების წარმომადგენლებმა დაასკვნეს, რომ ეს ოპერაციები და კიდევ მრავალი სხვა შემთხვევა არის ევროპის დესტაბილიზაციის კამპანიის ნაწილი, რომელსაც რუსული დაზვერვის სისტემის შიგნით ელიტური ქვედანაყოფები ასრულებენ და დანაყოფის წევრებს აქვთ დივერსიის, საბოტაჟისა და მკვლელობების გამოცდილება.
დაჯგუფება, ცნობილი როგორც Unit 29155 რამდენიმე წელია რაც მუშაობს, თუმცა, დასავლეთის ჩინოვნიკებმა ახლახან აღმოაჩინეს.
დასავლეთის 4 ქვეყნის დაზვერვის წარმომადგენლები ამბობენ, რომ გაუგებარია რამდენად ხშირად ხდება ამ დანაყოფის მობილიზება და შეუძლებელია იმის ცოდნა როდის და სად იმოქმედებენ.
გავრცელებული ცნობით, დაჯგუფების წევრები ავღანეთში, ჩეჩნეთში და უკრაინაში ბრძოლისთვის ორდენით დაჯილდოვებული ვეტერანებიც არიან.
მათი ოპერაციები კი იმდენად საიდუმლოა, რომ მათი არსებობა „გრუს“ სხვა დანაყოფებისთვისაც კი უცნობია.
