ჯერ კიდევ გასული წლის ზაფხულში ალაპარაკდა ლანჩხუთის ადგილობრივი ხელმძღვანელობა ა(ა)იპ-ებში რეორგანიზაციის ჩატარების აუცილებლობაზე.
აღნიშნული ინიციატივა პირველად საჯაროდ საკრებულოს ერთ-ერთ სხდომაზე საფინანსო-საბიუჯეტო კომისიის თავმჯდომარემ ალექსანდრე მახათაძემ მას შემდეგ გააჟღერა, რაც კულტურის დაწესებულებათა გაერთიანების მაშინდელმა ხელმძღვანელმა დავით წერეთელმა ადგილობრივ წარმომადგენლობითი ორგანოს წევრებსა და მუნიციპალიტეტის ხელმძღვანელობას სამწლიანი ანგარიში წარუდგინა და უწყებაში ცვლილებების აუცილებლობაზეც გააკეთა აქცენტი.
“უკეთესი ხომ გვინდა _ წინ უნდა გადავდგათ ნაბიჯები. ამიტომ საჭიროა რეორგანიზაცია”, _ თქვა მაშინ საფინანსო კომისიის თავმჯდომარემ.
მახათაძის მხრიდან გაჟღერებულ ინიციატივას დასტური მერმა, ალექსანდრე სარიშვილმაც მისცა:
“აუცილებლად დასაწყებია. ამასთან დაკავშირებით შესაბამისმა კომისიამ, შესაბამისმა სამსახურებმა უნდა იმუშაონ და მიიღონ სწორი გადაწყვეტილება. მესმის მტკივნეული იქნება, ვიღაცას წასვლა მოუწევს, მაგრამ სხვანაირად არ გამოვა, ჩვენ შედეგი უნდა მივიღოთ. შეიძლება არ გყავდეს ბევრი თანამშრომელი, მაგრამ უნდა გყავდეს ხარისხიანი”.
მას შემდეგ, რაც ალექსანდრე სარიშვილი ორი ოქტომბრის თვითმმართველობის არჩევნების შემდეგ მეორე ვადით შეუდგა მერის მოვალეობის შესრულებას, მან “გურია ნიუსთან” საუბარში დაადასტურა, რომ სამსახურებში სტრუქტურული ცვლილებების გახორციელება იგეგმებოდა, როგორც მერიაში, ისე ა(ა)იპ-ებში.
ამ დაანონსებული ცვლილებების კვალდაკვალ ირკვევა, რომ ეკა გუჯაბიძე, რომელიც მერის მოადგილის პოსტს იკავებდა, ვიცე-მერი გახდა. ამ უკანასკნელ პოსტზე მყოფმა ბიძინა იმნაიშვილმა კი თანაშემწის თანამდებობაზე გადაინაცვლა. ამ პოზიციას კი მანამდე თორნიკე ტიკაძე იკავებდა, რომელიც ცვლილებების გახორციელების შემდეგ მერის მოადგილედ დაინიშნა.
თანამდებობების გადანაცვლება მოხდა საფეხბურთო სკოლაშიც _ გოგი ფაცურიამ პოსტი მოადგილეს, ზაალ სანაძეს გადაუცვალა.
გასულ კვირას თანამშრომლებს გამოემშვიდობა კულტურის დაწესებულებათა გაერთიანების ხელმძღვანელი დავით წერეთელი, რომელიც მისივე მოადგილემ ოთარ ცანავამ ჩაანაცვლა.
ახალი პიარი ჰყავს ლანჩხუთის საკრებულოს. აქ კონკურსის წესით ჟურნალისტი ლაშა სარჯველაძე დაინიშნა. სარჯველაძე მანამდე კეთილმოწყობის სამსახურში იყო დასაქმებული იმავე პოზიციაზე.
ავტორი: სოფო წილოსანი
