4 მაისს, ოზურგეთის მუნიციპალიტეტის მორიგი სხდომა შედგა.
დღის წესრიგით გათვალისწინებული ოთხი საკითხი, როგორც ყოველთვის, სხდომას საკრებულოს თავმჯდომარემ, დავით დარჩიამ გააცნო.
საკითხის, “ოზურგეთის მუნიციპალიტეტის საკუთრებაში არსებული მოძრავი ქონების სარგებლობის უფლებით გადაცემაზე, ოზურგეთის მუნიციპალიტეტის მერისთვის თანხმობის მიცემის შესახებ”, განკარგულების მიღების თაობაზე, მუნიციპალიტეტის მერის მოადგილემ, გიორგი ღურჯუმელიძემ ისაუბრა.
როგორც ღურჯუმელიძემ თქვა, ოზურგეთის მუნიციპალიტეტის საკუთრებაში არსებული ოთხი ერთეული საახალწლო დეკორატიული მოძრავი ჯიხური, სარგებლობის უფლებით უნდა გადაეცეს ა(ა)იპ “ოზურგეთის მუნიციპალიტეტის კულტურის და მოსწავლე ახალგაზრდობის ცენტრს”, უსასყიდლოდ, პირდაპირი განკარგვის წესით.
აგრარულ საკითხთა და ქონების მართვის კომისიის თავმჯდომარემ, დავით ჭაკნელიძემ განმარტება გააკეთა და თქვა, რომ აღნიშნული საკითხი კომისიის სხდომაზე დამტკიცდა:
_ ჯიხურების ჯამური ღირებულება შეადგენს 18 ათას ლარს. ერთი ერთეულის ღირებულება კი 4 700 ლარია, _ თქვა მან.
საკრებულომ გადაწყვიტა, რომ ოზურგეთს მუნიციპალიტეტის საკუთრებაში არსებული ოთხი ერთეული საახალწლო დეკორატიული მოძრავი ჯიხურის (ჯამში, 18 800 ლარის ღირებულების) არსამეწარმეო იურიდიული პირის, “ოზურგეთის მუნიციპალიტეტის კულტურის და მოსწავლე ახალგაზრდობის ცენტრისთვის” უსასყიდლოდ, პირდაპირი განკარგვის წესით, იურიდიული პირის არსებობის ვადით, სარგებლობის უფლებით, თხოვების ფორმით, გადაცემისთვის მერს თანხმობა მიეცეს.
საკრებულომ კენჭი დადებითად უყარა განკარგულებას, წინააღმდეგი არავინ წასულა.
მომდევნო მსგავსი საკითხის, “ოზურგეთის მუნიციპალიტეტის საკუთრებაში არსებული მოძრავი ქონების სახელმწიფოსთვის საკუთრებაში გადაცემის შესახებ”, სხდომას გიორგი ღურჯუმელიძემ გააცნო.
მისი თქმით, მუნიციპალიტეტის საკუთრებაში არსებული მოძრავი ქონება, ავტოსატრანსპორტო საშუალება _ “მერსედეს ბენცი” სახელმწიფოს გადაეცემა უსასყიდლოდ. დავით ჭაკნელიძემ თქვა, რომ მანქანის ტექნიკური მდგომარეობა მუნიციპალიტეტს მისი სრულფასოვნად გამოყენების საშუალებას არ აძლევს. ამიტომ კომისიამ მხარი დაუჭირა ამ მოძრავი ქონების სახელმწიფოსთვის საკუთრებაში გადაცემის შესახებ განკარგულებას.
საკრებულოს სხდომამ განკარგულებას მხარი დაუჭირა.
საკმაოდ მნიშვნელოვანი სამართლებრივი აქტის პროექტი, რომელიც აღნიშნულ სხდომაზე მიიღეს, ეს იყო “ქალაქ ოზურგეთის ტერიტორიაზე სატრანსპორტო საშუალების პრაქტიკული მართვის სწავლებისთვის განკუთვნილი, საავტომობილო გზების სიის დამტკიცებისა და საგზაო ნიშნებისა და მონიშვნების დაგეგმარების შესახებ”, ოზურგეთის მუნიციპალიტეტის საკრებულოს 2018 წლის 18 ივლისის #43 განკარგულებაში ცვლილების შეტანა .
