15 ივლისს ოზურგეთის მუნიციპალიტეტის საკრებულოს რიგგარეშე სხდომა შედგა.
„ოზურგეთის მუნიციპალიტეტის მერიის თანამდებობის პირთა და სხვა მოსამსახურეთა თანამდებობრივი სარგოების ოდენობის განსაზღვრის და საშტატო ნუსხის დამტკიცების შესახებ, დადგენილებაში ცვლილების თაობაზე“ _ იურიდიული სამსახურის უფროსმა, ლაშა თავაძემ ისაუბრა.
ამ ცვლილებით ახლადშექმნილი დაბა გომის მთის მერის წარმომადგენლის და თანაშემწეების შტატი განისაზღვრა, რასაც დეპუტატებმა ყოველგვარი შენიშვნის გარეშე დაუჭირეს მხარი.
მომდევნო საკითხზე _ „2020-2021 წლებში, ოზურგეთის მუნიციპალიტეტის ტერიტორიაზე, საქართველოს რეგიონებში გასახორციელებელი პროექტების ფონდიდან, გასახორციელებელი და დასაფინანსებელი ინფრასტრუქტურული პროექტების თაობაზე ისაუბრა მუნიციპალიტეტის მერის მოადგილემ ოსიკო თოთიბაძემ.
თოთიბაძემ გასახორციელებელი დეპუტატებს გასახორციელებელი პროექტების სია გააცნო.
წარმოდგენილი ათი პროექტიდან, ქალაქ ოზურგეთში გასახორციელებელი მხოლოდ ერთი იყო. დანარჩენი კი მუნიციპალიტეტის სოფლებში _ მაკვანეთში, მელექედურში, გურიანთაში, ნასაკირალში, კონჭკათში, დვაბზუსა და ბოხვაურში.
საკრებულოს თავმჯდომარემ, დავით დარჩიამ განმარტა, რომ ამ პროექტების გახორციელება 2021 წელშიც იგეგმება.
_ იმის გამო, რომ მუნიციპალიტეტი კარგად ასრულებს ინფრასტრუქტურული მიმართულების პროექტებს, ძალიან კარგი იქნება, თუ ყველა თუ არა, ნაწილი მაინც დაფინანსდეს ამ პროექტთაგან ამ წელში, _ თქვა მან.
დეპუტატმა, ინფრასტრუქტურული კომისიის თავმჯდომარემ ლავრენტი ბიგვავამ კონკრეტული შენიშვნის და რეკომენდაციის მიცემის სურვილი გამოთქვა:
_ კომისიამ განიხილა ეს პროექტები და უნდა ვთქვა, რომ ცალსახად იმსახურებს მოწონებას. ძალიან მნიშვნელოვანია ამ პროექტების გახორციელება, განსაკუთრებით, სოფლის მცხოვრებთა სოციალურ-ეკონომიკური პრობლემების გადაწყვეტისთვის. რაც შეეხება რეკომენდაციას, ეს არის დამენიას ქუჩის რეაბილიტაციის პროექტის მომზადება. ამის თაობაზე წერია ჩვენს დასკვნაში. გეტყვით, რომ თუ საბაზისო მონაცემები არ გაგაჩნიათ, თხოვნაა და მოთხოვნაც, რომ ამ ქუჩის რეაბილიტაციის პროექტი მომზადდეს. ამას, კატეგორიულად არა, მაგრამ ძალიან ითხოვს დეპუტატი ლელა საჯაია, _ განაცხადა მან (შეგახსენებთ, რომ ეროვნული გმირის, ზაზა დამენიას ქუჩის რეაბილიტაციის თაობაზე, ადგილობრივმა მცხოვრებლებმა აქცია არაერთხელ გამართეს, რის შესახებაც ჩვენ ცოტა ხნის წინაც ვწერდით. ავტ.)
საბოლოოდ, „ 2020-2021 წლებში, საქართველოს რეგიონებში განსახორციელებელი პროექტების ფონდიდან, განსახორციელებელი და დასაფინანსებელი ინფრასტრუქტურული პროექტების თაობაზე, განკარგულების დამტკიცებას, დეპუტატებმა მხარი უყოყმანოდ დაუჭირეს.
