თერჯოლის მუნიციპალიტეტის სოფელ ღვანკითში, რომელიც საკოორდინაციო საბჭოს გადაწყვეტილებით, პრევენციის მიზნით, ორი კვირაა, საკარანტინო ზონად არის გამოცხადებული, 1 ტონაზე მეტი ყველის რეალიზაცია მოხდა.
“მოსახლეობას, კოვიდინფექციასთან დაკავშირებული რეგულაციების გამო, აქვს პროდუქციის გასაღების პრობლემა. ადგილობრივი თვითმმართველობა ერთ კვირაზე მეტია, ვეხმარებით ოჯახებს მარწყვის გაყიდვაში. დღეს კი სოფელში რძის პროდუქციის რეალიზატორები შევიდნენ და 1 ტონაზე მეტი ყველი შეისყიდეს. ეს პროცესი გაგრძელდება, სანამ ამის საჭიროება იქნება”, _ განაცხადა თერჯოლის მუნიციპალიტეტის მერის მოვალეობის შემსრულებელმა ლაშა გოგიაშვილმა.
შეგახსენებთ, რომ თერჯოლის მუნიციპალიტეტის სოფელი ღვანკითი 23 აპრილიდან ჩაკეტილია. მიზეზი სოფელში კორონავირუსის რამდენიმე დადასტურებული შემთხვევაა.