ქალაქ ოზურგეთის ტერიტორიაზე სატრანსპორტო საშუალების პრაქტიკული მართვის და სწავლებისთვის განკუთვნილი საავტომობილო გზების სიის დამტკიცებისა და საგზაო ნიშნების და დაგეგმარების შესახებ”, ოზურგეთის მუნიციპალიტეტის საკრებულოს 2018 წლის განკარგულებაში მოხდა ცვლილების შეტანა.
მართვის მოწმობის პრაქტიკულ გამოცდას ემატება ქალაქის მარშრუტი. წარმოდგენილი ორი მარშრუტი კი გამოცდის ჩამბარებელს ეცნობება გამოცდის დაწყების წინ და გაიგებს, რომელი მარშრუტით მოუწევს ჩაბარება.
საკრებულოს სხდომაზე, საკითხთან ერთად, რუკის სახით წარმოდგენილი მარშრუტები მოიცავს ქალაქ ოზურგეთში ბესიკის, აღმაშენებლის, პეტრიწის, გაბრიელ ეპისკოპოსის, გიორგი ჭანტურიას, თაყაიშვილის, სანაპიროს, ნაკაშიძის, ჭავჭავაძის, ვიქტორ დოლიძის, გურამიშვილის, ფარნავაზის, ჯავახიშვილის ქუჩების მონაკვეთებს.
აღნიშნულ განკარგულებას, საკრებულოს სხდომაზე დასამტკიცებლად კენჭი უყარეს, წინააღმდეგი არავინ წასულა.
საბოლოოდ, 4 მაისის სხდომაზე, წარმოდგენილი ოთხი საკითხიდან, საკრებულომ ყველა დაამტკიცა.
ოზურგეთის მუნიციპალიტეტის საკრებულოს აღნიშნულ სხდომას, “ერთიანი ნაციონალური მოძრაობის” წევრები არ დაესწრნენ.
ამის შესახებ აღნიშნული პარტიის მიერ, განცხადება წინასწარ გავრცელდა.
განცხადებაში ნათქვამი იყო:
“ოზურგეთის მუნიციპალიტეტის საკრებულოს თავმჯდომარეს ბატონ დავით დარჩიას!
ბატონო დავით, მოგახსენებთ, რომ ოზურგეთის მუნიციპალიტეტის საკრებულოს სხდომაზე (29.04.2022 წელი) ოზურგეთის მუნიციპალიტეტის საკრებულოს წევრმა, ფრაქცია “ქართული ოცნება დემოკრატიული საქართველოს” თავმჯდომარის მოადგილე გოჩა კილაძემ, საკრებულოს სხდომათა დარბაზში, საკრებულოს წევრს, თათია ნიკოლაშვილს მიაყენა სიტყვიერი შეურაცხყოფა.
მიმაჩნია, რომ გოჩა კილაძის ქმედება იყო ამორალური და მიზნად ისახავდა თათია ნიკოლაშვილის დამცირებას. მისი ეს ქმედება ეწინააღმდეგება სადეპუტატო ეთიკას, ყოველივე ამის გათვალისწინებით, გთხოვთ, განიხილოთ ჩემი განცხადება და დაავალოთ შესაბამის კომისიას, დაუყოვნებლივ შეისწავლოს 29 აპრილის სხდომაზე მომხდარი ფაქტები, რათა მოხდეს ოზურგეთის მუნიციპალიტეტის საკრებულოს რეგლამენტით დადგენილი წესით, გოჩა კილაძის პასუხისმგებლობის საკითხის განხილვა. ვინაიდან საკრებულოს უმრავლესობის წევრების მხრიდან მსგავსმა ქმედებებმა მიიღო სისტემატური ხასიათი, ხოლო საკრებულოს თავმჯდომარეს დღემდე მომხდარ არც ერთ ფაქტზე რეაგირება არ მოუხდენია, ფრაქცია ერთიანი ნაციონალური მოძრაობა პროტესტის ნიშნად არ დაესწრება 2022 წლის 4 მაისს ჩანიშნულ საკრებულოს სხდომას”, _ წერია განცხადებაში.
მკითხველს შევახსენებთ, რომ 29 აპრილის სხდომაზე საკრებულოს თავმჯდომარემ თათია ნიკოლაშვილს შემდეგი სიტყვებით მიმართა: “დორბლი მოიწმინდე, გოგო!”
ეს განცხადება სხდომის დაწყებამდე იყო გავრცელებული, თუმცა, დავით დარჩიას ეს სხდომაზე არც უხსენებია, რაც “ნაციონალური მოძრაობის” დეპუტატების პროტესტის მიზეზი გახდა.
ავტორი