საკრებულოს წევრმა , ლელა საჯაიამ, სიტყვა ითხოვა და ისაუბრა ამავედ დღეს შეკვეთილში დენდროლოგიური პარკის გახსნის თაობაზე.
_ ეს პარკი არის მართლაც სავიზიტო ბარათი არა მხოლოდ გურიისთვის, არამედ მთელი საქართველოსთვის. ეს არის მაგალითი, თუ როგორ უნდა ემსახურო საკუთარ ქვეყანას. მინდა, ამისთვის უდიდესი მადლობა გადავუხადო ბიძინა ივანიშვილს, _ თქვა მან.
საკრებულოს წევრმა, ექიმმა დავით მდინარაძემ მნიშვნელოვან თემაზე ისაუბბრა, რაც გურიაში კოვიდის დიაგნოსტიკას ეხებოდა:
„უნდა გითხრათ ძალიან მნიშვნელოვანი საკითხის შესახებ. დავიწყეთ კოვიდის დიაგნოსტიკა. გურია ერთდაერთი რეგიონი იყო, სადაც ეს არ იყო დაწყებული და თუ გვინდა, რომ შევინარჩუნოთ მწვანე ზონის სტატუსი, ეს დიაგნოსტიკა უნდა გავიაროთ, _ თქვა მან, და დიაგნოზტიკასთან დაკავშირებულ საკითხებზე ისაუბრა.
სხდომაზე მნიშვნელოვან თემაზე ისაუბრა საკრებულოს წევრმა „პატრიოტთა ალიანსიდან“, ნანული ორაგველიძემ. მან მოითხოვა, უარი ეთქვას, ოზურგეთში, ყოფილი მანქანათმშენებელი ქარხნის ტერიტორიაზე ალუმინის საწარმოს გახსნას, უცხოელი ინვესტორის დავფინანსებით.
_ არ უნდა გახორციელდეს ეს პროექტი. ეს მოსახლეობისგან მალულად გაკეთდა. ხალხი წინააღმდეგია. ეს ის კომპანიაა, რომელმაც წლების წინ, აქ ტყვიის გადამამუშავებელი ქარხნის გახსნა დააპირა. მაშინ მას, მუნიციპალიტეტის ხელმძღვანელობის, ხალხის, მედიის ძალისხმევით უარი ეთქვა. ალუმინი არ არის ისეთი მძიმე მეტალი, როგორც ტყვია, თუმცა, ის ძალიან ადვილად იფანტება ატმოსფეროში, იღებს რადიაციას. ვფიქრობდი, რომ ისინი ადვილად არ დათმობდნენ პოზიციას _ ასეც მოხდა. ეს არის გარემოს დაბიძურების დიდი საშიშროება. ატმოსფეროში ალუმინის ნარჩენები ჰაერში ადვილად იბნევა. ადვილად იღებს რადიაციას. მე დარწმუნებული ვარ, ხალხს გვერდით საკრებულოს წევრები ამოვუდგებით და არ დავუშვებთ ამას, _ თქვა ორაგველიძემ.
_ ეს არ გამიგია. თუმცა, ეს საკითხი, ქალბატონო ნანული, მუნიციპალიტეტის დონეზე არ წყდება. რას გვთხოვთ, რა ვქნათ?
_ პროექტი მზად არის და არ გამოქვეყნებულა. მოსახლეობამ არ იცის ამის თაობაზე. დავსვათ საკითხი, რომ მანქანათმშენებელი ქარხანა აუცილებლად შეისყიდოს სახელმწიფომ ან მუნიციპალიტეტმა და მოხდეს მისი რეაბილიტირება.
საკრებულოს წევრმა, ლევან მგელაძემ განმარტა, რომ პროექტის შესახებ ხალხმა არ იცის.
_ გზშ-ს დასკვნა არ მოსულა. დაფაზე მხოლოდ სკოპინგის შედეგი გამოქვეყნდა. საჭიროა, ჩატარდეს საჯარო განხილვა, _ განაცხადა მან.
რამდენიმე დეპუტატმა მოუწოდა ნანული ორაგველიძეს, რომ მომდევნო სხდომაზე თავად დასვას ეს საკითხი.
